Langutelo Ra Bibele

Xana Swi Vula Yini Ku Rhandza Swilo Leswi Vonakaka?

VANHU va tswariwa va ri ni vuswikoti byo rhandza swilo swa moya swin’we ni ku navela ku gandzela Xikwembu. Hambiswiritano, munhu u vumbiwe hi swilo leswi vonakaka naswona u ni xilaveko xa swilo leswi vonakaka swin’we ni vuswikoti byo tsakela swilo leswi vonakaka. Vakreste van’wana va ni rifuwo lerikulu ra swilo leswi vonakaka. Xana leswi hi swoxe i xikombiso xa leswaku va rhandza swilo leswi vonakaka nileswaku va tsanile emoyeni? Xana leswi swi vula leswaku lava va nga swisiwana a va tali ku rhandza swilo leswi vonakaka kambe va tala ku rhandza swilo swa moya?

Kunene wa pfumela leswaku ku rhandza swilo leswi vonakaka a swi vuli ku va la fuweke kumbe ku va ni swilo swo tala ntsena, kambe swi katsa ni swin’wana. Xiya swikombiso leswi landzelaka leswi kumekaka eBibeleni, leswi kombisaka leswaku ku rhandza swilo leswi vonakaka swi vula yini swin’we ni ndlela yo papalata makhombo lawa ku rhandza swilo leswi vonakaka ku nga na wona eka vumoya bya munhu.

A Va Ri Ni Rifuwo Naswona A Va Amukeleka Eka Xikwembu

Malandza man’wana ya Xikwembu, yo tshembeka, ya le minkarhini ya Bibele, a ma fuwile ma naswona a ma amukeleka eka Xikwembu. Hi xikombiso, Abrahama “a a ri ni mintlhambi yo tala ya swifuwo ni silivhere ni nsuku.” (Genesa 13:2) Yobo a a tiviwa tanihi “lonkulu ngopfu eka vanhu hinkwavo va le Vuxeni” hikwalaho ka leswi a a ri ni swifuwo swo tala ni malandza yo tala. (Yobo 1:3) Tihosi ta Israyele to tanihi Davhida na Solomoni, a ti ri ni rifuwo ro tala.—1 Tikronika 29:1-5; 2 Tikronika 1:11, 12; Eklesiasta 2:4-9.

Ni le ka lembe-xidzana ro sungula, a ku ri ni Vakreste lava fuweke evandlheni. (1 Timotiya 6:17) Ku vuriwa leswaku Lidiya a a ri “muxavisi wa swilo swa xivunguvungu, wa muti wa Tiyatira la nga mugandzeri wa Xikwembu.” (Mintirho 16:14) Dayi ya xivunguvungu swin’we ni tinguvu leti pendiweke ha yona a swi durha naswona hi ntolovelo a swi vekeriwa vanhu lava xiximekaka kumbe lava fuweke. Xisweswo, swi nga ha endleka leswaku Lidiya a a fuwile hi mpimo wo karhi.

Hi hala tlhelo, vagandzeri van’wana va Yehovha vo tshembeka va le minkarhini ya Bibele a va ri swisiwana leswikulu. Makhombo ya ntumbuluko, timhangu ni rifu a swi endla leswaku mindyangu yo tala yi va swisiwana. (Eklesiasta 9:11, 12) Swi nga ha endleka leswaku a ku ri ndzingo lowukulu eka lava a va pfumala, ku vona van’wana swi va fambela kahle hi tlhelo ra swilo leswi vonakaka! Hambiswiritano, a swi ta va swi hoxile ku vula leswaku lava va fuweke va rhandza swilo leswi vonakaka kumbe leswaku lava va nga swisiwana hi vona va tirhelaka Xikwembu hi xitalo. Ha yini? Ehleketa hi leswi ku rhandza swilo leswi vonakaka swi vulaka swona.

Ku Rhandza Mali

Xihlamusela-marito xin’wana xi hlamusela rito leri nge ku rhandza swilo leswi vonakaka tanihi “ku tshamela ku anakanya kumbe ku hlongorisa swilo leswi vonakaka ematshan’weni yo anakanya kumbe ku landzela swilo swa moya.” Hikwalaho, ku rhandza swilo leswi vonakaka swi vangiwa hi ku navela ka hina, swilo leswi hi swi rhangisaka evuton’wini ni tipakani ta hina. Swikombiso swimbirhi leswi landzelaka leswi humaka eBibeleni swi yi kombisa kahle mhaka leyi.

Yehovha u n’wi nyike ndzayo ya matimba Baruku loyi a a ri matsalana wa muprofeta Yeremiya. Swi nga ha endleka leswaku Baruku a a ri xisiwana hikwalaho ka swiyimo swa le Yerusalema ni hileswi a a ri munghana wa Yeremiya loyi a a nga rhandziwi. Hambiswiritano, Yehovha u te: “Kambe loko ku ri wena, u tshamela ku lava swilo leswikulu. U nga tshameli ku swi lava.” Swi nga ha endleka leswaku Baruku a a sungule ku rhandza swilo leswi vonakaka, a a tshamela ku anakanya hi rifuwo ni swilo leswi vonakaka leswi van’wana va nga na swona. Yehovha u tsundzuxe Baruku leswaku U ta n’wi kutsula ekhombyeni leri a ri ta wela Yerusalema kambe A vula leswaku a nge yi sirheleli nhundzu yakwe.—Yeremiya 45:4, 5.

Yesu u nyikele xifaniso xa wanuna loyi na yena a a tshamela ku anakanya hi swilo leswi vonakaka. Wanuna loyi a a veke mbilu yakwe eka swilo leswi vonakaka ematshan’weni yo tirhisa leswi a nga na swona leswaku a ndlandlamuxa vutirheli byakwe eka Xikwembu. Wanuna loyi wo fuma u te: “Ndzi ta hirimuxa switlati swa mina, ndzi aka leswikulunyana, . . . kutani ndzi ta byela moya-xiviri wa mina ndzi ku: ‘Wena moya-xiviri, u ni swilo swo tala leswinene leswi hlayisiweke malembe yo tala; humula, u dya, u nwa, u tiphina.’” Kutani Yesu a ku: “Kambe Xikwembu xi ku eka yena, ‘Wena loyi a nga anakanyiki, vusiku byolebyi va lava moya-xiviri wa wena eka wena. Kutani, i mani loyi a nga ta kuma swilo leswi u swi hlayiseke?’ Swi tano hi munhu loyi a tihlengeletelaka xuma kambe a nga fuwanga eka Xikwembu.”—Luka 12:16-21.

Xana hi dyondza yini eka swiendlakalo leswi swimbirhi? Swi hi endla hi vona leswaku ku rhandza swilo leswi vonakaka, a hi swona leswaku munhu u ni swilo swo tanihi kwihi, kambe i ku rhangisa swilo leswi vonakaka emahlweni. Muapostola Pawulo u te: “Lava tiyimiseleke ku fuwa va wela endzingweni ni le ntlhan’wini ni le ku naveleni ko tala ka vuhunguki ni loku vavisaka, loku nghenisaka vanhu endzovisweni ni le ku onhakeni. Hikuva ku rhandza mali i rimitsu ra mixaka hinkwayo ya swilo swo biha, naswona hi ku lwela ku fikelela rirhandzu leri, van’wana va lahlekisiwile eripfumelweni naswona va titlhave hinkwako-nkwako hi switlhavi swo tala.” (1 Timotiya 6:9, 10) Xiphiqo i ku tiyimisela ku va xigwili ni ku rhandza swilo leswi vonakaka.

Ku Tikambela Swa Laveka

Vakreste va fanele va va ni vuxiya-xiya byo papalata ku phasiwa hi ku rhandza swilo leswi vonakaka ku nga khathariseki leswaku va fuwile kumbe e-e. Matimba ya ku rhandza rifuwo ma kanganyisa naswona ma nga ku vavisa emoyeni. (Matewu 13:22) Hi nga ha tikuma hi fularhele swilo swa moya kutani hi hlongorisa swilo leswi vonakaka hi nga swi xiyanga, kutani hi langutana ni vuyelo byo biha.—Swivuriso 28:20; Eklesiasta 5:10.

Hikwalaho, Vakreste va fanele va kambisisa leswaku i yini leswi va swi rhangisaka evuton’wini bya vona. Ku nga khathariseki leswaku munhu u fumile kumbe a nga fumanga, munhu wa moya u endla matshalatshala yo landzela xikhutazo xa Pawulo xo ka a nga veki ntshembo wa yena “erifuweni leri nga tiyangiki, kambe [a] wu veka eka Xikwembu, lexi hi nyikaka swilo hinkwaswo hilaha ku fuweke leswaku hi tiphina.”—1 Timotiya 6:17-19.