Micato Leyi Dzunisaka Yehovha

Xihloko Lexi Landzelaka Lexi Vulavulaka Hi Micato Ya Vakreste, Eku Sunguleni A Xi Lunghiseleriwe Le Etiyopiya Leswaku Xi Nyikela Nkongomiso Lowu Pfunaka Vo Tala Hi Ririmi ra Xiamhari Lava Ha Ku Vaka Timbhoni Ta Yehovha Etikweni Rolero. Xi Vulavula Hi Mindhavuko Ya Tiko Rolero Ni Mikhuva Leyi Nga Ha Vaka Yi Hambanile Ni Ya Laha U Tshamaka Kona. A Swi Kanakanisi Leswaku U Ta Kuma Ku Hambana Ka Kona Ku Tsakisa. Hi Nkarhi Lowu Fanaka, Xihloko Lexi Xi Nyikela Ndzayo Leyi Ringaniseriweke Ya Bibele Leyi U Nga Ta Yi Vona yi Tirha Hambiloko Mikhuva Ya Micato Yi Hambana Endhawini Ya Ka N’wina.

“MICATO Ya Vukreste Leyi Tisaka Ntsako” a ku ri nhloko-mhaka ya xihloko lexinene lexi dyondziwaka xa The Watchtower ya April 15, 1984. Xihloko lexi landzelaka eka nkandziyiso wolowo a xi ku: “Titsakise Hi Ndlela Leyi Ringaniseriweke eMinkhubyeni Ya Vukati.” (Eka munhu wihi na wihi la anakanyaka ku nghenela vukati, ku ni switsundzuxo swa vutlhari leswi engetelekeke etibukwini leti nge Ku Endla Vutomi Bya Ndyangu Wa Wena Byi Tsakisa, ndzima 2, ni leyi nge Your Youth—Getting the Best Out Of It, tindzima 19 na 20.)a Vo tala va ve Timbhoni ta Yehovha endzhaku ka loko ku ve ni swihloko leswi, kutani hi lava ku pfuxeta tinhla to karhi leti tirhaka ngopfu-ngopfu endhawini ya ka hina, kun’we ni tinhla tin’wana leti fanelaka leti nga ta hi pfuna ku endla micato yi va swiendlakalo leswi dzunisaka Yehovha, Musunguri wa vukati.

Xivutiso lexi faneleke xi kambisisiwa ku sungula hi lexi nge, Xana mucato wu fanele wu endliwa rini? Xana siku ra kona ri fanele ku lawuriwa hi masiku ya nguva ya mucato ya ndhavuko wa le ndhawini ya ka n’wina? Ku ni dyondzo leyi tolovelekeke ya leswaku nkhuvo wa vukati wihi na wihi lowu endliwaka hi nkarhi wun’wana ni wun’wana wa lembe a wu nge humeleli. Lebyi i vukholwa-hava lebyi nga riki na masungulo, hikuva mimpatswa yo tala leyi tekaneke leyi tsakeke ni ku tirhela Yehovha hi vun’we a yi tekananga hi nguva ya ndhavuko. A hi pfumeli eka nkateko kumbe khombo. (Esaya 65:11; Vakolosa 2:8) A hi nge ma pfuni maxaka lama nga riki vapfumeri leswaku ma vona ku hambana exikarhi ka ntiyiso ni mavunwa loko hi veka siku ra mucato hi ku ya hi vukholwa-hava. Ntiyiso hileswaku, Vakreste va nga nghenela vukati hi n’hweti yihi na yihi.

Loko ku hleriwe nkulumo ya mucato endzhaku ka ku tsarisa vukati hi nawu, ku ta va vutlhari ku nga tshami masiku yo tala exikarhi ka swiendlakalo leswi swimbirhi. Loko mpatswa wu ta tsakela ku va ni nkulumo ya mucato eHolweni ya Mfumo, wu fanele wu ya eka vakulu va vandlha ka ha ri na nkarhi leswaku wu ya kombela ku tirhisa holo. Vakulu va kwalaho va ta tiyiseka leswaku malunghiselelo ya nkhuvo ma ta va siya ni mapfalo lama tengeke. Ku fanele ku vekiwa nkarhi wa nkulumo leswaku ku nga kavanyetiwi mintirho yihi na yihi ya vandlha. Makwerhu la hlawuriweke ku nyikela nkulumo ya mucato u ta rhanga a hlangana ni muteki ni mutekiwa a va nyika switsundzuxo leswi pfunaka ni ku tiyiseka leswaku a ku na swihinga swa mahanyelo kumbe swa le nawini eka vukati lebyi ni leswaku u pfumelelana ni malunghiselelo ya nkhuvo lowu nga ta endliwa. Nkulumo ya mucato yi fanele yi leha kwalomu ka hafu ya awara naswona yi fanele yi nyikeriwa hi ndlela leyi xiximekaka, yi kandziyisa langutelo ra moya. Nkulumo ya mucato i ya nkoka swinene ku tlula nkhuvo wihi na wihi lowu nga ha landzelaka.

Mucato wa Vukreste i nkarhi lowunene wo kombisa leswaku “a hi va misava.” (Yohane 17:14; Yakobo 1:27) Ku hleleka ka hina ku fanele ku va loku xiyekaka. Leswi swi ta vula leswaku hi ta sungula hi nkarhi ematshan’weni ya leswaku vanhu va rindza, kumbexana hi kavanyeta mintirho ya vandlha. Leswi i swa nkoka ngopfu-ngopfu leswaku swi xiyiwa hi mutekiwa, tanihi leswi maxaka ya misava ma nga ha n’wi khutazaka ku hlwela—onge hi loko swi tlakusa nkoka wa yena. Hi ku fika hi nkarhi makwerhu wa xisati la nga Mukreste la wupfeke a nga kombisa leswaku timfanelo ta moya, to tanihi ku titsongahata ni ku ehleketelela, i ta nkoka eka yena! Nakambe, loko muteki wa swifaniso a rhambiwile leswaku a ta teka eka xiendlakalo lexi, ku hleleka i ka nkoka. Swi ta va swi fanerile leswaku hi lava leswaku muteki wa swifaniso a ta a ambale baji, thayi, ni buruku leri langutekaka na leswaku a nga kavanyeti nkulumo loko a teka swifaniso. A ku na swifaniso leswi faneleke swi tekiwa loko ku khongeriwa. Ku hleleka ka hina ku ta dzunisa Yehovha ku tlhela ku nyikela vumbhoni lebyinene. A ku na xivangelo xo ringeta ku tekelela mikhuva ya micato ya misava leyi nga ta khubumeta nhlamuselo ya xiviri ya xiendlakalo lexi.

A swi bohi leswaku u endla nkhuvo leswaku mucato wu humelela, kambe ku hava laha Matsalwa ma solaka xiendlakalo xo tano lexi tsakisaka. Hambiswiritano, ku hlengeletana ko tano ka Vakreste va ntiyiso ku fanele ku hambana ni ka minkhuvo ya misava leyi hundzeletiwaka, ku nwiwaka ku tlula mpimo, ku dyiwaka ku tlurisa, ku vaka ni vuyimbeleri lebyi thyakeke, ku ciniwa hi ndlela leyi khomisaka tingana hambi ku ri ku lwa. Bibele yi hlanganisa ‘minkhuvo ya huwa’ ni mintirho ya nyama. (Vagalatiya 5:21) Swa olova ku va ni vulawuri lebyinene loko ku nga ri na vanhu vo tala. A swi bohi ku dzima tende leswaku u hetisisa mikhuva leyi tolovelekeke. Loko van’wana va endle xiboho xo tirhisa tende hikwalaho ka ndhawu kumbe maxelo, yoleyo i mhaka ya munhu hi xiyexe.

Leswi tshameke swi humelela swi kombise leswaku ndlela leyi humelelaka swinene yo pima nhlayo ya vaendzi i ku tsala swirhambo leswi kongomisiweke eka munhu ha un’we. I vutlhari ku rhamba vanhu ematshan’weni ya ku rhamba vandlha hinkwaro, naswona leswi hi nga Vakreste lava hlelekeke, hi fanele hi xixima swipimelo swo tano. Swirhambo swi tlhela swi pfuna ku papalata ku khomisiwa tingana hi ku ta ka munhu la susiweke enkhubyeni, hikuva loko sweswo swo humelela, vamakwerhu vo tala va xinuna ni va xisati va nga ha hlawula ku famba. (1 Vakorinto 5:9-11) Loko mpatswa wu rhamba maxaka lama nga riki vapfumeri kumbe vanhu lava va tolovelaneke na vona, a swi kanakanisi leswaku va ta va va pimiwile, va ta nyika “ndyangu wa lava pfumeleke,” xiyimo xa nkoka. (Vagalatiya 6:10) Van’wana va hlawule ku rhamba vanhu lava va va toloveleke va misava kumbe maxaka lama nga riki vapfumeri eka nkulumo ya mucato ematshan’weni yo va rhamba enkhubyeni. Ha yini? Phela, ku ve ni timhaka leti eka tona maxaka ya misava ma vangeke swiyimo leswi khomisaka tingana enkhubyeni wa mucato lerova vamakwerhu va xinuna ni va xisati vo tala va vona leswaku va nge he tshami. Mimpatswa yin’wana yi hlele leswaku yi va ni swakudya swo hlawuleka swa siku ni swirho leswi nga maxaka ya le kusuhi ni vanghana va Vakreste.

Hi ku pfumelelana na Yohane 2:8, 9, swa tirha ku hlawula “mufambisi wa nkhuvo.” Muteki u ta lava ku hlawula Mukreste la tshembekaka la nga ta vona leswaku ku hleleka ni mimpimanyeto leyi tlakukeke swa hlayisiwa. Loko vaendzi va tisa tinyiko, leswi swi fanele swi endliwa handle ko ‘tinyungubyisa.’ (1 Yohane 2:16) Vuyimbeleri byi nga tsakisa handle ko thyakisiwa hi marito lama kanakanisaka, pongo lerikulu kumbe macinelo lama humeke endleleni. Vo tala va swi kume swi antswa ku nyika nkulu a yingisela vuyimbeleri lebyi nga ta tlangiwa ka ha ri emahlweni. Ku cina ku nga vanga mintlhamu, tanihi leswi ku cina ko tala ka ndhavuko ku kumiweke eka ku cina loku endleriweke ku nyanyula ku navela ka rimbewu naswona ku kombisa swiyimo leswi nga fanelangiki swa misava. “Nkarhi wo tsema khekhe ni ku nwa vhinyo” minkarhi yin’wana wu ve xikombiso xa vanhu va misava lava nga lawulekiki. Entiyisweni, mimpatswa yo tala ya Vakreste yi endle xiboho xa leswaku yi nga vi ni swakunwa swa xihoko enkhubyeni wa mucato, xisweswo yi papalata swiphiqo.

Tanihi leswi hi lavaka ku fundzha Yehovha, hi ta papalata ku tinyungubyisa leswaku hi tikokela nyingiso wo tala. Hambi ku ri tibuku ta misava ti lwisane ni switayele leswi dumeke leswi hundzeletiweke. Wa nga vona ndlela leyi swi nga ta va swi nga ri vutlhari ha yona ku va mpatswa wu nghenisa exikweletini hikwalaho ka mucato wo durha swinene ivi wu swela ku ringana malembe yo tala leswaku wu ta hakela timali ta wona ta siku rero rin’we! Kavula, rhoko yihi na yihi leyi ambariwaka hi nkarhi wolowo yi fanele yi va yi sasekile yi tlhela yi languteka, yi fanela munhu la tivulaka la chavaka Xikwembu. (1 Timotiya 2:9, 10) Xihloko lexi nge, “Micato Ya Vakreste Yi Fanele Yi Kombisa Ku Anakanyela” (The Watchtower ya January 15, 1969) yi nyikele tinhlamuselo leti leti tsakisaka malunghana ni swiambalo:

“Mucato wa munhu i xiendlakalo xa nkoka, kutani nyingiso hi ntolovelo wu nyikeriwa eka ku languteka a tsakile ni ku saseka. Kambe leswi a swi vuli swona leswaku munhu u fanele a ambala muxaka wo karhi wa rhoko kumbe sudu. Munhu u endla kahle loko a xiyisisa switayele swa le ndhawini ya ka vona, minxavo ni leswi yena a swi rhandzaka. . . . Kambe, xana swi ta va swi twala ku xava swiambalo swo durha mi tivangela xikweleti kumbe mi vangela van’wana xikweleti? . . . Vatekiwa van’wana va tsakele ku tirhisa rhoko ya mucato ya munghana la rhandzekaka kumbe xaka. Van’wana va eneriseke swinene loko va tiendlele swiambalo swa mucato, kumbexana hi ndlela yoleyo va swi kota ku va ni swiambalo leswi nga tirhisiwaka eka swiendlakalo swin’wana enkarhini lowu taka. Naswona swi fanerile swinene leswaku mpatswa wu cata hi swiambalo swa wona swo saseka swinene leswi tolovelekeke . . . Van’wana lava nga ha swi kotaka ku va ni mucato lowukulu va nga ha navela ku va ni ‘mucato lowu ringaniseriweke kahle’ hikwalaho ka ku nonon’hwa ka minkarhi.”

Hi ku fanana, vanhu lava nga kona emucatweni (tinxangwana ta muteki ni tinxangwana ta xisati ta mutekiwa) a swi bohi leswaku ti tala. Na vona va nge lavi ku tikokela nyingiso lowu nga fanelangiki hi ndlela leyi va ambaleke ha yona na hi swiendlo swa vona. Hambileswi munhu la susiweke a nga ha pfumeleriwaka ku va kona enkulumeni eHolweni ya Mfumo, The Watchtower ya April 15, 1984, yi te: “Swi ta va swi nga fanelanga ku va ni vanhu lava susiweke enkhubyeni wa vukati kumbe lava mahanyelo ya vona lama nyenyetsaka ma lwisanaka swinene ni misinya ya milawu ya Bibele.”

Hambileswi Yesu a veke kona emucatweni, a hi nge ehleketi leswaku a ta pfumelela mukhuva lowu tolovelekeke wa ku va ni timovha leti landzelelanaka ti rhendzeleka ni doroba ti endla pongo lerikulu; maphorisa ma kale ma rihisa vachayeri hikwalaho ko ba bele loko timovha ti ri karhi ti landzelana emucatweni. (Vona Matewu 22:21.) Hi ku komisa, ematshan’weni yo tekelela ku tibombisa kumbe swiendlo leswi tolovelekeke swa vanhu va matiko, Vakreste va fanele va kombisa vutlhari bya munhu la ringaniselaka.—Swivuriso 11:2.

Kambe ku vuriwa yini hi ku va kona emicatweni ya vaakelani, vatirhi-kulorhi va misava kumbe maxaka ya le kule ni vanhu lava hi va toloveleke? Mukreste un’wana ni un’wana u fanele a tiendlela xiboho emhakeni leyi. I swinene ku tsundzuka leswaku nkarhi wa hina i wa risima, tanihi leswi hi lavaka nkarhi wa vutirheli bya hina, dyondzo ya munhu hi xiyexe ni mintirho yin’wana ya ndyangu ni ya vandlha. (Vaefesa 5:15, 16) Hi mahelo-vhiki, hi ni minhlangano ni ntirho wa nsimu leswi hi nga laviki swi hi hundza. (Vaheveru 10:24, 25) Minkarhi ya micato yo tala yi lwisana ni minkarhi ya tinhlengeletano kumbe matshalatshala ya ntirho wa nsimu lowu fambisanaka ni Xilalelo xa Hosi. A hi fanelanga hi pfumela ku kavanyetiwa eku endleni ka matshalatshala lama fanaka lawa vamakwerhu va hina emisaveni hinkwayo va ma endlaka leswaku va va kona eXilalelweni xa Hosi. Loko hi nga si tiva ntiyiso, hi hete nkarhi wo tala ni vanhu va misava, kumbexana eka swiyimo leswi nga xi fundzhiki Xikwembu. (1 Petro 4:3, 4) Sweswi swilo leswi hi swi rhangisaka emahlweni se swi hambanile. Minkarhi hinkwayo swa koteka ku navelela mpatswa wa misava ntsako hi ku wu rhumelela khadi kumbe hi ku wu endzela swa xinkarhana siku rin’wana. Van’wana va tirhise minkarhi yo tano ku nyikela vumbhoni, va avelana ni lava ha ku tekanaka matsalwa lama faneleke.

Mucato lowu swilo swa moya swi lawulaka tindlela ta misava wu ta fundzha Yehovha hakunene. Hi ku tiyiseka leswaku va tihambanisa ni misava ni swiyilayila swa yona ni ku hundzeleta, hi ku nga yi pfumeleli yi kavanyeta mintirho ya swa le tilweni ya nkarhi na nkarhi, na ku kombisa xichavo ematshan’weni ya ku tikurisa, Vakreste va ta tiphina hi xiendlakalo lexi. Ku tlula kwalaho, va ta swi kota ku tsundzuka xiendlakalo hi ripfalo lerinene ni ku xi tsundzuka hi ntsako. Hi ku kombisa vutlhari ni ku anakanyela, onge micato hinkwayo ya Vakreste yi nga nyikela vumbhoni eka vahlaleri va timbilu letinene.

[Nhlamuselo ya le hansi]

[Xifaniso lexi nga eka tluka 24, 25]

Vakreste a va tekeleli mikhuva yin’wana ni yin’wana ya mucato wa ndhawu ya ka vona