Papalata Ntlhamu Wa ku Gembula
“Ku gembula a ku ri khumbanga rihanyo ra mina naswona minkarhi hinkwayo a ndzi lawula mali leyi a ndzi gembula ha yona. Kambe ndza pfumela leswaku minkarhi hinkwayo loko ndzi tlanga lotto, a ndzi hlawula tinomboro leti a ndzi tiva leswaku ti ta ndzi tisela nkateko.”—Linda.
VANHU vo tala lava gembulaka va kholwa eka tinomboro leti nga ni nkateko kumbe eka switshungulo. Swi nga ha endleka va nga swi tekeli enhlokweni leswaku i vukholwa-hava, xisweswo va nga ha ya emahlweni ni mikhuva leyi fambisanaka na byona.
Van’wana va kala va khongela ni Xikwembu, va kombela leswaku xi va pfuna va wina ntlango lowu va wu tlangaka. Hambiswiritano, Bibele yi tamele rungula leri solaka vanhu lava vulaka leswaku va gandzela Xikwembu kasi hala tlhelo va ‘lulamisa tafula ra xikwembu xa Nkateko.’ (Esaya 65:11) Ina, Xikwembu xi yi vengile mikhuva ya vukholwa-hava leyi kucetelaka ku pfumela eka nkateko. Ndlela leyi ku gembula ku nga xiswona, ku xisa vanhu va kholwa leswaku va nga va ni Nhlanhla.
Ku gembula ku tlhela ku endla leswaku vanhu va rhandza mali. Leswi vanhu va namuntlha va yaka va nga vi na mhaka ni timhaka ta moya, mali yi hundzuka xikwembu xa vona kutani ku gembula ku va ndlela leyi yaka yi toloveleka leyi va xi gandzelaka ha yona. Tikereke ta vona letikulu leti va gandzelaka eka tona i tikhasino ta manyunyu naswona tidyondzo letintshwa leti va dyondzisiwaka tona hileswaku swi lulamile ku va ni makwanga. Vakambisisi va kume leswaku vunyingi bya vanhu lava yaka eka tikhasino a va yi hi xikongomelo xa ku ya tihungasa kumbe ku rhandza ndhawu yoleyo ntsena, kambe va ya hi xikongomelo xa ku “vuya va rhwale mali hi masaka.” Hambiswiritano, Bibele yi lemukisa yi ku: “Ku rhandza mali i rimitsu ra mixaka hinkwayo ya swilo swo biha, naswona hi ku lwela ku fikelela rirhandzu leri, van’wana va lahlekisiwile eripfumelweni naswona va titlhave hinkwako-nkwako hi switlhavi swo tala.”—1 Timotiya 6:10.
Eka 1 Vakorinto 6:9, 10, Bibele yi swi veka erivaleni loko yi ku: “Mi nga xisiwi . . . vagandzeri va swifaniso swa hava . . . kumbe vanhu va makwanga . . . va nga ka va nga yi dyi ndzhaka ya mfumo wa Xikwembu.” Makwanga a ma dlayi mahanyelo ya vanhu ntsena; ma nga dlaya ni vumoya byi fa nyaa,—kambe ma nga lawuleka.
Va Kume Matimba Ya Ku Cinca
Kazushige, la boxiweke eka xihloko xo sungula u ri: “Ndzi ringete ko tala ku tshika ku gembula. Ndzi swi vonile leswaku ku gembula ni vanghana erivaleni ra tihanci swi dlaya ndyangu wa mina. Minkarhi hinkwayo a ndzi dyiwa mali leyi ndzi yi wineke. Ndzi gembule ni hi mali leyi nkatanga a a yi hlayisele ku wundla n’wana wa hina wa vumbirhi loko a velekiwa naswona ndzi hetelele ndzi gembula ni hi mali ya khamphani leyi a ndzi tirha eka yona. Hikwalaho ka sweswo, ndzi hetelele ndzi nga ha ri na xindzhuti. Hakanyingi nkatanga a a rila, a ndzi kombela leswaku ndzi tshika ku gembula kambe a ku ndzi nghene engatini.”
Hiloko Kazushige a sungula ku dyondzeriwa Bibele hi Timbhoni ta Yehovha. U ri: “Loko ndzi ri karhi ndzi ya emahlweni ni ku hlaya Bibele, ndzi khorwiseke hi ku helela leswaku ku ni Xikwembu nileswaku ndzi ta vuyeriwa loko ndzo xi yingisa. Ndzi ve ni ntshembo wa leswaku matimba lama humaka eka Xikwembu ma ta ndzi pfuna ku tshika ku gembula. Lexi ndzi hlamariseke, a ndzi tshikanga ku gembula ntsena kambe a ndzi nga ha lavi ni ku twa nchumu hi kona. Sweswi loko ndzi ehleketa hi ku gembula, mbilu ya mina ya vava. Ndzi nkhensa Yehovha Xikwembu hi mbilu ya mina hinkwayo leswi a ndzi pfuneke ku tshika ku godzomberiwa hi ku gembula nileswi a ndzi pfuneke leswaku ndzi hanya vutomi lebyi nga ni xikongomelo!”—Vaheveru 4:12.
John, loyi na yena a boxiweke eka xihloko xo sungula, u sungule ku dyondzeriwa Bibele. U ri: “Leswi a ndzi dyondzisiwa swona eBibeleni swi ndzi pfune leswaku ndzi tlhela ndzi kambisisa swiyimo swa mina. A ku ri ro sungula ndzi vona khombo leri ku gembula ku ri tiseke endyangwini wa mina ni le ka mina hi ndzexe. Ndzi swi vonile leswaku ku gembula ku kucetela munhu leswaku a va ni vutianakanyi ni makwanga—ku nga mikhuva leyi Yehovha a yi vengaka. Loko ndzi ri karhi ndzi ya emahlweni ni dyondzo ya mina, rirhandzu ra mina eka Yehovha ri ndzi nyike xivindzi xa ku tshika ku gembula. Ndzi sungule ku gembula hileswi a ndzi lava ku hanya bya le ka byandlana. Kambe norho wa mina wu hetiseke loko ndzi tshike ku gembula naswona ndzi tirhela Yehovha ndzi tsakile.”
Linda, nsati wa John na yena u endle xiboho xa ku tshika ku gembula. U ri: “A swi nga olovi. Kambe endzhaku ka loko mina ni nuna wa mina hi sungule ku dyondzeriwa Bibele hi Timbhoni ta Yehovha, ndzi dyondze ku yisa nyingiso wa mina eka swilo leswi nga swa nkoka evuton’wini. Ndzi dyondze ku rhandza swilo leswi Xikwembu xi swi rhandzaka ni ku venga leswi xi swi vengaka, ku katsa ni tinxaka hinkwato ta makwanga. Ndzi hanya vutomi lebyi nga ni xikongomelo naswona ndzi tshama ndzi ri ni mali yo tala exipachini xa mina.”—Pisalema 97:10.
Na wena u nga kuma matimba ni vutlhari leswi lavekaka leswaku u kota ku papalata ku phasiwa hi ku gembula, hi ku hlakulela ku va ni vuxaka na Yehovha Xikwembu. Sweswo swi ta antswisa xiyimo xa wena xa timali, ndlela leyi u titwaka ha yona ni vumoya bya wena. Kutani u ta tsakela ku vona ku hetiseka ka marito lama tsariweke eka Swivuriso 10:22, lama nge: “Nkateko wa Yehovha—hi wona lowu fuwisaka, naswona a nga engeteli ku vaviseka eka wona.”
[Marito lama tshahiweke exihlokweni lama nga eka tluka 11]
Makwanga a ma dlayi mahanyelo ya vanhu ntsena; ma nga dlaya ni vumoya byi fa nyaa!
[Bokisi/Swifaniso leswi nga eka tluka 9]
Ku Gembula Ni Matimba Ya Moya
Eka xiviko lexi valavisisi va Yunivhesiti ya Duke va xi rhumeleke eka National Gambling Impact Study Commission, va kombise leswaku ndlela leyi ku gembula ku navetisiwaka ha yona ku fambisana ngopfu ni vudimona. Xiviko lexi xi ri: “Swinavetiso swo tala swa [ti-lotto] swi kucetela ku rhandza swilo leswi vonakaka hi ku kongoma . . . A hi swilo leswi vonaka leswi munhu a swi kumaka hi ku kulula a n’watseka kambe i swa ku kumiwa hi masalamusi, lama sekeriweke eka ntshembo ni milorho ya vukholwa-hava. Naswona muungameri un’wana ni un’wana wa lotto, wa swi tiva leswaku vanhu vo tala lava rhandzaka ku beja emichinini ya yena va ni swilo swa vona vini swa vukholwa-hava leswi va swi tshembeke, tichati leti tirhisiwaka ku vhumbha, tin’anga, ni ‘tibuku leti hlamuselaka milorho’ leti va ti rhandzaka, leti xaxametaka tinomboro leti yelanaka ni mavito, masiku ni milorho. Ematshan’weni ya leswaku vaseketeri va ti-lotto va kandziyisa leswaku nomboro yin’wana ni yin’wana yi nga hlawuriwa loko ku tlangiwa nileswaku ku tlanga hi nomboro leyi mutlangi a yi toloveleke swi nga endla leswaku a dyiwa, va khutaza vatlangi leswaku va tirhisa (va tlhela va namarhela) tinomboro leti vona vini va vonaka leswaku ti vula swo karhi eka vona.”
[Swifaniso leswi nga eka tluka 10]
“Rirhandzu ra mina eka Yehovha ri ndzi nyike xivindzi xa ku tshika ku gembula.”—John
“Ndzi hanya vutomi lebyi nga ni xikongomelo naswona ndzi tshama ndzi ri ni mali yo tala exipachini xa mina.”—Linda
[Swifaniso leswi nga eka tluka 10]
“Lexi ndzi hlamariseke, a ndzi tshikanga ku gembula ntsena kambe a ndzi nga ha lavi ni ku twa nchumu hi kona.”—Kazushige