Maxelo Yo Biha A Ma Nge He Vi Kona!
“VANHU va manguva lawa a va ha yi xiximi misava hikwalaho ka makwanga ya vona yo lava ku hanya bya ka byandlana, ku endla swilo hi ku hatlisa ni ku pindzula ngopfu.” Xi hlayeka hi ndlela yoleyo xifunengeto xa buku leyi nge 5000 Days to Save the Planet. Hi hanya ni mimbuyelo ya munhu ya makwanga. Ku nga khathariseki leswaku leswi vuriwaka hi ku kufumela ka misava i ntiyiso kumbe e-e, ntiyiso hi lowu—munhu u onha pulanete ya hina yo saseka. Ntshembo lowu hi nga na wona i ku hetiseka ka xitshembiso xa Bibele xa leswaku Xikwembu xi ta “lovisa lava onhaka misava.”—Nhlavutelo 11:18.
Xikwembu xi ta siva fambiselo leri onhakeke ra ku fuma ka vanhu hi fambiselo lerintshwa hi ku helela. U nga si bakanya vonelo leri tanihi mavunwa ya vukhongeri, tivutise: I mani loyi a nga tivaka hi swilaveko swa mbango wa misava ku tlula Muvumbi wa yona? Xana a nga swi tsakeli leswi endlekaka emisaveni leyi yakwe? Bibele yi swi veka erivaleni leswaku wa swi tsakela, Esaya 45:18 yi vula leswaku Yehovha i “Xikwembu xa ntiyiso, Muvumbi wa misava ni Muendli wa yona, Yena Loyi a yi simekeke yi tiya, loyi a nga yi tumbuluxelangiki swa hava, loyi a yi vumbeke leswaku ku akiwa eka yona.” Leswaku xi hetisisa xikongomelo xexo, Xikwembu xi nga swi kota ku nghenelela naswona xi ta nghenelela.
Xikwembu xi ta swi endla hi ku simeka hulumendhe leyintshwa kumbe mfumo, ku lawula misava. Loko Vakreste va khongela Xikhongelo xa Hosi, va ku, “Mfumo wa wena a wu te,” va kombela hulumendhe leyi leswaku yi teka mfumo. (Matewu 6:9, 10) Mfumo wa Xikwembu kumbe hulumendhe, yi ta fuma hi ndlela leyi kombisaka leswaku ya yi twisisa mindzhendzheleko leyi rharhanganeke ya misava. Xisweswo yi ta swi kota ku lulamisa tindhawu ta misava leti onhiweke hi nthyakiso ni ku tirhisiwa loko biha ka mbango. Esaya 35:1, 6 yi ri: “Timbala ta le kwandzasini ti ta . . . rhumbuka kukota safroni. . . . Hikuva emananga ku ta pfelela mati, ni swinambyana etimbaleni ta le kwandzasini.”
Kukondza Xikwembu Xi Nghenelela
Endzhaku ka tindhambhi ta lembe ra 2002, Helmut Schmidt, khale ka khanselara ya le Jarimani Vupela-dyambu, u tsarile: “Ku hava loyi a nga sivelaka mati leswaku ma nga mbundzumuxi madamu. Makhombo ma tshama ma ri karhi ma endleka.” I ntiyiso. Naswona loko maxelo yo biha ma hlasela, lexi vanhu va nga xi endlaka i ku lava tindlela ta ku ti sirhelela. Hambileswi makhombo wolawo hinkwawo ma vangaka maxangu, kambe ma nga ha tlhela ma pfuna. Ma nga endla leswaku vanhu va rhandza ni ku khathalela vaakelani va vona. (Marka 12:31) Hi xikombiso, tindhambhi ta le Yuropa ti endle leswi fanaka eka van’wana. Phepha-hungu rin’wana ri te: “Vatirhi va ku tirhandzela va tile va huma eJarimani hinkwaro leswaku va ta endla ntirho [wo phalala]. I ntirho lowukulu ku tlula hinkwayo leyi tshameke yi va kona ku sukela hi Nyimpi ya Vumbirhi ya Misava.”
Exikarhi ka vatirhi lava va ku tirhandzela a ku ri ni Timbhoni ta Yehovha. Xihloko lexi landzelaka xi bula hi ntirho wo phalala lowu endliweke hi Timbhoni ematikweni ya mune lama hlaseriweke hi xidzedze lexi fambisanaka ni mpfula. Leswi endliweke hi Vakreste lava ko va xikombiso xa ndlela leyi vutomi byi nga ta va ha yona ehansi ka ku fuma ka Xikwembu eka hulumendhe leyi taka, laha rirhandzu ni ku khathalela vanhu van’wana—ku nga ri makwanga ni vutianakanyi—swi nga ta va kona.—Esaya 11:9.a
Vakreste va nga ha kuma nchavelelo eka xitshembiso lexi Xikwembu xi xi endleke eka Vaisrayele va khale: “Kunene tiko ra n’wina ndzi ta ri nyika mpfula hi nkarhi lowu vekiweke, mpfula ya xixikana ni mpfula ya ximun’wana.” (Deteronoma 11:14) Xitshembiso lexi xi ta hetiseka ni le ka lava va nga ta va ni lunghelo ra ku hanya emisaveni leyintshwa ya Xikwembu—misava leyi nga taka yi nga vi na timhangu leti vangiwaka hi maxelo.
[Nhlamuselo ya le hansi]
a Loko u lava ku dyondza swo tala hi xitshembiso xa Bibele xa hulumendhe ya Mfumo, hi kombela u tihlanganisa ni Timbhoni ta Yehovha endhawini ya ka n’wina kumbe u tsalela vakandziyisi va magazini lowu.
[Bokisi/Xifaniso lexi nga eka tluka 9]
Ku Lawula Maxelo Hi Ndlela Leyi Hetisekeke
Emisaveni leyintshwa ya Xikwembu, vanhu a va nge he chavi leswaku kaya kumbe swibyariwa swa vona swi ta onhiwa hi swidzedze swa xitshuketa. (2 Petro 3:13) Bibele yi swi veka erivaleni leswaku Xikwembu ni N’wana wa xona, Yesu Kreste, va ni matimba ya ku lawula maxelo hi ku helela. Xiya tindzimana leti landzelaka.
◼ Genesa 7:4: “Emasikwini ya nkombo lama taka ndzi ta nisa mpfula ehenhla ka misava ku ringana masiku ya 40 ni vusiku bya 40.”
◼ Eksoda 14:21: “Yehovha a endla leswaku lwandle ri tlherisiwa hi mheho ya matimba ya le vuxeni vusiku hinkwabyo naswona a hundzula lwandle ri va misava leyi omeke, mati ma avana hi le xikarhi.”
◼ 1 Samuwele 12:18: “Samuwele a vitana eka Yehovha, kutani Yehovha a tisa ku dzindza ni mpfula esikwini rero, lerova vanhu hinkwavo va n’wi chave ngopfu Yehovha na Samuwele.”
◼ Yonasi 1:4: “Yehovha a rhumela mheho leyikulu elwandle, ku va ni xidzedze lexikulu elwandle; loko ku ri xikepe, a xi ri kusuhi ni ku tshoveka.”
◼ Marka 4:39: “Hiloko [Yesu, a nyikiwe matimba hi Xikwembu] a pfuka a tshinya mheho, kutani a byela lwandle a ku: ‘Miyela! U ku whii!’ Kutani mheho yi hunguteka, hiloko ku va ni ku rhula lokukulu.”
[Swifaniso leswi nga eka tluka 8, 9]
Emisaveni leyintshwa ya Xikwembu, a hi nge he chavi maxelo yo biha