Bokisi Ra Swivutiso

◼ Loko mpatswa wu lava ku catela eHolweni ya Mfumo, i yini leswi wu faneleke wu bula ha swona ni vakulu?

Micato leyi hleriwaka hi ku pfumelelana ni milawu ya Bibele leyi kongomisaka yi tisa ku dzuneka eka Yehovha. Leswi swi va tano ngopfu-ngopfu loko micato ya kona yi ta khomeriwa eHolweni ya Mfumo, phela vaaka-tiko va teka leswi endlekaka kwalaho ku ri xikombiso xa leswi nhlengeletano ya hina yi nga xiswona. Kutani leswaku ‘swilo hinkwaswo swi endliwa hi ku tenga ni hi ku hleleka,’ i swa nkoka leswaku vakulu va kwalaho va bula ni mpatswa lowu kombelaka ku tirhisa Holo ya Mfumo.—1 Kor. 14:40.

Loko mpatswa wu lava ku catela eHolweni ya Mfumo wu fanele wu tsala papila wu kombela mpfumelelo, ivi wu ri nyika komiti ya ntirho ya vandlha leri hlanganyelaka eholweni yoleyo. Wu fanele wu rhumela papila ra wona ka ha ri ni nkarhi naswona ri fanele ri va ri tsariwe siku ni nkarhi lowu wu lavaka ku yi tirhisa ha wona. Kambe wu fanele wu tsundzuka leswaku vakulu a va nge cinci xiyimiso xa minhlangano hikwalaho ka mucato wa wona. Ku engetela kwalaho, mpatswa wa kona wu fanele wu va wu ri exiyin’weni lexinene emahlweni ka Yehovha naswona wu hanya hi ku pfumelelana ni milawu ya Bibele leyi kongomisaka.

Leswaku ku tiyisekisiwa leswaku mucato wa kona wu xi yimela kahle Xikwembu xa hina lexi xiximekaka, mpatswa wolowo wu fanele wu bula ni komiti ya ntirho hi malunghiselelo ya mucato wu nga si endla xiboho. Hambileswi vakulu va nga ta ka va nga wu byeli leswi mucato wa wona wu faneleke wu fambisa xiswona, kambe loko wu hlele ku endla swin’wana leswi vakulu va vonaka onge a swi fanelanga swi endliwa eHolweni ya Mfumo, mpatswa wolowo wu fanele wu swi cinca. Vuyimbeleri lebyi faneleke byi tlangiwa hi lebyi kumekaka eka Kingdom Melodies kumbe ebukwini ya hina ya tinsimu ntsena. Loko wu lava ku sasekisa Holo ya Mfumo ni ku veka switulu hi ndlela yin’wana, wu fanele wu kombela mpfumelelo. Ku tekiwa ka swinepe ni vhidiyo a swi fanelanga swi onha ku xiximeka ka nkhuvo wolowo. Vakulu va nga pfumelela mpatswa wolowo leswaku wu tirhisa Holo ya Mfumo loko wu ri karhi wu endla malunghiselelo ya mucato wa wona loko ntsena ma nga endliwi hi nkarhi lowu ku faneleke ku endliwa swilo swa vandlha. A ku fanelanga ku vekiwa swirhambo swa mucato ebodweni ya switiviso. Kambe vakulu va nga ha endla xitiviso xo koma eka Nhlangano wa Ntirho leswaku vandlha ri swi tiva leswaku ku ta va ni mucato lowu nga ta khomeriwa kwala Holweni ya Mfumo.

Hambileswi ku nga riki xilaveko leswaku vanhu hinkwavo lava nga ta ta emucatweni va va va khuvuriwile, a hi swinene leswaku ku rhambiwa vanhu lava nga ni mahanyelo yo biha, lava vutomi bya vona byi nga le kule swinene ni milawu leyi kongomisaka ya Bibele kumbe vanhu lava mahanyelo ya vona ma nga ta endla vanhu va tivutisa swivutiso swo tala. Mucato wu fanele wu fambisiwa hi nkulu loko a ri kona. Vakulu i vadyondzisi va Rito ra Xikwembu lava fanelekaka, kutani va nga swi kota ku tirhisa milawu ya Bibele leyi kongomisaka leyi faneleke yi landzeriwa eka nkhuvo lowu wo hlawuleka.—1 Tim. 3:2.

Tanihi leswi nkulu la fambisaka nkhuvo a nga ni vutihlamuleri eka wona, u fanele a tivisiwa hi malunghiselelo ya wona. Nkulu yoloye u ta hlangana ni mpatswa lowu leswaku a wu vutisa hi ndlela leyi a wu tikhome ha yona ku sukela loko wu sungule ku rhandzana; wu fanele wu vulavula ntiyiso. Loko ku ri leswaku un’wana wa vona a hi ro sungula a cata, u fanele a va a ri ni vumbhoni lebyi kombisaka kahle leswaku u dlaye vukati byakwe byo sungula hi ku pfumelelana ni Matsalwa. (Mat. 19:9) Sweswo swi ta vula leswaku u ta komba nkulu papila rakwe ra ku dlaya vukati.

Loko mpatswa wu vulavurisana ni vakulu ni ku tirhisana na vona hi ndlela leyinene, sweswo swi ta endla leswaku mucato wa wona wu va nkhuvo lowu nga rivalekiki eka vanhu hinkwavo.—Swiv. 15:22; Hev. 13:17.