Langutelo Ra Bibele
Xana Xikwembu Xi Lehisa Mbilu Ku Fikela Kwihi?
“XIKWEMBU, HAMBILESWI XI RHANDZAKA KU KOMBISA VUKARHI BYA XONA NI KU TIVISA MATIMBA YA XONA, XI SWI TIYISELELE HI MBILU YO LEHA SWINENE SWIBYA SWA VUKARHI LESWI ENDLIWEKE SWI FANERIWA HI KU LOVISIWA.”—VARHOMA 9:22.
EMATIN’WINI hinkwawo Xikwembu xi lehise mbilu hambileswi a ku ri ni vubihi lebyikulu ni vuhomboloki. Emalembeni lama tlulaka 3 000 lama hundzeke, Yobo u ririle: “Hikwalaho ka yini lavo homboloka va hambeta va hanya, va dyuhala, va tlhela va va ni rifuwo ro tala? Vana va vona va simekiwe va tiya emahlweni ka vona, ni vatukulu va vona ematihlweni ya vona. Tindlu ta vona i ku rhula, ku chava a ku kona, ni nhonga ya Xikwembu a yi kona ehenhla ka vona.” (Yobo 21:7-9) Varhandzi van’wana va vululami vo fana na muprofeta Yeremiya, na vona va karhatekile hikwalaho ka leswi a swi vonaka onge Xikwembu xi va lehisela mbilu vanhu vo biha.—Yeremiya 12:1, 2.
Xana u swi vonisa ku yini? Xana u hlamarisiwa hi ku va Xikwembu xi pfumelele vubihi? Xana minkarhi yin’wana u vona onge Xikwembu xi fanele xi hatla xi herisa vanhu hinkwavo vo biha? Xiya leswi Bibele yi swi vulaka malunghana ni ndlela leyi Xikwembu xi lehisaka mbilu ha yona ni swivangelo swa kona.
Ha Yini Xikwembu Xi Lehisa Mbilu?
Xo sungula, hi fanele hi vutisa: Ha yini Xikwembu xi pfumelela vubihi lebyikulu kasi xi ni vululami lebyi hetisekeke? (Deteronoma 32:4; Habakuku 1:13) Xana leswi swi vula leswaku xa byi seketela vubihi? Nikatsongo! Anakanya hi xifaniso lexi landzelaka: A hi nge ku ni muhandzuri loyi a honisaka milawu yo sivela mavabyi naswona a vavisaka vavabyi va yena swinene. Loko a a tirha exibedlhele, xana a a nga ta hlongoriwa hi ku hatlisa? Kambe ku ni swiyimo swin’wana laha munhu a faneleke a lehisa mbilu ngopfu loko a ri eka swona. Hi xikombiso, exiyin’weni xa khombo, kumbexana laha ku lwiwaka kona, xana a hi nga ta pfumela leswaku muhandzuri a tirha ehansi ka swiyimo leswi nga riki swinene ni leswi nga ni khombo, hambi ku ri ku tirhisa switirhisiwa swa vuhandzuri leswi hi ntolovelo swi langutiwaka swi ri swa xiyimo xa le hansi?
Hi ndlela leyi fanaka, namuntlha Xikwembu xi pfumelela swilo swo tala leswi xi nga swi rhandziki nikatsongo. Hambileswi xi vengaka vubihi, kambe xa byi pfumelela swa xinkarhana. Ku ni swivangelo leswi twalaka swo va xi byi pfumelela. Phela, leswi swi endla leswaku ku va ni nkarhi lowu eneleke wa ku ti lulamisa hi ku helela timhaka ta nkoka, leti pfuxiweke hi ku xandzuka ka Sathana entangeni wa Edeni. Leti i timhaka leti fambisanaka ni ku fuma ka Xikwembu hi vululami. Nakambe, ku lehisa mbilu ka xona ku nyike vanhu lava endlaka leswo biha nkarhi wa leswaku va hundzuka.
Xikwembu Xa Tintswalo, Lexi Lehisaka Mbilu
Vatswari va hina vo sungula Adamu na Evha va hlanganyele na Sathana eku xandzukeleni ka Xikwembu. Xikwembu a xi ri ni mfanelo ya ku va lovisa hi nkarhi wolowo. Ku ri na sweswo, xi kombise tintswalo xi tlhela xi lehisa mbilu, xi va pfumelela hi rirhandzu leswaku va va ni vana. Kambe vana volavo swin’we ni vanhu hinkwavo lava va va velekeke, va tswariwe va ri ni xidyoho.—Varhoma 5:12; 8:20-22.
Xikwembu xi lava ku kutsula munhu exiyin’weni xo tika lexi a nga eka xona. (Genesa 3:15) Kambe enkarhini lowu, Xikwembu xi lehisa mbilu swinene ni ku kombisa tintswalo, hikuva xi yi twisisa kahle ndlela leyi ku nga hetiseki loku hi ku kumeke ka Adamu ku hi khumbaka ha yona. (Pisalema 51:5; 103:13) Xi ni “musa wo tala wa rirhandzu” naswona xi tiyimisele ku “rivalela hi ndlela leyikulu.”—Pisalema 86:5, 15; Esaya 55:6, 7.
Ndlela Leyi Xikwembu Xi Lehisaka Mbilu Ha Yona
Hambiswiritano, Xikwembu xi ta va xi nga kombisi rirhandzu kumbe ku rivalela loko xi pfumelela vubihi byi ya emahlweni hilaha ku nga heriki. A nga kona tatana loyi a a ta pfumelela vubihi hilaha ku nga heriki loko un’wana wa vana va yena a vavisa swirho swin’wana swa ndyangu wa yena hi vomu. Hambiloko Xikwembu xi pfumelele vudyoho swa nkarhinyana kambe xi ta tlhela xi tirhisa timfanelo ta xona to tanihi rirhandzu, vutlhari ni vululami. (Eksoda 34:6, 7) Loko leswi xi swi lehiseleke mbilu swi herile, xi ta byi herisa vubihi.—Varhoma 9:22.
Muapostola Pawulo u swi kombise kahle leswi. U tshame a ku: “Eka switukulwana leswi hundzeke [Xikwembu] xi pfumelele matiko hinkwawo leswaku ma famba hi tindlela ta wona.” (Mintirho 14:16) Eka xiendlakalo xin’wana Pawulo u vulavule hi ndlela leyi “Xikwembu xi yi [honiseke ha yona] minkarhi yo tano yo pfumala vutivi” eka vanhu lava monyeke milawu ya xona ni misinya ya xona ya milawu. Pawulo u ye emahlweni a ku: “Sweswi [Xikwembu] xi byela vanhu hinkwako-nkwako leswaku va fanele va hundzuka.” Hikokwalaho ka yini? “Hikuva xi veke siku leri xi nga ni xikongomelo xo avanyisa misava leyi akiweke hi ku lulama.”—Mintirho 17:30, 31.
Vuyeriwa Sweswi Eka Ku Lehisa Mbilu Ka Xikwembu
Hakunene, ku hava loyi a nga honisaka milawu ya Xikwembu ivi a tikomberisa ndzivalelo wa Xikwembu hi leswi a nga laviki ku langutana ni vuyelo bya swiendlo swa yena. (Yoxuwa 24:19) Vo tala eIsrayele wa khale a va ehleketa leswaku va nga endla tano. A va nga hundzuki. Va hupe xikongomelo xa ku lehisa mbilu ka Xikwembu ni tintswalo ta xona. Xikwembu a xi byi lehiselanga mbilu hilaha ku nga heriki vubihi bya vona.—Esaya 1:16-20.
Bibele yi vula leswaku loko munhu a ta papalata vuavanyisi byo hetelela bya Xikwembu u fanele a “hundzuka”—hileswaku a pfumela eka Xikwembu hi ku helela leswaku a nga hetisekanga nileswaku u le xiyin’weni xa vudyoho, kutani a fularhela leswo biha hakunene. (Mintirho 3:19-21) Kutani, exisekelweni xa gandzelo ra Kreste, Yehovha Xikwembu u ta hi rivalela. (Mintirho 2:38; Vaefesa 1:6, 7) Hi nkarhi lowu faneleke wa xona, Xikwembu xi ta susa swilo hinkwaswo leswi vangiweke hi ku dyoha ka Adamu. Ku ta va ni “tilo lerintshwa ni misava leyintshwa” laha xi nga ta ka xi nga ha swi pfumeleli leswaku swi hambeta swi ya emahlweni “swilo leswi nga kona . . . leswi huwelelaka leswaku swi lava ku lovisiwa.” (Nhlavutelo 21:1-5; Varhoma 9:22, Phillips) Mawaku vuyelo lebyinene lebyi veke kona hi ku va Xikwembu xi lehise mbilu!
[Xifaniso lexi nga eka tluka 29]
Xikwembu xi pfumelele Adamu na Evha leswaku va va ni vana