Langutelo Ra Bibele
Xana U Nga Ku Hlula Njhani Ku Navela Loko Biha?
“Loko ndzi navela ku endla leswi lulameke, leswo biha swi kona eka mina.”—VARHOMA 7:21.
SWI nga endleka leswaku eka vaapostola hinkwavo, a nga kona loyi a tirheke hi matimba ku khutaza vanhu van’wana leswaku va landzelela misinya ya milawu leyi tlakukeke ya Vukreste ku fana na Pawulo. (1 Vakorinto 15:9, 10) Hambiswiritano u pfumerile leswaku ku na leswi a swi n’wi karhata. A a langutane ni nyimpi ya mianakanyo ni ku navela leswo biha. Xana u tshame u titwa hi ndlela leyi muapostola Pawulo a ti tweke ha yona? Ku vula ntiyiso i mani eka hina swivumbiwa leswi nga hetisekangiki loyi a nga langutanangiki na swona?
Eka vo tala nyimpi yo hlula ku navela loko biha i yikulu. Van’wana va lwisana ni ku navela ka ku titsakisa hi rimbewu. Van’wana i mahlonga ya ku gembula, fole, swidzidzirisi kumbe xihoko. Loko hi hlaseriwe hi ku navela loku nga basangiki ni loku nga ni khombo, xana hi nga ku hlula njhani? Xana i mpfuno wihi lowu hi nga na wona? Xana nyimpi yo lwa ni ku navela loko biha yi ta kala yi hela?
Rirhandzu—Ri nga Ku Pfuna Ku Hlula Ku Navela Loko Biha
Yesu u vulavule hi milawu yimbirhi leyikulu eka Nawu wa Muxe. Wo sungula a wu ku: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.” (Matewu 22:37) Loko hi rhandza Xikwembu hilaha Yesu a vuleke hakona, xana ku n’wi tsakisa a swi nga fanelanga ku va nchumu lowu hi wu navelaka ngopfu? Loko swi ri tano, ku navela koloko lokunene ku nga hi pfuna ku lwa ni ku navela loko biha loku nga ni matimba swinene! Leswi a ko va norho. Vakreste va timiliyoni va ku hlula ku navela loko biha siku ni siku. Xana u nga ku hlakulela njhani ku tinyiketela eka Xikwembu loku nga ni matimba? Hi ku gayela u ri karhi u tlangela hi vunene bya yena tanihi laha byi vonakaka hakona eka ntumbuluko wa yena, eBibeleni ni ndlela leyi a khomaka munhu ha un’we ha yona.—Pisalema 116:12, 14; 119:7, 9; Varhoma 1:20.
Nawu wa vumbirhi lowukulu lowu Yesu a wu tshaheke a wu ku: “U fanele u rhandza warikwenu kukota loko u tirhandza.” (Matewu 22:39) Muapostola Pawulo u te rirhandzu “a ri tikhomi hi ndlela leyi nga tengangiki” naswona “a ri lavi leswi vuyerisaka rona ntsena.” Rirhandzu ro tano ro pfumala vutianakanyi ri hi pfuna ku papalata mahanyelo hambi wahi lama nga vavisaka van’wana. (1 Vakorinto 13:4-8) Xana ri nga hlakuleriwa njhani? Hi ku tiveka exiyin’weni xa vona kutani hi twelana na vona ni ku anakanyela vuhlayiseki bya vona bya nkarhi lowu taka.—Vafilipiya 2:4.
Xana I Mpfuno Wihi Lowu Nga Kona?
Hikuva Xikwembu xa twisisa leswaku swa hi tikela ku endla leswo lulama, xi hi endlele mpfuno hi tindlela to hambana-hambana. Hi Rito ra xona Bibele xi hi dyondzisa ku venga leswo biha ni ku hlakulela xichavo lexinene ha xona. (Pisalema 86:11; 97:10) Bibele yi tamele swiendlakalo swa xiviri leswi kombisaka vuyelo lebyo biha lebyi vaka kona loko u voyamela eku naveleni loko biha. Ku tlula kwalaho, Yesu u te loko hi wu kombela Xikwembu xi ta hi nyika moya lowo kwetsima, ku nga matimba lamakulu evuakweni hinkwabyo. (Luka 11:13) Wu ta tiyisa ku tiyimisela ka hina ku endla leswi lulameke. Lunghiselelo rin’wana i nseketelo wa vunghana ni xikhutazo lexi hi nga xi kumaka eka Vakreste van’wana lava lwisanaka ni ku navela loko biha. (Vaheveru 10:24, 25) Loko nkucetelo lowunene wu va ni matimba ku tlula ku navela loko biha, ha pfuniwa eku lweleni ka hina ku endla leswi lulameke. (Vafilipiya 4:8) Xana ndlela leyi ya pfuna?
Twana hi Fidel loyi a a tiveka hi ku va xidakwa hi vanhu va muganga wa ka vona. Loko a dakwile a a dzaha fole, a gembula ni ku lwa ni van’wana. Ku dyondza Bibele ni ku hlanganyela ni Timbhoni ta Yehovha swi n’wi pfunile leswaku a hlula mikhuva yoleyo. Sweswi u tsakela vutomi byo antswa ni nsati wakwe ni vana va vona vambirhi.
Un’wana a nga ha ku, ‘Kambe ku vuriwa yini hi loko ndzo tlhela ndzi rhetemuka?’ Muapostola Yohane u vulavule hi yona mhaka leyi yo tshuka u tsandzeka. U tsarile: “Vana vanga lavatsongo, ndzi mi tsalela swilo leswi leswaku mi nga tshuki mi endla xidyoho. Kambe, loko mani na mani a endla xidyoho, hi ni mupfuni eka Tatana, a nga Yesu Kreste, loyi a lulameke. Naswona yena i gandzelo ra ku vuyelelana ra swidyoho swa hina, kambe ku nga ri swa hina ntsena, ni swa misava hinkwayo.” (1 Yohane 2:1, 2) Ina gandzelo ra Yesu ri funengeta swihoxo swa vanhu lava hundzukaka naswona va lwela ku cinca leswaku va tsakisa Xikwembu. Hikwalaho ka lunghiselelo leri, xana xi kona xivangelo lexi munhu a nga vaka na xona xo lan’wa ku lwela ku endla leswi lulameke?
Ku Navela Loko Biha Ku Ta Hluriwa
Loko hi hlakulela rirhandzu hi Xikwembu ni vaakelani kutani hi tirhisa mpfuno wa Xikwembu lowu xi wu lunghiseleleke, hambi sweswi hi nga hlula enyimpini ya hina yo navela leswo biha. Ku tlula kwalaho, Rito ra Xikwembu ra hi tiyisekisa leswaku nyimpi leyi a yi nge yi emahlweni hilaha ku nga heriki. Ku nga ri khale, lava va tirhisaka lunghiselelo ra Xikwembu ra moya va ta hanyisiwa hilaha ku heleleke enyameni ni hi tlhelo ra moya. (Nhlavutelo 21:3-5; 22:1, 2) Va ta ntshunxiwa endzhwalweni wa xidyoho ni rifu leri xi ri vangaka. (Varhoma 6:23) Hi hala tlhelo, lava va tiyimiseleke ku ya emahlweni ni ku navela loku nga basangiki ni loku nga ni khombo va nge yi kumi mikateko yoleyo.—Nhlavutelo 22:15.
Swa chavelela ku tiva leswaku hi nga ka hi nga lwisani ni ku navela loko biha hilaha ku nga heriki. Ku ta susiwa hilaha ku heleleke. Mayana ntshunxeko lowu hi nga ta va na wona!