Xana Nyangwa Ya Vuphayona Yi Ku Pfulekerile Sweswi?
1 Ndzimana ya hina ya lembe ya 1999 yi hi tsundzuxa leswaku ha ha ri eka “siku ra ku ponisiwa” hi Yehovha. (2 Kor. 6:2) Kambe siku leri ra ku ponisiwa ri ta hela ku nga ri khale. Kutani ku ta sungula ‘siku ra yena ra ku avanyisa.’ (2 Pet. 2:9) Leswi Yehovha a ha yaka emahlweni a engetela nkarhi wa ku ponisa vanhu, swa tsakisa swinene ku vona nhlayo leyi engetelekeke ya vanhu lava angulaka kahle!
2 Vanhu va Yehovha va langutana na wona ntlhontlho wa ku fikelela vanhu lavanene nkarhi wu nga si hela. Eka vahuweleri vo tala va Mfumo, leswi swi vula ku nghenela ntirho wa vuphayona. Xana nyangwa ya vuphayona yi ku pfulekerile sweswi? Hikwalaho ka yini hi vutisa?
3 Marito Ya Ku Tlangela: Hilaha swi tivisiweke hakona eka Vutirheli Bya Hina Bya Mfumo bya January 1999, xilaveko xa tiawara eka maphayona ya nkarhi hinkwawo ni ya nkarhinyana ti hungutiwile. Maphayona ya nkarhi hinkwawo ma fanele ma heta tiawara ta 70 ma ri entirhweni wa nsimu n’hweti yin’wana ni yin’wana leswaku ma fikelela xilaveko lexi lexintshwa xa tiawara ta 840 eka lembe rin’wana ni rin’wana ra ntirho. Maphayona ya nkarhinyana ma ta heta tiawara ta 50 ma ri ensin’wini n’hweti yin’wana ni yin’wana. Hi lawa man’wana ya marito yo kombisa ku tlangela lama vuriweke endzhaku ka ku endliwa ka mindzulamiso leyi:
“Mawaku nyiko ya nkoka swonghasi leyi humaka eka Tata wa hina wa le tilweni!”
“A ndzi na wona marito yo phofula ntsako, rirhandzu ni ku tlangela loku ndzi nga na kona hi lunghiselelo leri!”
“Swi ta endla leswaku hi fikelela swiyimiso swa hina hi ku olova!”
“Onge vunyingi bya hina sweswi hi nga nghenela ntirho wo chumayela wa nkarhi hinkwawo ivi hi tiphina hi mikateko leyi tisiwaka hi ku tirhela Yehovha hi ndlela leyi nga riki na ku ringanisiwa.”
4 Leswi se hi tshinelaka eku chaputeni ka siku ra Xikwembu ra ku ponisiwa, swi le rivaleni leswaku Yehovha u lava leswaku vanhu vakwe va n’wi dzunisa swinene ro hetelela. Vukulu ni ntikelo wa rungula leri swi kurisiwa (1) hi ku engeteleka loku yaka emahlweni ka nhlayo ya vahuweleri va Mfumo ni (2) hi ku tiyimisela ka un’wana ni un’wana wa vona ku engetela leswi a kotaka ku swi endla eku chumayeleni hi Mfumo. Yehovha, hi yena la ‘kurisaka,’ u endla leswaku swilo swi famba kahle hi ku katekisa matshalatshala ya vanhu hinkwavo lava amukeleke ku ponisa ka yena.—1 Kor. 3:6, 7; Ps. 110:3.
5 U Nga Hupi Xikongomelo Xa Wona: Pawulo a a kombetela eka siku ra Yehovha ra ku ponisa loko a tsundzuxa Vakreste-kulobye a ku: “Leswi hi tirhaka na [Yehovha], ha mi kombela nakambe leswaku mi nga amukeli musa lowu nga faneriwiki wa Xikwembu kutani mi hupa xikongomelo xa wona.” A hi nge xi “hupi xikongomelo xa wona” loko hi wu teka wu ri ‘nkarhi lowu amukelekaka ngopfu-ngopfu’ wa ku tirhela ku ponisiwa ka van’wana nkarhi wun’wana ni wun’wana. (2 Kor. 6:1, 2) Namuntlha, i swa nkoka ngopfu leswaku marito ya Pawulo, ma tekeriwa enhlokweni. Vakreste va kombisa ku tlangela ka vona lunghelo leri Yehovha a va nyikeke rona hi ku hlanganyela hi xitalo hilaha swi nga kotekaka hakona entirhweni wa nsimu lowu a va aveleke wona. Xana sweswi wa swi kota ku hlanganyela hi xitalo evutirhelini tanihi phayona ra nkarhi hinkwawo?
6 I Pakani Leyi Fikelelekaka: Laha Afrika Dzonga, i pakani ya hina ku vona maphayona ya nkarhi hinkwawo ya 5 000, ma nghenela ntirho wa vuphayona hi September 1. Ha tshemba leswaku leyi i pakani leyi fikelelekaka ni leyi kotekaka. Ha yini hi tiyiseka? Hi March 1997, a hi ri ni vamakwerhu lava nga maphayona ya nkarhinyana lava ringanaka 7 971 naswona hi April 1998, vamakwerhu va kwalomu ka 7 900 va nghenele vuphayona bya nkarhinyana. Vunyingi byi vike 60 wa tiawara—leti nga ehansi ka xilaveko lexintshwa xa maphayona ya nkarhi hinkwawo hi khume ra tiawara ntsena! Hambiloko ko va 1 000 ntsena wa lava veke maphayona ya nkarhinyana lava nga ta nghenela vuphayona bya nkarhi hinkwawo ku nga si hela lembe leri ra ntirho, hi nga sungula September hi ri ni 5 000 wa maphayona ya nkarhi hinkwawo kumbe ku tlula!
7 Xiyimiso Xa Laveka: Xana u vona onge swi nga ku tikela ku fikelela 70 wa tiawara hi n’hweti evutirhelini bya nsimu? Kumbexana loko wo anakanya ku tirha 17 wa tiawara hi vhiki swi nga ku pfuna. Hi ku tirhisa xiyimiso lexi ringanyetiweke eka tluka leri landzelaka, ringeta ku endla xiyimiso xa vuphayona bya nkarhi hinkwawo lexi nga ta pfumelelana ni swiyimo swa wena. Loko u ri karhi u xi endla, vulavula ni maphayona lama nga ni ntokoto leswaku u kuma swiringanyeto swa wona leswaku ntirho wa wona wa vuphayona ni swilo swa wona ni vutihlamuleri bya ndyangu ma swi endlisa ku yini. Vutisa mulanguteri wa xifundzha xa n’wina leswaku maphayona exifundzheni xa n’wina ma byi hlela njhani vutirheli bya nsimu vhiki ni vhiki. Kutani titshege hi Yehovha leswaku a katekisa makungu ya wena ya ku phayona.—Swiv. 16:3.
8 Byi Endle Mhaka Ya Ndyangu: Xana u tshame u anakanya hi ku vulavula ni ndyangu wa wena mayelana ni ntirho wa vuphayona? Mi nga ha tshama ehansi hi ndyangu ivi mi burisana hi leswi mi nga swi endlaka leswaku—mi kunguhata hi vukheta naswona mi tirhisana hi ndlela leyinene—un’we kumbe vambirhi endyangwini va nga ha nghenela vuphayona. Entiyisweni, van’wana va nga ha kuma leswaku endzhaku ko anakanyisisa hi swiyimo swa vona, a va nge swi koti ku va maphayona ya nkarhi hinkwawo sweswi. Loko swi ri tano, endla vuphayona byi va pakani ya wena ya nkarhi lowu taka. Kambe, sungula ku endla makungu ya wena ya ku va phayona ivi u veka siku ro karhi leri u nga ta sungula ku phayona ha rona. Kumbexana u nga ha va phayona ra nkarhinyana minkarhi yo hlaya elembeni, leswaku u tirhela ku nghenela ntirho wa vuphayona bya nkarhi hinkwawo.
9 Vanhu lava tlulaka 4 000 lava nga maphayona ya nkarhi hinkwawo laha Afrika Dzonga va ni swiyimo leswi nga faniki. A hi hinkwawo lama nga ni rihanyo lerinene, naswona vunyingi bya wona ma ni mindyangu kun’we ni vutihlamuleri bya swa timali. Maphayona yo tala ma hundzile eka malembe ya 50, naswona man’wana ya wona ma hundzile eka malembe ya 65. Vunyingi bya wona a ma si nghenela vukati naswona yo tala ma ni malembe ya 20 kumbe lama nga ehansi. Vamakwerhu van’wana va xinuna i maphayona lama nga ni vutihlamuleri bya ndyangu ni bya le vandlheni. Vanhu lava hinkwavo va ‘tixavele nkarhi lowunene’ wo phayona, naswona hakanyingi leswi a swi vula ku hanya vutomi byo olova kambe lebyi enerisaka.—Kol. 4:5.
10 Xana Ku Laveka Leswaku U Olovisa Vutomi Bya Wena? Ku olovisa vutomi bya wena ku nga va xilotlelo lexi pfulaka ndlela yo nghenela vuphayona. Xana vutomi bya wena byi fana ni yindlu leyikulu leyi nga ni makamara ni swingolongondzwana leswi nga riki na mpfuno, leswi lavaka nkarhi wo tala, mali, ni ntirho wo swi khathalela? Loko swi ri tano, ku cincela eka swiyimo swo olova swi nga ku pfumelela ku phayona. Xana u nga hunguta nkarhi lowu u wu hetaka eka ntirho wa wena wo tihanyisa? Xana u nga tirhisa nkarhi lowu u wu tirhiselaka mintirho leyi nga riki ya risima kumbe u ringanisela nkarhi lowu u wu hetaka eka vuhungasi?
11 Bibele ya hi khutaza eka 1 Timotiya 6:8: “Kutani, loko hi ri ni swakudya ni swifunengeto, hi ta eneriseka hi swilo leswi.” Ku eneriseka hi swilo leswitsongo i nchumu wa nkoka eku endleni ka leswi hi nga swi kotaka entirhweni wa Yehovha naswona swi endla leswaku swi olova ku rhangisa swilo swa moya. (Mat. 6:22, 33) Eka tluka 104 ra 1998 Yearbook, eka xiviko xa Japani, ku nyikeriwe swiringanyeto swo hlayanyana leswi kombisaka leswaku hikwalaho ka yini ku ri ni moya wa vuphayona wo tano etikweni rero. Xin’wana xa kona xi ri: “I ntiyiso leswaku hi ntolovelo makaya ya Majapani a hi makulu ngopfu, kutani ma lava nkarhi wutsongo ntsena wa ku ma khathalela, naswona hi ntolovelo vutomi bya vona hi ndhavuko bya olova.” Xana sweswo a hi swona leswi 1 Timotiya 6:8 yi vulaka swona?
12 Emisaveni hinkwayo malandza ya Xikwembu ma chumayela mahungu lamanene hi ku hiseka lokukulu ku nga si fika siku ra Yehovha ra ku ponisa. Lexi tsakisaka, n’wexemu nhlayo-xikarhi leyi lavaka ku va 700 000 yi hlanganyerile eka swiphemu swin’wana swa ntirho wa vuphayona n’hweti ha yin’we. Xana u nga antswisa vutomi bya wena leswaku u ta va phayona? Ha ku rhamba leswaku u anakanyisisa hi swiyimo swa wena hi vukheta ni hi xikhongelo loko u ri karhi u hlamula xivutiso lexi nge: “Xana nyangwa ya ku phayona yi ku pfulekerile sweswi?”
[Marito lama tshahiweke exihlokweni lama nga eka tluka 3]
PAKANI: 5 000 WA MAPHAYONA YA NKARHI HINKWAWO!
[Bokisi leri nga eka tluka 4]
Xikombiso Xa Xiyimiso Xa Maphayona Ya Nkarhi Hinkwawo
Ku Laveka: 17 wa tiawara hi vhiki
Siku Rin’we Exikarhi Ka Vhiki Ni Hi Mahelo Vhiki
Siku Tiawara
Ravuntlhanu 8
Mugqivela 6
Sonto 3
Ntsengo Wa Tiawara: 17
Masiku Mambirhi Exikarhi Ka Vhiki Ni Hi Mugqivela
Siku Tiawara
Ravumbirhi 7
Ravumune 7
Mugqivela 3
Ntsengo Wa Tiawara: 17
Masiku Manharhu Exikarhi Ka Vhiki Ni Hi Sonto
Siku Tiawara
Musumbhunuku 5
Ravunharhu 5
Ravuntlhanu 5
Sonto 2
Ntsengo Wa Tiawara: 17
Masiku Mambirhi Nimadyambu Ni Hi Mahelo Vhiki
Siku Tiawara
Musumbhunuku 3
Ravunharhu 3
Mugqivela 8
Sonto 3
Ntsengo Wa Tiawara: 17
Tiendlele Xiyimiso Xa Wena Xa Vuphayona Bya Nkarhi Hinkwawo
Siku Tiawara
Musumbhunuku
Ravumbirhi
Ravunharhu
Ravumune
Ravuntlhanu
Mugqivela
Sonto
Ntsengo Wa Tiawara: 17