Ku Langutana Ni Vutshunguri Bya Xihatla

“NDZI ta vula ntiyiso; lexi u nga na xona i tshumba leri nga ni khombo. Loko ho ka hi nga ri susi, ri ta hlasela swirho leswin’wana swa nkoka. Hikokwalaho ndzi vulaka leswaku swa antswa u tsemiwa nenge.”

Marito ya dokodela ma ndzi hime kukota bakiti ra mati yo titimela, hilaha hi swi vurisaka xiswona laha Peru. A ndzi ri na malembe ya 21 hi vukhale. Se a ku hundze n’hweti, ndzi sungule ku twa ku vava etsolweni ra ximatsi kutani va ndzi byela leswaku ndzi na vuvabyi bya marhambu. Hambiswiritano, masiku ma nga ri mangani endzhaku, a ndzi nga ha swi koti hambi ku ri ku yima kunene.

Enkarhini wolowo, a ndzi ri mutirheli wa nkarhi hinkwawo wa Timbhoni ta Yehovha le tintshaveni ta Andes ePeru xikarhi. Endzhaku ko tlhelela edorobeni ra rikwerhu ra Huancayo, manana u ndzi heleketile hi ya fika eka doroba-nkulu ra Lima leri nga evugima-lwandle. Kwalaho, hi July 22, 1994, ndzi ye exibedlhele xo antswa swinene etikweni leri lexi tshungulaka khensa, kwalaho ndzi kume leswaku vuvabyi lebyi ndzi khomeke byi vitaniwa khensa ya le ndzeni ka marhambu.

Mhaka Leyi Khumbaka Ripfalo

Ku nga ri kungani ndzi byeriwe leswaku xibedlhele xexo a xi nga byi endli vuhandzuri handle ko tirhisa ngati. Dokodela un’wana u vule leswi: “Ndzi navela onge u nga ya fela ekaya ematshan’weni yo va ndzi byarha vutihlamuleri bya rifu ra wena.” Kambe Komiti Yo Vulavurisana Ni Swibedlhele (HLC [Hospital Liaison Committee]) ya kwalaho, ku nga ntlawa wa Timbhoni ta Yehovha leti kondletelaka ntirhisano exikarhi ka xibedlhele ni muvabyi, yi nghenelerile yi ndzi yimela. Hikwalaho ka sweswo, dokodela-nkulu wa vuhandzuri exibedlhele xexo u nyike mpfumelelo eka dokodela wihi na wihi eka ntlawa wa yena, leswaku a ndzi handzula ntsena loko a ta swi kota ku langutana ni mphikamakaneta ya kona. Dokodela un’wana a a swi rhandza, kutani hi ku hatlisa, ndzi lulamiseriwe ku ya handzuriwa.

Emahlweni ka vuhandzuri, ndzi endzeriwe hi vanhu vo tala. Ku te muprista, loyi a tamele Bibele, kutani a vula leswaku vuvabyi bya mina i nxupulo lowu humaka eka Xikwembu. U ndzi khutaze leswaku ndzi fanele ndzi amukela vutshunguri byin’wana ni byin’wana lebyi nga ta ponisa vutomi bya mina. Ndzi n’wi byele leswaku ndzi tiyimisele ku hlayisa xileriso xa Bibele xo ‘papalata ngati.’—Mintirho 15:19, 20, 28, 29.

Vaongori na vona a va ta, va rilarileka va ku: “Phela lebyi i vuhunguki, ko va vuhunguki hakunene!” Ku te ni mintlawa ya madokodela. A ma lava ku vona mufana loyi a aleke ku amukela mpompelo wa ngati eka muxaka wa vuhandzuri lebyi eka byona a va teka ngati yi boha. Hambiswiritano, maendzo lawa a ma ri ya nkoka swinene eka mina a ma ri lawaya ya Vakreste-kulorhi ni maxaka. Vaongori a va hlamarisiwa swinene hi maendzo lawa lama khutazaka.

Vutshunguri Lebyi Humelelaka Handle Ka Ngati

Timinete ti nga ri tingani ndzi nga si titivatiwa, ndzi twe un’wana wa vatitivarisi a ku: “A ndzi nge vi na vutihlamuleri eka leswi nga humelelaka!” Kambe mutitivarisi loyi un’wana, swin’we na dokodela wa mina ni valawuri lavan’wana va le xibedlhele, a va xi xixima xikombelo xa mina xo ka ndzi nga yi amukeli ngati. Lexi landzeleke, lexi ndzi xi tweke, a ku ri mutitivarisi a ku: “Samuel, pfuka. Vuhandzuri bya wena byi herile.”

Hambileswi nenge wa mina hinkwawo a wu tsemiwile, ndzi sungule ku twa ku vava lokukulu laha a wu tsemiwe kona. A ndzi lava ku hunguta ku vava hi ku tiswoswa endzhumbyini, lowu ni ku va kona a wu nga ha ri kona. A ndzi twa nchumu lowu nga hlamuselekiki lowu vuriwaka xitlhavi xo ehleketeleriwa. A ndzi twa ku vava hakunene, naswona ku vava loku tlulaka mpimo, hambi leswi nenge lowu xitlhavi a xi twala eka wona ana se a wu susiwile.

Lexi tlhandlameke, a ku hleriwe leswaku ndzi tshunguriwa hi vutshunguri bya tikhemikhali. Nchumu wo biha hi vutshunguri lebyi, hileswaku byi dya tisele to tshwuka ni to basa ta ngati ni swiphepherhele swa ngati, leswi tirhaka swinene ku endla ngati. Leswi a swi vula leswaku ntlawa wun’wana wa madokodela a wu fanele wu tivisiwa hi ku ala ka mina ku amukela mpompelo wa ngati. Nakambe HLC yi vulavurisane ni lava nga ni vutihlamuleri, naswona madokodela ma pfumerile ku ndzi tshungula handle ka ngati.

Ku ve ni vuyelo lebyi tolovelekeke lebyi vaka kona endzhaku ka vutshunguri bya tikhemikhali—misisi ya mina yi sungule ku hluveleleka, ndzi hlamba timbilu, ndzi hlanta ni ku va ni ntshikilelo. Ndzi tlhele ndzi byeriwa leswaku ku na 35 wa tiphesente ta leswaku misiha ya le byongweni yi handzuka yi huma ngati. Ndzi titwe ndzi boheka ku vutisa un’wana wa madokodela leswaku xana a ndzi ta dlayiwa hi yini—hi khensa kumbe hi vutshunguri bya tikhemikhali.

Endzhakunyana ka nkarhi, madokodela ma vule leswaku ma nga ka ma nga byi sunguli vutshunguri bya tikhemikhali ra vumbirhi ma nga si engetela ngati ya mina hi mpompelo wa ngati. Dokodela un’wana hi ku hlundzuka u ndzi byele leswaku loko a a swi kota, a ta ndzi titivata a ndzi pompela ngati. Ndzi n’wi byele leswaku sweswo swi nga si kala swi humelela, a ndzi nge he yi emahlweni ni vutshunguri bya tikhemikhali. Dokodela u ndzi bumabumerile hi ndlela leyi ndzi kombiseke xivindzi ha yona.

Ndzi pfumele ku tirhisa homoni leyi vitaniwaka erythropoietin leswaku yi ta engetela ngati ya mina. Endzhaku ka loko yi tirhisiwile, ngati ya mina yi tlakukile. Endzhaku ka kwalaho, masiku ma nga ri mangani lama landzeleke ndzi tshunguriwe hi tikhemikhali va ndzi tlhava kunene. Loko ndzi etlele lahaya a ndzi tivutisa, ‘Xana lebyi hi byona vutshunguri lebyi nga ta handzula misiha ya ngati ebyongweni?’ Nkateko wa kona, ndzi hete vutshunguri hinkwabyo handle ka vuyelo byo biha.

Emahlweni ko va ndzi endliwa vuhandzuri, a ku ri fambiselo ra laha xibedlhele ra leswaku ku hlongoriwa vanhu lava nga wu amukeliki mpompelo wa ngati. Kambe fambiselo leri ri cincile. Entiyisweni, hi siku rero endzhaku ka vuhandzuri bya mina, dokodela wa mina wa vuhandzuri u endle vuhandzuri byin’wana handle ko tirhisa ngati, naswona eka khamba leri, muvabyi wa kona a a nga ri un’wana wa Timbhoni ta Yehovha! Sweswi madokodela yo hlayanyana exibedlhele xexo ya tirhisana kahle swinene ni HLC, naswona ma pfumerile ku amukela vavabyi lava lavaka vuhandzuri lebyi ku nga tirhisiwiki ngati eka byona.

Ku Xiya Leswi Ndzi Nga Ha Swi Kotiki

Ku sukela evuhlangini, ndzi dyondzisiwe tindlela ta Xikwembu. Ndza tshemba leswaku leswi swi ndzi pfune leswaku ndzi yima ndzi tiyile eka mintshembo ya mina leyi sekeriweke eBibeleni emhakeni leyi ya vutshunguri bya xihatla. Hambiswiritano, sweswinyana a ndzi tshikilelekile hikwalaho ka leswi ndzi nga ha swi kotiki ku endla swo tala hilaha ndzi lavaka ha kona entirhweni wa Xikwembu. Ndzi byele malume wa mina loyi a nga nkulu wa Mukreste. U ndzi tsundzuxe leswaku hambi a ri muapostola Pawulo a a ri na lexi a xi vitana ‘riphantsu enyameni yakwe’ naswona leswi a swi n’wi sivela ku tirhela Xikwembu hi xitalo hilaha a a lava ha kona. Kambe Pawulo u endle leswi a a ta kota ku swi endla. (2 Vakorinto 12:7-10) Marito ya malume ma ndzi pfune ngopfu.

Sweswinyana ndzi veheriwe nenge lowu endliweke. Ndza tshemba leswaku leswi swi ta ndzi endla ndzi kota ku tirha ntirho lowu engetelekeke eka Xikwembu xa hina, Yehovha. Ndza tlangela leswi ndzi koteke ku hlayisa ripfalo lerinene hi nkarhi wa vutshunguri bya mina bya xihatla. Ndza tiyiseka leswaku loko ndzo hambeta ndzi tshembeka, Yehovha u ta ndzi hakela hi miri lowunene ni vutomi lebyi nga heriki eparadeyisini emisaveni, laha switlhavi ni maxangu swi nga ta va swi nga ha ri kona.—Nhlavutelo 21:3, 4.—Hi ku vula ka Samuel Vila Ugarte.