U Ta Kuma Mikateko!
1. Ha yini u fanele u anakanya hi ku nghenela vuphayona bya nkarhi hinkwawo?
1 Xana u lava ntsako ni ku eneriseka evuton’wini bya wena? Xana wa wu kuma ntsako ni ku eneriseka loko u pfuna van’wana? Xana u navela ku endla leswi engetelekeke entirhweni wa Yehovha? Loko nhlamulo ya wena ku ri ina, eka swivutiso leswi nga laha henhla, u fanele u anakanya hi ku nghenela vuphayona bya nkarhi hinkwawo. I ntiyiso leswaku vutihlamuleri bya ndyangu ni vutihlamuleri byin’wana bya Matsalwa, kun’we ni rihanyo ni ku tsana ka miri swi fanele swi tekeriwa enhlokweni.
2. Boxa yin’wana ya mikateko ya moya leyi maphayona ya nkarhi hinkwawo ma yi kumaka.
2 Matsalwa ya Solomoni lama huhuteriweke ma fanisa mikateko ya Yehovha ni rifuwo. (Swiv. 10:22) Namuntlha mikateko ya Yehovha yi fambisana ngopfu ni rifuwo ra moya, naswona maphayona ya nkarhi hinkwawo ma yi kuma hi xitalo. Hi xikombiso, ma va ni ntsako swinene hikwalaho ka leswi ma ‘tixavelaka nkarhi’ wa wona vini leswaku ma pfuna vanhu van’wana. (Kol. 4:5; Mint. 20:35) Yehovha wa yi tlangela mintirho ya wona ya rirhandzu. ‘Xuma xolexo xa le tilweni’ a xi nge pfuki xi ve xa hava. (Mat. 6:20; Hev. 6:10) Ku tlula kwalaho, loko maphayona ma ri karhi ma hlayisa ‘tihlo ro olova’ ni ku tshembela eka Yehovha leswaku a ma nyika leswi ma swi pfumalaka, vuxaka bya wona na yena byi ya byi tiya.—Mat. 6:22, 25, 32; Hev. 13:5, 6.
3. Hi kwihi ku hambana loku nga kona exikarhi ka ku lava rifuwo ra moya ni ku hlongorisa rifuwo ra nyama?
3 Hakanyingi ku hlongorisa rifuwo swi hoxa munhu ‘entlhan’wini ni le ku naveleni ko tala ka vuhunguki ni loku vavisaka.’ (1 Tim. 6:9, 10; Yak. 5:1-3) A swi tano hi mikateko ya Yehovha. Leswi maphayona ya nkarhi hinkwawo ma hetaka nkarhi wa wona wo tala ma ri eku chumayeleni, sweswo swi ma pfuna leswaku ma tshama ma ri karhi ma ehleketa hi swilo swa nkoka. (Filp. 1:10) Makwerhu un’wana la nga tshika ntirho wakwe wa vunjhiniyara lowu a wu n’wi dyela nkarhi wo tala kutani a va phayona, u te: “Ntirho wa mina wo tihanyisa a wu ndzi vangela ntshikilelo. Kambe a swi tano hi vuphayona. Sweswi ndzi pfuna vanhu ni ku va dyondzisa ntiyiso. Ntirho lowu wa tsakisa naswona wa ndzi enerisa swinene.”
4. Xana maphayona ya nkarhi hinkwawo ma katekisiwa hi ndlela yihi loko na wona ma tisa mikateko eka van’wana?
4 Ku Va Nkateko Eka Van’wana: Namuntlha, un’wana ni un’wana u langutana ni “minkarhi ya mangava leyi swi nonon’hwaka ku langutana na yona.” (2 Tim. 3:1) Vanhu hinkwavo va lava loyi va nga tshembelaka eka yena leswaku a va pfuna. Hikwalaho, vahuweleri va Mfumo va tsaka loko va pfuna vanhu lava heleriweke hi ntshembo leswaku va dyondza ni ku amukela mahungu lamanene. Maphayona ya nkarhi hinkwawo ma tsaka swinene tanihi leswi ma hetaka tiawara to tlula 800 lembe ni lembe entirhweni wo ponisa vutomi!—1 Tim. 4:16.
5, 6. I yini lexi nga ku pfunaka leswaku u va phayona ra nkarhi hinkwawo?
5 Xana wa anakanya hi ku va phayona ya nkarhi hinkwawo? Loko swi ri tano, swi nga ha lava leswaku u “tixavela nkarhi lowunene” eka swilo leswi nga riki swa nkoka. (Efe. 5:15, 16) Vo tala va endle tano naswona va olovise vutomi bya vona, va hungute nkarhi lowu a va wu tirhisa entirhweni wo tihanyisa leswaku va ta heta nkarhi wo tala etimhakeni ta Mfumo. Xana u nga hlela swiyimo swa wena leswaku na wena u va phayona?
6 Kombela vutlhari eka Yehovha leswaku u va ni xiyimiso lexi u nga ta xi tirhisa. (Yak. 1:5) Hi yihi mikateko leyi u nga langutelaka ku yi kuma? U nga langutela ndzalo ya rifuwo ra moya! Nakambe Yehovha u ta ku khathalela hi tlhelo ra nyama. (Mat. 6:33) Lava va ringaka Yehovha emhakeni leyi va kuma “nkateko, kukondza ku nga ha pfumaleki nchumu.”—Mal. 3:10.