Langutelo Ra Bibele

Loko Wena Ni Maxaka Ya Wena Mi Nga Ri eVukhongerini Byin’we

HI KU ya hi nkambisiso wun’wana, emisaveni hinkwayo ku ni mimpambukwa ni tikereke to hambana-hambana to tlula 10 000. Etikweni rin’wana, vanhu lavakulu va kwalomu ka 16 wa tiphesente va tshame va cinca vukhongeri bya vona. Kutani a swi hlamarisi leswi maxaka ni vanghana va nga twananiki loko swi ta emhakeni ya tidyondzo ta vukhongeri. Minkarhi yin’wana leswi swi dlaya ni vuxaka. Hi yona mhaka leyi ku tlakukaka xivutiso lexi nge, Xana Vakreste va fanele va ma khoma njhani maxaka ya vona lama nga riki evukhongerini byin’we na vona?

Vuxaka Byo Hlawuleka

Hi xikombiso, xiya leswi Bibele yi swi vulaka malunghana ni vuxaka byo hlawuleka exikarhi ka vatswari ni vana va vona. Xileriso lexi nga eka Eksoda 20:12 xo “xixima tata wa wena ni mana wa wena” a xi pimeriwanga nkarhi. Entiyisweni, loko Yesu a bula hi xileriso lexi, eka Matewu 15:4-6, swi le rivaleni leswaku a a vulavula hi xichavo lexi vana lavakulu va faneleke va va na xona eka vatswari va vona.

Buku ya Bibele ya Swivuriso yi hi tsundzuxa leswaku hi xixima vatswari. Swivuriso 23:22 yi tsundzuxa leswaku u fanele “u nga n’wi languteli ehansi mana wa wena hileswi a kuleke.” Kahle-kahle, Swivuriso 19:26 yi tsundzuxa leswaku loyi “a xanisaka tata wakwe ni loyi a hlongolaka mana wakwe i n’wana la nyumisaka ni ku khomisa tingana.”

Matsalwa ma swi veka erivaleni leswaku a hi fanelanga hi honisa vatswari va hina. Mhaka ya leswaku vatswari va hina a va byi amukeli vukhongeri bya hina a yi dlayi vuxaka bya hina na vona. Misinya leyi ya milawu ya Bibele yi tirha ni le ka maxaka ya hina ni le ka vatekani. Swi le rivaleni leswaku swi fanerile leswaku Vakreste va rhandza maxaka ya vona naswona Matsalwa ma lerisa leswaku va endla tano.

I Swa Nkoka Ku Ringanisela

Handle ko kanakana, Bibele yi hi lemukisa hi vunakulobye byo biha, naswona nkucetelo lowu wu nga ha tisiwa hi maxaka ya wena. (1 Vakorinto 15:33) Enkarhini lowu nga hundza malandza yo tala yo tshembeka ya Xikwembu ya yimele ntiyiso hambiloko vatswari va wona va wu kaneta. Leswi swi ve tano hi vana va Kora. (Tinhlayo 16:32, 33; 26:10, 11) Vakreste va ntiyiso a va fanelanga va chava ku yimela ripfumelo ra vona leswaku va ta tsakisa van’wana hambi ku ri maxaka ya vona.—Mintirho 5:29.

Eka swiyimo swin’wana vatswari kumbe maxaka va nga ha kanetana swinene ni leswi Mukreste a swi pfumelaka. Van’wana va nga ha hundzuka valala va Vukreste bya ntiyiso. Etimhakeni to tano, Vakreste va teka magoza lama faneleke leswaku va sirhelela ripfumelo ra vona. Yesu a a tiyisile loko a ku: “Valala va munhu ku ta va vanhu va ndyangu wa yena. Loyi a nga ni xinakulobye lexikulu eka tata wakwe kumbe mana wakwe ku tlula eka mina a nga ndzi faneli; naswona loyi a nga ni xinakulobye lexikulu eka n’wana wakwe wa jaha kumbe wa nhwanyana ku tlula eka mina a nga ndzi faneli.”—Matewu 10:36, 37.

Hambiswiritano, minkarhi yo tala maxaka ya Vakreste a ma byi vengi hilaha ku heleleke vukhongeri bya vona. Ntsena ndlela leyi ma twisisaka tidyondzo ta Bibele a yi fani ni ya vona. Matsalwa yo Kwetsima ya khutaza valandzeri va Yesu ku khoma lava nga riki vapfumeri “hi ku rhula” ni hi “xichavo lexi enteke.” (2 Timotiya 2:25; 1 Petro 3:15) Bibele yi nyika ndzayo leyi faneleke leyi nge: “Hlonga ra Hosi a ri fanelanga ri lwa, kambe ri fanele ri olova eka hinkwavo.” (2 Timotiya 2:24) Muapostola Pawulo u tlhele a tsundzuxa Vakreste leswaku “va nga vulavuli ku biha hambi ku ri hi mani, va nga vi lava lwaka, kambe va anakanyela, va kombisa ku rhula hinkwako eka vanhu hinkwavo.”—Tito 3:2.

U Nga Dlayi Vuxaka Naswona U Va Kombisa Rirhandzu

Eka 1 Petro 2:12, Vakreste va nyikiwa xikhutazo lexi: “Hlayisani ku tikhoma ka n’wina ku ri kunene exikarhi ka matiko [lava nga riki vapfumeri], leswaku . . . va dzunisa Xikwembu hi siku ra ku kambela ka xona hikwalaho ka mintirho leyinene ya n’wina leyi va nga timbhoni leti yi voneke hi mahlo.” Hakanyingi maxaka ya hina lama nga riki evukhongerini byin’we na hina ma vona ku cinca loku hi ku endleke hi leswi hi hanyaka hi misinya ya milawu ya Bibele. Tsundzuka leswaku vo tala lava a va nga ri na mhaka kumbe lava a va kaneta ntiyiso wa Bibele va cince mianakanyo ya vona. Vanhu van’wana va nga ha va va teke malembe yo tala va ri karhi va xiyisisa mahanyelo ya munghana wa vona wa vukati kumbe n’wana wa vona, kutani sweswo swi endla leswaku va lava ku tiva leswaku ha yini a hanya hi ndlela yoleyo. Mukreste a nga fanelanga a nyika maxaka yakwe xivangelo xa ku ala ntiyiso wa Bibele hi ku ka a nga khathali ha wona.

Hakunene, swiyimo a swi fani naswona Vakreste van’wana lava nga Timbhoni va nga ha va va tshama ekule ni vatswari va vona. Swi nga ha endleka swi nga koteki ku va endzela ko tala hilaha va swi navelaka hakona. Kambe hi nga kombisa maxaka ya hina leswaku ha ma rhandza, hi ku ma tsalela mapapila, hi ma bela riqingho kumbe hi hambeta hi vulavurisana na wona nkarhi na nkarhi hi tindlela tin’wana. Vo tala lava nga riki Vakreste va ntiyiso va rhandza vatswari va vona ni maxaka ya vona, naswona va vulavurisana na vona nkarhi na nkarhi ku nga khathariseki vukhongeri bya vona. Xana Vakreste lava nga Timbhoni a va fanelanga va endla tano?

[Xifaniso lexi nga eka tluka 22]

Loko u hambeta u vulavurisana ni maxaka ya wena ma ta swi vona leswaku wa ma rhandza