Hulumendhe Leyi Nga Ta Khutaza Timfanelo Ta ku Chava Xikwembu

EHLEKETA hi misava leyi nga ni hulumendhe yin’we ya vanhu va tinxaka hinkwato ni tindzimi hinkwato. Ehleketa hi hulumendhe leyi tivekaka hi mahanyelo ya xiyimo xa le henhla ni ku herisa nyimpi, rivengo, vugevenga, vusweti, thyaka, vuvabyi hambi ku ri rifu!

U nga ha ku, ‘Swi twala swi ri swinene, kambe ko va norho ntsena.’ Ina, swi nga koteka. Entiyisweni, swi ta endleka hakunene. Yesu Kreste u tshembise hulumendhe yo tano. U dyondzise valandzeri vakwe leswaku va yi khongelela: “Kutani mi fanele mi khongela hi ndlela leyi: ‘Tata wa hina la nge matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.’”—Matewu 6:9, 10.

Kumbexana u ma toloverile marito ya xikhongelo xexo, hikuva vanhu va timiliyoni emisaveni hinkwayo va xi tiva kumbe va tshame va twa ha xona. Kambe, xana u tshame u ehleketa kahle leswaku marito wolowo ma vula yini hakunene? Xiya leswaku Mfumo lowu wu fambisana ni ku endleka ka ku rhandza ka Xikwembu emisaveni. Kutani, Mfumo wa Xikwembu i yini? Naswona hi kwihi ku rhandza ka Xikwembu hi misava ya hina?

Leswi Mfumo Wa Xikwembu Wu Nga Swona

Nhlamuselo yin’wana ya mfumo i hulumendhe leyi nga ni hosi. Mfumo wa Xikwembu i fambiselo ra Yehovha Xikwembu ra ku fuma vuako hinkwabyo. I hulumendhe leyi nga ni hosi leyi rhangeriweke hi N’wana wakwe, Yesu Kreste. Naswona ku rhandza ka Xikwembu malunghana ni misava swi anekiwe kahle hi ndlela leyi nga erivaleni eka Pisalema 37:10, 11: “Hi nkarhinyana, lowo homboloka a nge he vi kona; kunene u ta languta endhawini yakwe, u ta va a nga ri kona. Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”

Hikwalaho, loko u heleriwa hi ntshembo hikwalaho ka ku hohloka ka mahanyelo emisaveni, amukela xikhutazo lexi. Bibele yi tshembisa leswaku ku nga ri khale swiyimo swa misava ni ndlela leyi vanhu va tikhomaka ha yona swi ta cinca swinene. Xitshembiso xa leswaku Mfumo wa Xikwembu wu ta fuma misava ku nga ri khale, ku endlela leswaku vanhu va landzela timfanelo ta ku chava Xikwembu, swi hi endla leswaku hi va ni ntshembo.

Ku tshemba switshembiso swa Mfumo wa Xikwembu swi nga endla leswaku hi titwa hi sirhelelekile. Xiya timfanelo leti fambisanaka ni ku fuma ka Mfumo: “N’wina vanhu tanani, vonani swiendlo swa Yehovha, ndlela leyi a vekeke ha yona swilo leswi hlamarisaka emisaveni. U herisa tinyimpi ku ya fika emakumu ya misava.” (Pisalema 46:8, 9) Mawaku xitshembiso lexinene swonghasi xa ku rhula ni nsirhelelo!

Evuprofetweni lebyi vulavulaka hi Hosi ya Mfumo wa Xikwembu, ku nga Yesu Kreste, Pisalema 72:12-14 yi ri: “Yi ta kutsula xisiwana lexi kombelaka ku pfuniwa, ni la xanisekaka ni hinkwavo lava nga riki na mupfuni. Yi ta va ni nsovo eka loyi a pfumalaka ni loyi a nga xisiwana, yi ta ponisa moya-xiviri wa swisiwana. Yi ta kutsula moya-xiviri wa vona eku tshikileriweni ni le madzolongeni, ni ngati ya vona yi ta va ya risima ematihlweni ya yona.”

Timfanelo Leti Kumekaka eBibeleni

Xiya timfanelo tin’wana leti Bibele yi ti khutazaka: “Va tsaka lava khathalaka hi xilaveko xa vona xa moya.” (Matewu 5:3) Yin’wana: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.”—Swivuriso 3:5, 6.

Bibele yi tlhela yi hi dyondzisa leswaku hinkwerhu hi ni vutihlamuleri eka ndlela leyi hi hanyaka ha yona. Xiya Eklesiasta 11:9: “Jaha, tsaka evuntshweni bya wena, naswona mbilu ya wena a yi ku endlele leswinene emasikwini ya vujaha bya wena, famba etindleleni ta mbilu ya wena ni hi ku landza swilo leswi voniwaka hi mahlo ya wena. Kambe tiva leswaku eka leswi hinkwaswo, Xikwembu xa ntiyiso xi ta ku avanyisa.” Swivuriso 2:21, 22 yi kombisa hi ku kongoma leswaku hi byarha vutihlamuleri bya leswi hi swi endlaka: “Lavo lulama hi vona lava nga ta tshama emisaveni, naswona lava va pfumalaka xisandzu hi vona lava nga ta sala eka yona. Loko ku ri lavo homboloka, va ta dlayiwa emisaveni; kasi loko ku ri vaxengi, va ta tsuvuriwa eka yona.”

Mawaku ndlela leyi swi pfunaka ha yona ku hlakulela vuxaka lebyikulu ni Xikwembu loko hi xiya ntshembo lowu wa ku kuma hulumendhe leyo lulama! Ku hlangana ni van’wana lava na vona va lavaka ku fumiwa hi Mfumo wa Xikwembu swi ta hi pfuna leswaku hi hanya hi ndlela leyi yi nga ta endla leswaku hi va ehansi ka ku fuma ka Mfumo wa xona lowo vangama ni ku tsakela timfanelo letinene leti wu ti khutazaka.

[Xifaniso lexi nga eka tluka 10]

Lavo rhula “va ta dya ndzhaka ya misava” ni ku “kuma ntsako lowu heleleke eku rhuleni lokukulu.”—PISALEMA 37:11.