Ku Tiyimisela Ku Fuwa eMoyeni

SWI lava matshalatshala ni ku tinyiketela lokukulu leswaku munhu a va ni rifuwo. Swi tano ni hi ku fuwa emoyeni. Hi swona leswi Yesu a a vula swona loko a ku: “Tihlayiseleni xuma etilweni.” (Matewu 6:20) Rifuwo ra moya a ri titeli. Ku va xirho xa vukhongeri byo karhi ntsena a swi nge ku fuwisi hi tlhelo ra moya tanihi leswi ku va ni akhawunti ebanki swi nga ku endliki leswaku u va n’wankumi. Ku hlakulela vuxaka lebyikulu ni Xikwembu, ku va munhu wa moya ni ku fuwa hi timfanelo ta moya swi lava ku tiyimisela, nkarhi, ku tinyiketela ni ku titsona swo karhi.—Swivuriso 2:1-6.

Xana U Nga Va Na Swona Haswimbirhi?

Xana munhu a nga swi kota ku kuma rifuwo ra moya ni ra nyama? Kumbexana, u ta tinyiketela ngopfu eka rin’we. Yesu u te: “A mi nge vi hlonga ra Xikwembu ni ra Rifuwo.” (Matewu 6:24b) Ha yini? Hikuva a ku na vuxaka exikarhi ka rifuwo ra moya ni ra nyama. Swa lwisana. Hikwalaho, loko Yesu a nga si byela vadyondzisiwa vakwe leswaku va hlengeleta rifuwo ra moya, u te: “Tshikani ku tihlayisela xuma emisaveni.”—Matewu 6:19.

Loko munhu a honisa ndzayo ya Yesu naswona a ringeta ku kuma rifuwo ra moya ni ra nyama, ku ta endleka yini? Yesu u te: “Ku hava loyi a nga vaka hlonga ra tihosi timbirhi; hikuva u ta venga yin’wana a rhandza leyin’wana, kumbe u ta namarhela yin’wana a yi langutela ehansi leyin’wana.” (Matewu 6:24a) Loko munhu a swi hlongorisa haswimbirhi, hambiloko a swi vona leswaku u ni vutihlamuleri bya ku khathalela swilo swa moya, kutani swi nga ha n’wi siringa hikuva minkarhi hinkwayo swi nga vonaka swi n’wi kavanyeta. Ematshan’weni yo tshemba Xikwembu, munhu a nga ha tshemba mali ni leswi yi nga kotaka ku swi xava, a ehleketa leswaku hi swona swi nga ta n’wi pfuna ku langutana ni swiphiqo swa vutomi. Yesu a a tiyisile loko a ku: “Laha xuma xa wena xi nga kona, hi laha ni mbilu ya wena yi nga ta va kona.”—Matewu 6:21.

Mukreste ha un’we u fanele a kambisisa ndzayo yoleyo ya Bibele a nga si endla xiboho xa leswaku nkarhi, vutlhari ni mbilu yakwe u ta swi veka kwihi. Mhaka ya leswaku Xikwembu a xi vekanga xipimelo xa leswaku Mukreste a nga hlengeleta rifuwo ro tarisa ku yini, a yi vuli swona leswaku munhu a nge xupuriwi loko a honisa swilemukiso swa xona malunghana ni makwanga. (1 Vakorinto 6:9, 10) Lava va honisaka ndzayo ya Bibele naswona va tiyimiseleke ku fuwa va xaniseka hi tlhelo ra moya, va karhateka emianakanyweni ni le mbilwini, hilaha hi swi voneke hakona. (Vagalatiya 6:7) Kambe, Yesu u vule leswaku lava va khathalelaka swilaveko swa vona swa moya va ta tsaka. (Matewu 5:3) Swi lo dla, leswaku Muvumbi wa hina ni N’wana wakwe va swi tiva leswi endlaka munhu a tsaka ni ku titwa a hlayisekile!—Esaya 48:17, 18.

Xiboho Lexi U Nga Taka U Nga Tisoli Ha Xona

Xana u ta hlawula yini, Xikwembu kumbe rifuwo? I ntiyiso leswaku hi fanele hi khathalela swilaveko swa hina swa nyama. Epapileni rakwe leri yaka eka Timotiya, muapostola Pawulo u te: “Hakunene, loko munhu a nga va wundli lava nga va ka vona, ngopfu-ngopfu lava nga swirho swa ndyangu wakwe, u landzule ripfumelo naswona u bihe ngopfu ku tlula munhu la nga riki na ripfumelo.” Pawulo u tlhele a khutaza Vakreste leswaku va nga veki ntshembo wa vona emalini, kambe a va wu veke eka Xikwembu naswona “va fuwa hi mintirho leyinene.” (1 Timotiya 5:8; 6:17, 18) Xana u ta hlawula yini? Xana u ta hanyela yini? Ntirho lowukulu exikarhi ka mintirho leyi Pawulo a kombeteleke eka yona i ntirho wa ku chumayela ni ku endla vadyondzisiwa lowu Yesu a wu nyikeke vadyondzisiwa vakwe leswaku va wu endla. (Matewu 28:19, 20) Loko Vakreste va olovisa vutomi bya vona hi ku tirhandzela, ku nga ri leswaku va ta tiphina hi vutomi, kambe leswaku va ta hlanganyela hi xitalo entirhweni lowu wa nkoka, va “tivekela hi ku hlayiseka masungulo lamanene ya nkarhi lowu taka” emisaveni leyintshwa leyi tshembisiweke ya Xikwembu. Hambi ku ri sweswi, va kuma leswaku rifuwo rero ra moya ra “antswa swinene ku tlula ku kuma nsuku!”—1 Timotiya 6:19; Swivuriso 16:16; Vafilipiya 1:10.

Ehleketa hi xikombiso xa Eddie, loyi ndyangu wa ka vona wu veke Timbhoni ta Yehovha a ha ri ntsongo. Ndyangu wa ka vona wu tshame wu lahlekeriwa hi nhundzu ya wona naswona wu hlongoriwile endlwini ya wona. Eddie wa hlamusela: “A ndzi tshama ndzi ri karhi ndzi tivutisa leswaku ku ta humelela yini loko ho lahlekeriwa hi hinkwaswo leswi hi nga na swona. Phela, hi nkarhi wolowo a hi nga ri na nchumu. Xana wa swi tiva leswaku ku endleke yini? Ku hava xo biha lexi endlekeke! A hi ri na swona swakudya, swakunwa ni swiambalo. Yehovha u hi nyikile, naswona hi ku famba ka nkarhi, hi tlhele hi kuma swilo leswi hi lahlekeleke. Ntokoto lowu wu ndzi dyondzise ku tshemba xitshembiso xa Yesu lexi kumekaka eka Matewu 6:33—leswaku loko hi rhangisa Mfumo wa Xikwembu evuton’wini bya hina, a hi fanelanga hi karhateka hi swilaveko swa hina swa nyama.” Namuntlha, Eddie u tirha tanihi mutirheli wa nkarhi hinkwawo la endzelaka mavandlha, a ri karhi a famba ni nghamu. Va na swona swilo leswi vonakaka leswi va swi lavaka. Kambe xa nkoka ngopfu, va fuwile hi tlhelo ra moya.

Vuyelo Lebyikulu Swinene

Ku hambana ni rifuwo ra laha misaveni, leri makhamba ma nga ha ri yivaka, rifuwo ra moya ri tshama hi masiku. (Swivuriso 23: 4, 5; Matewu 6:20) I ntiyiso leswaku swa tika ku pima nhluvuko wa moya. Swa tika ku vona mpimo lowu munhu a kuleke ha wona emhakeni ya rirhandzu, ntsako kumbe ripfumelo, a swi fani ni ku pima rifuwo ra nyama leri munhu a ri hlengeleteke. Kambe vuyelo bya rifuwo ra moya i byikulu swinene. Loko a vulavula hi vadyondzisiwa lava nga ta siya hambi ku ri tindlu ni masimu ni swilo leswi va tihanyisaka ha swona, leswaku va ta va ni nkarhi wa swilo swa moya, Yesu u te: “Ndzi tiyisile ndzi ri eka n’wina, A ku na munhu la siyeke yindlu kumbe vamakwavo va xinuna kumbe vamakwavo va xisati kumbe manana kumbe tatana kumbe vana kumbe masimu hikwalaho ka mina ni hikwalaho ka mahungu lamanene la nga ta ka a nga kumi hilaha ku phindhiweke ka 100 enkarhini lowu, tindlu ni vamakwavo va xinuna ni vamakwavo va xisati ni vamanana ni vana ni masimu, swin’we ni ku xanisiwa, kutani emafambiselweni lama taka ya swilo a kuma vutomi lebyi nga heriki.”—Marka 10:29, 30.

Xana wena u ta rhangisa yini evuton’wini bya wena? Xana u ta rhangisa Xikwembu kumbe rifuwo?

[Xifaniso lexi nga eka tluka 8]

Xana u hlongorisa rifuwo ra nyama . . .

. . . kumbe u lava ra moya?