Langutelo Ra Bibele

Xana Xikwembu Xa Ku Honisa Ku Tsana Ka Hina?

‘A ndzi hombolokanga! Ndzi ringete hi matimba leswaku ndzi fularhela tindlela ta mina leto biha, kambe ndzi tsanile swinene!’

XANA marito lawa ma kombisa ndlela leyi wena kumbe un’wana loyi u n’wi tivaka a titwaka ha yona? Vanhu vo tala va vona onge a va nge swi koti ku hlula mahanyelo ya vona yo biha lawa se ma mileke timitsu. Van’wana se va hanya hi byalwa, fole kumbe swidzidzirisi. Kasi vanhu van’wana vo tala va hanya hi makwanga. Naswona ku ni lava va hanyaka hi vuoswi, va vulaka leswaku ku hava lexi va nga xi endlaka.

Hilaha swi kombisiweke hakona eka Matewu 26:41, Yesu u kombise hi musa leswaku wa ku twisisa ku tsana ka vanhu.a Entiyisweni, hinkwaswo leswi Bibele yi swi vulaka swi kombisa kahle leswaku Yehovha Xikwembu na Yesu va ni musa eka vanhu. (Pisalema 103:8, 9) Kambe, xana hi fanele hi rindzela leswaku Xikwembu xi honisa ku tsana ka hina hinkwako?

Muxe Na Davhida

Kambisisa rungula leri vulavulaka hi Muxe. A a tiveka “a a rhule ku tlula vanhu hinkwavo lava a va ri ehenhla ka vuandlalo bya misava,” naswona a a lwela ku hlayisa mfanelo yoleyo leyinene. (Tinhlayo 12:3) Loko Vaisrayele va ri karhi va famba emananga, a va tala ku endla swilo leswi nga fanelangiki naswona va delela Xikwembu ni vayimeri va xona. Minkarhi hinkwayo, Muxe a a lava nkongomiso wa Xikwembu hi ku titsongahata.—Tinhlayo 16:12-14, 28-30.

Kambe, loko riendzo leri ro leha, leri a ri karharisa ri ri ekusuhi ni ku hela, u hlundzukele tiko hinkwaro kutani a tlula swileriso swa Xikwembu. Xikwembu xi n’wi rivalerile, kambe, xana xi xi honisile xiendlo xexo? Doo! Xi byele Muxe xi ku: ‘Hikwalaho ka leswi u nga pfumelangiki eka mina . . . , a wu nge yi nghenisi nhlengeletano leyi etikweni leri kunene ndzi nga ta ri nyika yona.’ Muxe a a nga ta nghena eTikweni ra Xitshembiso. Endzhaku ko lwa hi matimba malembe ya 40 leswaku a kuma lunghelo rero, xihoxo xakwe lexikulu xi endle leswaku a lahlekeriwa hi rona.—Tinhlayo 20:7-12.

Hosi Davhida a a ri un’wana wa vavanuna lava chavaka Xikwembu, kambe va tsaneke. U pfumele ku lawuriwa hi ku navela kakwe kutani a etlela ni nsati wa nuna un’wana. Kutani u ringete ku banga manyala wolawo hi ku endla leswaku nuna wa yena a dlayiwa. (2 Samuwele 11:2-27) Endzhaku ka nkarhi, u tisole ngopfu hi leswi a swi endleke, kutani Xikwembu xi n’wi rivalela. Kambe Davhida a a herise ndyangu wolowo, naswona Yehovha a nga n’wi sirhelelanga eka makhombo lama landzeleke. N’wana wa Davhida u vabye ngopfu, naswona Yehovha a nga n’wi pfunanga hambileswi Davhida a khongeleleke n’wana wakwe. N’wana yoloye u file, kutani ku landzele makhombo yo tala endlwini ya Davhida. (2 Samuwele 12:13-18; 18:33) Davhida u langutane ni swiyimo swo tika swinene hikwalaho ko pfumela ku lawuriwa hi ku tsana kakwe emhakeni ya mahanyelo.

Swikombiso leswi swi komba leswaku Xikwembu xi lava leswaku vanhu va langutana ni vuyelo bya ku tikhoma ka vona. Lava va lavaka ku xi tirhela va fanele va antswisa laha va tsaneke kona hi tlhelo ra moya kutani va va Vakreste vo antswa. Vo tala va endle tano eka lembe-xidzana ro sungula.

Nyimpi Yo Lwa Ni Swiendlo Swa Vudyoho

Hilaha ku faneleke, muapostola Pawulo u tekiwa a ri xikombiso xa mahanyelo ya Vukreste. Kambe, xana a wu swi tiva leswaku a a tshamela ku lwa ni ku tsana kakwe? Varhoma 7:18-25 yi yi hlamusela kahle nyimpi leyi, kumbe, ku ‘lwa’ hi ku ya hi ndzimana 23. Pawulo a a nga karhali enyimpini leyi, hikuva a a swi tiva leswaku xidyoho xi ni matimba.—1 Vakorinto 9:26, 27.

Swirho swin’wana swa vandlha ra Vukreste ra le Korinto wa khale swi tshame swi hanya hi ku endla swilo swo biha. Bibele yi vula leswaku eku sunguleni a swi ri ‘timbhisa, vaoswi, vavanuna lava etlelaka ni vavanuna-kulobye, makhamba, vanhu va makwanga ni swidakwa.’ Kambe yi tlhela yi vula leswaku swi ‘hlantswiwile swi basa.’ (1 Vakorinto 6:9-11) Njhani? Swi tiyisiwe hi vutivi lebyi kongomeke, vunakulobye bya Vukreste ni moya wa Xikwembu leswaku swi tshika mikhuva ya swona yo biha. Eku heteleleni, Xikwembu xi swi vule leswi lulameke hi vito ra Kreste. Ina, Xikwembu xi swi rivalerile, xisweswo swi va ni ripfalo leri tengeke.—Mintirho 2:38; 3:19.

Pawulo ni Vakreste va le Korinto a va wu tekelanga ehansi mboyamelo wa vona wa vudyoho. Ematshan’weni ya sweswo, va lwe na wona, naswona hi mpfuno wa Xikwembu va hlurile. Vagandzeri volavo va lembe-xidzana ro sungula va kale va bumabumeriwa hikwalaho ka mahanyelo ya vona lamanene, hambileswi a va hanya exikarhi ka vanhu vo biha naswona a va nga hetisekanga. Ku vuriwa yini hi hina?

Xikwembu Xi Langutele Leswaku Hi Lwa Ni Ku Tsana Ka Hina

Ku lwa ni ku tsana ka hina a swi vuli ku ku herisa hi ku helela. A hi fanelanga hi pfumela ku lawuriwa hi ku nga hetiseki ka hina hambileswi ku nga ta tshama ku ri kona. Ku vanga ku tsana loku ku nga ha tshamelaka ku hi endlisa swihoxo. Kambe, a hi fanelanga hi pfumela leswaku ku tsana ka hina ku hi lawula. (Pisalema 119:11) Ha yini swi ri swa nkoka swonghasi?

Hikuva Xikwembu a xi pfumeli leswaku hi tama hi vhika hi ku nga hetiseki loko hi endla swo biha. (Yudha 4) Yehovha u lava leswaku vanhu va basisa vutomi bya vona, va va ni mahanyelo lamanene. Bibele yi ri: “Nyenyani leswi hombolokeke.” (Varhoma 12:9) Ha yini Xikwembu xi venga mahanyelo yo biha hi ndlela leyi?

Xivangelo xin’wana hileswaku ku lawuriwa hi ku tsana ka hina swi ni khombo. Eka Vagalatiya 6:7, Bibele yi ri: “Xin’wana ni xin’wana lexi munhu a xi byalaka, u ta tlhela a tshovela xona.” Lava va pfumelaka ku godzomberiwa hi swilo swo hambana-hambana, va lawuriwaka hi makwanga naswona va hanyaka hi vunghwavava, hakanyingi va vaviseka evuton’wini bya vona. Kambe ku ni xivangelo xin’wana xa nkoka swinene.

Loko hi endla swo biha, hi dyohela Xikwembu. Xidyoho xi endla leswaku hi “avana” na Yehovha. (Esaya 59:2) Tanihi leswi a nga va rhandziki lava hanyaka hi xidyoho, wa va khongotela vanhu volavo: “Tihlantsweni; tibasiseni; . . . tshikani ku endla leswo biha.”—Esaya 1:16.

Muvumbi wa hina u ni rirhandzu ni musa. ‘A nga naveli leswaku ku lova ni un’we kambe u navela leswaku hinkwerhu hi hundzuka.’ (2 Petro 3:9) Loko hi tshamela ku lawuriwa hi ku tsana ka hina, a hi nge swi koti ku kuma musa wa Xikwembu. Leswi Xikwembu xi nga ku honisiki ku tsana ka hina, na hina a hi fanelanga hi ku honisa.

[Nhlamuselo ya le hansi]