“U Ta Fa!”

HI KU VULA KA LEANNE KARLINSKY

Ku lavisisa ka mina vutshunguri lebyinene ngopfu lebyi nga tirhisiki ngati, eSpaniya

LOKO a wu fanele ku teka riendzo u ya kun’wana ni kun’wana emisaveni, xana a wu ta endzela tiko rihi? Eka mina, nhlamulo a yi olova. Ndzi dyondzisa Xipaniya exikolweni, kasi mina ni nuna wanga Jay ni n’wananga Joel, hi hlanganyela evandlheni ra Timbhoni ta Yehovha leri vulavulaka Xipaniya eGalax, le Virginia eU.S.A. Kutani laha a ndzi navela ku ya kona a ku ri eSpaniya. Xisweswo, u nga swi vona leswaku a ndzi tsake njhani loko vatswari va mina va ndzi byela leswaku va ta ndzi yisa kona! Hambileswi nkatanga ni n’wananga va tsandzekeke ku famba na mina, pakani ya mina a yi ri ekusuhi ni ku hetiseka loko ndzi fambe ni vatswari va mina hi xihaha-mpfhuka lexi yaka eMadrid hi ku kongoma. Loko hi fika hi April 21, hi endle xiboho xo ya le Estella hi movha, ku nga xidorobana lexi nga eNavarre, eSpaniya n’walungu. Ndzi fike ndzi tshamiseka kahle exitulwini xa le ndzhaku, kutani ndzi byi faya.

Ku sukela kwalaho, ndzi tsundzuka ndzi etlele ensin’wini, dyambu ri ri karhi ri ndzi tlhava ematihlweni. ‘Ndzi le kwihi? Xana ndzi fikise ku yini laha? Xana ndza lorha?’ Loko swivutiso leswi swi ri karhi swi fika emiehleketweni, ndzi langutane ni ntiyiso wo vava. Swi kona leswi nga fambiki kahle, a ku nga ri norho. Swiambalo swa mina a swi handzukerile evokweni ra ximatsi naswona a ndzi tsandzeka ku tlakusa mavoko kumbe milenge. Hi ku famba ka nkarhi, ndzi kume leswaku movha wa hina wu tlumbe xisirhelelo xa riwa epatwini kutani wu ndzi hlanta loko wu ri karhi wu vumbulukela eriweni ra timitara ta 20. Nkateko wa kona, mina ni vatswari va mina a hi tsundzuki swo tala hi mhangu yoleyo.

Ndzi huwelerile ndzi kombela mpfuno, kutani muchayeri wa lori u ndzi tsutsumerile. Kutani u ehlele ehansi laha movha a wu ri kona, laha vatswari va mina a va manyeke kona. U huwelele munghana wakwe a ku: “Byela ambulense yi hatlisa. Vanhu lava nga emovheni va vaviseke ngopfu!” Kutani u tlhelele laha a ndzi etlele kona, kutani a ringeta ku ndzi pfuna, a ololoxa nenge wa mina. Ndzi konye ngopfu, ndzi sungula ku swi vona leswaku ndzi vaviseke ngopfu.

Hi ku hatlisa a ndzi ri ekamareni ra vavabyi exibedlhele xa kwalaho eLogroño. Maphorisa ma tivise Timbhoni ta Yehovha ta kwalaho lomu a ndzi ri kona ni leswi swi humeleleke. Ku nga ri khale, vo tala lava humaka emavandlheni ya le Estella ni le Logroño a va ri etlhelo ka mubedo wa mina, swin’we ni Komiti yo Vulavurisana ni Swibedlhele. Kunene, emaxangwini ya mina hinkwawo exibedlhele lexi, Vakreste-kulorhi lava rhandzekaka lava ndzi nga va tiviki a va tshama va lunghekele ku khathalela swilaveko swa mina, vusiku ni nhlikanhi. Va tlhele va khathalela vatswari va mina hi ndlela ya rirhandzu, lava hlakarheleke kahle kutani va humesiwa exibedlhele endzhaku ka loko ku hundze vhiki mhangu leyi yi humelerile.

Kwalomu ka awara ya 1:00 nivusiku hi Ravunharhu, madokodela ma fikile ma ta ndzi endla vuhandzuri eka nyonga leyi tshovekeke. Ndzi byele dokodela leswaku a ndzi swi lavi ku pomperiwa ngati.a Hambileswi a a kanakana u pfumerile leswaku u ta xixima xikombelo xa mina, hambileswi a ndzi byeleke leswaku swi nga ha endleka ndzi fa. Ndzi ponile eka vuhandzuri byebyo, kambe ndzi hlamarisiwe hi ku lemuka leswaku timbanga ta mina a ti nga hlantswiwanga, ni tibandichi ta mina a ti nga cinciwanga.

Hi Ravuntlhanu, mpimo wa ngati ya mina a wu ehle ku fika eka 4,7, naswona a ndzi heleriwa hi matimba. Dokodela u pfumerile ku ndzi nyika vutshunguri byin’wana—ku nga ku tlhaveriwa erythropoietin (EPO), leyi loko yi hlangane ni ayoni ni swiaki swin’wana swa ngati, yi kondletelaka tisele leti endlaka ngati yo tshwuka.b Enkarhini lowu, Jay na Joel se a va fikile. Mawaku ndlela leyi a ndzi tsake ha yona ku vona nuna wa mina ni n’wana wa mina!

Kwalomu ka 1:30 nivusiku, dokodela u byele Jay leswaku xibedlhele ana se xi kume xileriso lexi humaka ehubyeni xa ku ndzi pompela ngati loko xiyimo xa mina xo nyanya. Jay u n’wi byele leswaku a ndzi lavi ku pomperiwa ngati ehansi ka swiyimo hinkwaswo. Dokodela u hlamule a ku: “Phela u ta fa!”

Jay u vulavule ni Komiti yo Vulavurisana ni Swibedlhele leswaku ndzi rhurhiseriwa exibedlhele xin’wana—lexi nga ta xixima ku rhandza ka mina. A hi hinkwavo lava a va sihalala exibedlhele lexi. Hi xikombiso, dokodela un’wana u ndzi tiyisekisile leswaku u ta endla hinkwaswo leswi nga ematimbeni yakwe ku tiyiseka leswaku ndzi khomiwa hi ndlela ya xichavo leyi yi ndzi lulameleke. Kambe, ku nga ri khale, madokodela man’wana ma sungule ku ndzi tshikilela. Ma ndzi vutise ma ku: “Xana u lava ku fa u siya ndyangu wa wena?” Ndzi ma tiyisekisile leswaku ndzi lava vutshunguri lebyinene ngopfu lebyi nga kumekaka, lebyi nga tirhisiki ngati. Madokodela lawa a ma nga lavi ku pfuna. Un’wana u swi veke hi ku kongoma a ku: “U ta fa!”

Komiti yo Vulavurisana ni Swibedlhele yi kume xibedlhele eBarcelona lexi xi pfumeleke ku ndzi tshungula handle ko tirhisa ngati. Swibedlhele leswi a swi hambanile swinene! EBarcelona, vaongori vambirhi va ndzi hlantswe kahle kutani va rhurisa mbilu ya mina. Loko muongori un’wana a cinca tibandichi ta mina, u kume leswaku i ta rihlaza naswona a ti ri ni ngati leyi omeke. U vule leswaku varikwavo va n’wi poyirile hileswi va ndzi khomeke hi ndlela leyi.

Ku nga ri khale se a ndzi kuma vutshunguri lebyi a ndzi fanele ndzi sungule ku byi kuma exibedlhele xa le Logroño. Ku ve ni vuyelo lebyi hlamarisaka. Emasikwini ma nga ri mangani, swirho swa mina swa nkoka se a swi tirha kahle, naswona hemoglobini ya mina a yi tlakukile yi fika eka 7,3. Loko ndzi huma exibedlhele, ana se a yi tlakuke yi fika eka 10,7. Loko ndzi fanele ku tshunguriwa nakambe exibedlhele xa le United States, se a yi fika eka 11,9.

Ndzi nkhensa matshalatshala ya madokodela ni vaongori lava va lavaka ku endla leswi rhandziwaka hi vavabyi va vona, ku nga khathariseki leswaku va pfumelelana na vona kumbe e-e. Loko vatirhi va le xibedlhele va xixima ripfumelo ra muvabyi, va n’wi tshungula—xisweswo, va n’wi nyika vutshunguri lebyinene ngopfu lebyi nga kona.

[Tinhlamuselo ta le hansi]

[Xifaniso lexi nga eka tluka 26]

Ndzi ri ni nkatanga ni n’wananga

[Xifaniso lexi nga eka tluka 27]

Swirho swimbirhi swa Komiti yo Vulavurisana ni Swibedlhele