“Siku Ro Tsakisa Ku Ma Tlula Hinkwawo eVuton’wini Bya Hina”

MUCATO i xiendlakalo xo tsakisa swinene. Mimpatswa yo tala yi te: “A ku ri siku ro tsakisa ku ma tlula hinkwawo evuton’wini bya hina.” Kambe, ri nga ha va siku ro tika swinene. Muteki ni mutekiwa swin’we ni mindyangu ya ka vona va nga ha va ehansi ka ntshikilelo lowukulu naswona va karhala ngopfu hikwalaho ka swiboho ni malunghiselelo hinkwawo lawa va faneleke va ma endla ni hikwalaho ka vanhu vo tala lava muteki ni mutekiwa va nga ta hlangana na vona hi siku rero.

Loko mpatswa wu tekana, wu sungula vutomi lebyintshwa. Kambe a ku nge khumbeki wona ntsena. Tanihi leswi loko n’wana wa vona kumbe makwavo wa vona a nghenela vukati, swi vulaka leswaku u simeka ndyangu lowuntshwa, xisweswo mindyangu ya vona yi tala ku tivutisa swivutiso swo tala.

Ematikweni yo hambana-hambana, mikhuva leyi fambisanaka ni micato a yi fani, xisweswo a swi olovi ku bula ha yona hinkwayo. Swihloko leswi swi ta bula hi mikhuva ya xilungu. Ematikweni lama tirhisaka xilungu, ku cata swa durha. Van’wana va tirhisa mali yo tala ngopfu hi siku ra mucato, yin’wana ya yona yi tirhisiwa ku hirha holo kumbe vhengele ra swakudya laha lava teke emucatweni va nga ta dyela kona. Ku ringanyetiwa leswaku eItaliya, mucato lowu nga exiyin’weni lexi pimiweke kahle wu dya mali leyi tlulaka R90 000. EJapani ni le matikweni man’wana, mali ya kona yi nga ha va ehenhla ka leyi. Hakanyingi vatekani a hi vona va hakelaka mali leyi. Kambe yi hakeriwa hi vatswari.

Micato yi hundzuke bindzu lerikulu. Van’wamabindzu vo tala va kucetela moya wa leswaku mucato wu fanele wu va lowu “hetisekeke,” ku nga pfumali nchumu. Entiyisweni, va ri, “leri i siku ro tsakisa ku ma tlula hinkwawo evuton’wini bya wena!” Kutani va ku tshembisa swilo swo tala “leswi lavekaka” ku endla siku rero ra wena lerikulu ri va leri “hetisekeke.” Ku nga ha va ni swirhambo leswi endleriwaka wena ntsena, nguvu yo “hlawuleka” ya wena ya mucato, tinguvu to hlawuleka leti nga ta tirhisiwa hi tinxangwana kumbe tisudu ta vavanuna enkhubyeni wa vukati. Kasi hi hala tlhelo ku ni swiluva, mimovha ya manyunyu leyi vuriwaka ti-limousine, kumbexana ni vhengele ra swakudya leri ku nga ta dyeriwa eka rona, muteki wa swifaniso, tinqhambi ni swin’wana. Swilo leswi muteki ni mutekiwa va nga ha swi lavaka, swi nga ha chavisa vatatana vo tala.

Ematikweni yo hambana-hambana, ku kandziyisiwa ngopfu mhaka ya ku landzela ndhavuko. Ku ni tindlela to hlawuleka leti muteki ni mutekiwa va languteriweke ku ti landzela. Ina, ku ni swilo swo tala leswi va faneleke va swi tsundzuka, kambe va ni nkarhi wutsongo wo hlela swilo sweswo hinkwaswo.

Xana swi vonaka swi tsakisa kumbe swi tika? Ku nga khathariseki leswaku u ri yini, loko u ehleketa hi swilo hinkwaswo leswi lavekaka emucatweni, swi nga ha tlakusa swivutiso swo hlayanyana. Xana ku cata swi vula yini namuntlha? Xana swilo leswi hinkwaswo swa laveka leswaku munhu a va a teke “kahle”? Xana swi nga tlhantlhiwa njhani swiphiqo swo hambana-hambana ni swa mintlhaveko leswi nga ha tshukaka swi va kona?

Ku nga khathariseki ntshikilelo hinkwawo lowu nga kona, vanhu vo tala va swi kotile ku swi tamela kahle swilo leswi fambisanaka ni mucato naswona va wu tsakerile nkhuvo. Mintokoto ya vona yi nga ha pfuna van’wana lava lunghiselelaka xiendlakalo lexi fanaka. Nakambe, ku ni nkongomiso wa Bibele lowu nga pfunaka loko ku endliwa malunghiselelo ya mucato, leswaku siku rero ri tsakisa, naswona ri vuyerisa hinkwavo.