Langutelo Ra Bibele

Swikhongelo Leswi Xikwembu Xi Swi Yingisaka

“Hambetani mi kombela, mi ta nyikiwa; hambetani mi lava, mi ta swi kuma; hambetani mi gongondza, mi ta pfuleriwa. Hikuva un’wana ni un’wana la kombelaka wa nyikiwa, naswona un’wana ni un’wana la lavaka wa swi kuma, naswona un’wana ni un’wana la gongondzaka u ta pfuleriwa.”—LUKA 11:9, 10.

HIKWALAHO ka leswi Vakreste vo tala va ma tshembaka hi ku helela marito ya Yesu Kreste lama tshahiweke laha henhla, va khongela eka Xikwembu, va xi byela swiphiqo ni swilo leswi swi va karhataka, va ri ni ntshembo wa leswaku xa va rhandza naswona xa khathala ha vona. Kambe, van’wana va pfilunganyeka loko va ha rindzele leswaku swikhongelo swa vona swi hlamuriwa. Xana u vona onge swikhongelo swa wena swi helela emoyeni ntsena? Xana Xikwembu xa yingisa loko u khongela?

Hambiloko swi vonaka onge swikhongelo swa hina a swi hlamuriwi, leswi a swi vuli leswaku Xikwembu a xi swi twanga. Bibele ya hi tiyisekisa: “Mahlo ya Yehovha ma le ka lavo lulama, naswona tindleve ta yena ti yingisela swikombelo swa vona.” (1 Petro 3:12) Kutani, Yehovha Xikwembu wa swi twa swikhongelo swa lavo lulama, ku nga khathariseki leswaku va swi vula hi nomu kumbe va swi vula hi mbilu. (Yeremiya 17:10) Yehovha u tlhela a kambisisa miehleketo ni mintlhaveko ya munhu un’wana ni un’wana la khongelaka, leyi swi nga ha endlekaka leswaku hambi ku ri yena la khongelaka a nga yi twisisi kumbe ku yi xiya.— Varhoma 8:26, 27.

Hambiswiritano, swikhongelo swi fanele swi hlangavetana ni swilaveko swo karhi, hi kona Xikwembu xi nga ta swi amukela. Xo sungula, swi fanele swi kongomisiwa eka Xikwembu ntsena—ku nga ri eka Yesu, eka “mukwetsimi,” kumbe eka xifaniso xo karhi. (Eksoda 20:4, 5) Swikhongelo swi fanele swi kongomisiwa ni hi vito ra N’wana wa Xikwembu, ku nga Yesu Kreste. (Yohane 14:6) Xana leswi swi vula leswaku swikhongelo swa hina swi twiwa hi Yesu ku sungula kutani ku va yena a hundziselaka rungula ra kona eka Xikwembu? Doo! Kambe, loko hi khongela eka Yehovha hi vito ra Yesu, hi kombisa leswaku hi vadyondzisiwa va Kreste naswona ha pfumela leswaku hi kota ku tshinela eka Xikwembu hikwalaho ka gandzelo rakwe ntsena.—Vaheveru 4:14-16.

Munhu la khongelaka u fanele a va ni ripfumelo. Muapostola Pawulo u te: “Handle ka ripfumelo a swi koteki ku xi tsakisa kahle [Xikwembu], hikuva la tshinelelaka Xikwembu u fanele a kholwa leswaku xi kona ni leswaku hi xona muhakeri wa lava va xi lavaka hi mbilu hinkwayo.” (Vaheveru 11:6) Munhu u swi tivisa ku yini leswaku u ni ripfumelo leri faneleke? Yakobo, mutsari wa Bibele wa hlamula: “Ndzi ta ku komba ripfumelo ra mina hi mintirho ya mina.” (Yakobo 2:18) Ina, ripfumelo ri humesa mintirho, naswona mintirho yoleyo ya kombisa leswaku hi rhandza Xikwembu naswona hi ringeta ku xi tsakisa.

Vagandzeri va Xikwembu a va fanelanga va rhutela exikhongelweni. Yesu u swi veke erivaleni eka Luka 11:9, 10, leyi tshahiweke eku sunguleni. Phela, loko munhu a khongela kan’we ntsena hi mhaka yo karhi, xana sweswo a swi kombisi swona leswaku xikombelo xakwe a xi humi embilwini?

Leswi Xikwembu Xi Swi Tshembiseke

Hambiloko hi khongela hi ku phindha-phindha naswona swikhongelo swa hina swi huma embilwini, ha ha hanya “[eminkarhini] ya mangava leyi swi nonon’hwaka ku langutana na yona.” (2 Timotiya 3:1) Hambileswi ku nga ntiyiso leswaku Yesu u vule leswaku valandzeri vakwe va fanele va tsaka, kambe a nga vulanga leswaku a va nge vi na swiphiqo evuton’wini. (Matewu 5:3-11) Nilokoswiritano, u vurile leswaku vadyondzisiwa vakwe va ta tsaka hambiloko va rila, va sika, va ri ni torha kumbe va xanisiwa.

Ntsako lowu Yesu a vulavuleke ha wona a wu tisiwi hi swiyimo leswinene leswi hi nga tikumaka hi ri eka swona. Kambe, wu tisiwa hi ku eneriseka ka le ndzeni loku hi nga na kona hileswi hi tirhelaka Xikwembu. Hikwalaho, hi nga ha va ni ntsako hi mpimo wo karhi hambiloko hi ri ni swiphiqo.— 2 Vakorinto 12:7-10.

Ku Langutana Ni Swiphiqo Swa Wena N’wini

Kutani, xana i swa hava ku khongela eka Xikwembu malunghana ni timhaka ta wena n’wini to kota ku kuma munghana wa vukati la fanelekaka kumbe swiphiqo swa ndyangu, swa rihanyo kumbe swa ntirho? Doo, hikuva hambileswi Xikwembu xi nga hi tshembisiki leswaku xi ta cinca swiyimo leswi hi langutaneke na swona evuton’wini hi hlori, kambe xi ta hi nyika vutlhari bya ku langutana na swona. Yakobo u tsale leswi malunghana ni miringo: “Loko mani na mani eka n’wina a kayivela vutlhari, a a hambete a kombela eka Xikwembu, hikuva xi nyika hinkwavo hi mbilu yo basa, handle ka ku sandza; kutani u ta nyikiwa byona.” (Yakobo 1:5) Hikwalaho, Yehovha u ta hi kongomisa hi ku tirhisa moya wakwe lowo kwetsima. Leswi swi ta hi pfuna leswaku hi twisisa hi tlhela hi tirhisa misinya ya milawu ya Bibele loko hi endla swiboho.

Ina, moya wa Xikwembu a wu hi endleli swiboho. Kambe, hi fanele hi endla matshalatshala yo karhi. Hi xikombiso, loko hi ri ni xiphiqo, xana ha lava ku tiva leswaku xi vangiwe hi yini ni ku kambela swiyimo hinkwaswo leswi khumbekaka? Hi ku endla tano, hi ta va hi kombisa Xikwembu leswaku hi ni ripfumelo. (Yakobo 2:18) Xana hi ringete hi ku phindha-phindha ku tlhantlha xiphiqo xa hina, hi ya emahlweni hi kombela Xikwembu leswaku xi hi kongomisa? (Matewu 7:7, 8) Xana hi kambisise misinya ya milawu ya Bibele leyi tirhaka exiyin’weni xexo? Rito ra Xikwembu ri nga endla leswaku hi “faneleka hi ku helela, [hi] hlomisiwa hi ku helela eka ntirho wun’wana ni wun’wana lowunene.”—2 Timotiya 3:16, 17.

Hambileswi ku nga ntiyiso leswaku Xikwembu xa swi kota ku nghenelela etimhakeni ta vanhu ni ku susa swiphiqo swa hina hinkwaswo, xi hi tshikile leswaku hi tirhisa ntshunxeko lowu hi nga na wona. Khombo ra kona, van’wana va tirhise ntshunxeko wa vona leswaku va vavisa van’wana. Hikwalaho, swiphiqo swin’wana leswi hi khongelaka ha swona swi nga ha ya emahlweni kukondza ku fika misava leyintshwa ya Xikwembu. (Mintirho 17:30, 31) Swi nga ha endleka ku ri ni xiyimo lexi nga endhawini leyi hi tshamaka eka yona, ku fana ni vugevenga kumbe nyimpi; kumbe swi nga ha katsa ku tiyiselela maxangu lama tisiwaka hi vakaneti. (1 Petro 4:4) Hi fanele hi pfumela leswaku emisaveni leyi yi nga xi chaviki Xikwembu, swiyimo swin’wana a swi nge lunghi.

Nilokoswiritano, Xikwembu xa va rhandza vagandzeri va xona naswona xi lava ku va pfuna. Loko Mfumo wa xona wu ta va wu fuma wu ri woxe emisaveni, xi ta susa swiphiqo hinkwaswo emisaveni leyi. (Nhlavutelo 21:3, 4) Kukondza nkarhi wolowo wu fika, hi fanele hi kombela nkongomiso wa xona hi ku phindha-phindha loko hi langutane ni swiphiqo evuton’wini. Loko hi endla tano, hi nga tiyiseka leswaku Yehovha u ta hetisa xitshembiso lexi tsariweke eBibeleni eka Esaya 41:10: “U nga chavi, hikuva ndzi na wena. U nga languti ematlhelweni, hikuva mina ndzi Xikwembu xa wena. Ndzi ta ku nyika matimba. Kunene ndzi ta ku pfuna. Kunene ndzi ta ku khoma swi tiya hi voko ra mina ra xinene ra ku lulama.”