Ndlela Leyi U Nga Xi Tivaka Ha Yona Xikwembu Hi Vito

MUTSARI wa maphepha-hungu u kume papila leri landzelaka ku suka eka muhlayi un’wana: “Vutomi bya mina hinkwabyo a ndzi ri karhi ndzi himpfilitana ni xivutiso lexi, naswona ndza tshemba leswaku wena u ta ndzi hlamula. Vito ra Xikwembu i mani? Vayuda va vula leswaku vito ra xona ra xiviri ri lahlekile emalembeni yo tala lama hundzeke. Vakreste va vula leswaku vito ra xona i Yesu. Mamoslem ma vula leswaku vito ra xona i Allah. . . . Kahle-kahle, i mani vito ra xona?” Phepha-hungu ri kandziyise xivutiso xa kona xi ri ni nhlamulo leyi: “Hi ku ya hi dyondzo ya khale ya Vaheveru, Xikwembu i xikulu ngopfu, xisweswo a swi nge koteki leswaku xi vitaniwa hi vito rin’we. Kambe ndza ku tiyisekisa, xi ta hlamula loko wo tirhisa vito hambi ku ri rihi hi xichavo.”

Se swi tolovelekile namuntlha leswaku vanhu nga khathali ngopfu hi vito ra Xikwembu. Hambileswi va rhandzaka vukhongeri, vanhu vo tala lava kholwaka Bibele a va yi tekeli enhlokweni mhaka ya ku tirhisiwa ka vito ra Xikwembu. Kambe, xana Xikwembu xi titwa njhani hi swona? Xana ko va mhaka leyi nga vuliki nchumu?

A Hi Mhaka Leyi Nga Vuliki Nchumu

Xiya leswaku Bibele yi ri boxa hi ku kongoma vito ra Xikwembu leri nge Yehovha, hi minkarhi ya magidi. Eka Vuhundzuluxeri Bya Misava Leyintshwa Bya Matsalwa Yo Kwetsima, vito ra Xikwembu ri humelela ka 7 210!a I Xikwembu hi xoxe lexi susumeteleke vatsari va Bibele leswaku va tirhisa vito ra xona ko tala swonghasi. Un’wana wa vatsari lava, ku nga mupisalema Asafa, u tsarile: “Wena loyi vito ra wena u nga Yehovha, wena u ri wexe u La nge Henhla-henhla emisaveni hinkwayo.” (Pisalema 83:18) Davhida na yena u tsarile eka pisalema: “Hi ta vulavula malunghana ni vito ra Yehovha Xikwembu xa hina.”—Pisalema 20:7.

Bibele yi kombisa leswaku Yehovha Xikwembu u kambisisa timbilu ta hina ku vona ndlela leyi hi titwaka ha yona hi vito rakwe. Mupisalema u te: “Loko hi rivele vito ra Xikwembu xa hina, . . . xana Xikwembu a xi nge swi lavisisi leswi? Hikuva xa swi vona swihundla swa le mbilwini.” (Pisalema 44:20, 21) Muprofeta Esaya u tsale a ku: “Nkhensani Yehovha! Vitanani vito rakwe. Tivisani vanhu swiendlo swakwe. Vulani leswaku vito rakwe ri yisiwa ehenhla.”—Esaya 12:4.

Xikwembu hi xoxe xi te: “Va ta tiva leswaku hi mina Yehovha vito ra mina.” (Yeremiya 16:21) Siku rin’wana xi tshame xi ku: “Kunene ndzi ta hlawulekisa vito ra mina lerikulu, leri a ri nyamisiwa exikarhi ka matiko, . . . matiko ma ta tiva leswaku hi mina Yehovha.” (Ezekiyele 36:23) Man’wana ya marito lawa ma kombetela enkarhini lowu Yehovha a nga ta karihela lava va delelaka vito rakwe. Mhaka ya vito ra Xikwembu a hi matlangwana eka xona.

Yehovha Xikwembu A Nga Le Kule Eka Wena

Xana u nga xi tiva njhani Xikwembu hi vito ra xona? Xana swi vula yini ku tiva Xikwembu hi vito? Bibele ya hlamula: “Lava tivaka vito ra wena va ta ku tshemba.” (Pisalema 9:10) Swi le rivaleni leswaku ku tiva Xikwembu hi vito a swo vula ntsena ku tiva vito ra xona. U fanele u xi tshemba. Sweswo swi vula ku tiva leswaku Xikwembu i munhu wa njhani swin’we ni ku dyondza hi timfanelo ni mianakanyo ya xona. Leswi swi ta ku susumetela ku xi tshemba.

Ku hlaya ni ku dyondza Bibele hi rixaladza swi ta ku pfuna u tiva leswaku Yehovha i Xikwembu xa njhani. U tshembisa ku sirhelela lava n’wi rhandzaka naswona va rhandzaka vito rakwe. Malunghana ni la endlaka sweswo, Xikwembu xi ri: “Hikuva u veke xinakulobye xakwe eka mina, ndzi ta tlhela ndzi n’wi ponisa. Ndzi ta n’wi sirhelela hikuva u tiva vito ra mina. U ta ndzi vitana, ndzi ta n’wi hlamula. Ndzi ta va na yena emaxangwini. Ndzi ta n’wi ponisa, ndzi n’wi vangamisa. Ndzi ta n’wi enerisa hi ku leha ka masiku, ndzi ta n’wi ponisa.”—Pisalema 91:14-16.

Mawaku vuxaka lebyikulu lebyi Yehovha Xikwembu a nga na byona eka lava va tivaka vito rakwe! Na wena u nga byi tsakela vuxaka byebyo. Eswikhongelweni swa wena leswi humaka embilwini, u nga kanakani ku n’wi vitana hi vito. U ta hlamula, hikuva hilaha Bibele yi vulaka hakona, ‘a nga le kule ngopfu ni un’wana ni un’wana wa hina.’—Mintirho 17:27.

[Nhlamuselo ya le hansi]

[Bokisi/Xifaniso lexi nga eka tluka 11]

Xikwembu Xi Ku Tiva Hi Vito

Xikwembu xi byele Muxe xi ku: “Ndzi ku tiva hi vito.” (Eksoda 33:12) Rungula leri dumeke ra xihlahla lexi pfurhaka ri nyikela vumbhoni bya leswi. Bibele yi vula leswaku Xikwembu “xi n’wi vitana xi ri exikarhi ka xihlahla xa mitwa xi ku: ‘Muxe! Muxe.’ ” (Eksoda 3:4) Lexi ko va xikombiso xin’we eka swo tala laha Xikwembu xi vitaneke vanhu hi mavito ya vona. Swi le rivaleni leswaku Muvumbi wa tilo ni misava wa khathala ha hina ha un’we-un’we.

Bibele yi vula leswaku Xikwembu xi tiva tinyeleti to tala ta magidi ya timiliyoni hi vito. (Esaya 40:26) Kutani, xi fanele xi khathala ngopfu hi vanhu lava va xi gandzelaka! Muapostola Pawulo u tsale leswaku “Yehovha wa va tiva lava nga vakwe.” (2 Timotiya 2:19) Leswi a swi vuli ku tiva mavito ya vona ntsena. Xikwembu xi va tiva kahle vagandzeri va xona. Na hina hi fanele hi tiva Xikwembu hi vito naswona hi ti tiva kahle timfanelo ta xona.

Buku yo hetelela ya Bibele yi vulavula hi buku yo fanekisela laha Xikwembu xi tsalaka mavito ya hinkwavo lava tshameke va xi gandzela. Buku leyi yi vitaniwa “nsongwa ya vutomi” hikuva Yehovha Xikwembu u va nyika vutomi lebyi nga heriki lava mavito ya vona ma tsariweke eka yona. (Nhlavutelo 17:8) Lowu i ntshembo wo tsakisa eka hinkwavo lava tivaka Xikwembu hi vito.

[Bokisi/Xifaniso lexi nga eka tluka 12]

Va Twarise Vito Ra Xikwembu

● Risimu ra Muxe loko Vaisrayele va ri ekusuhi ni ku nghena eTikweni ra Xitshembiso: “Ndzi ta vula vito ra Yehovha.”—Deteronoma 32:3.

● Marito ya Davhida eka nhenha leyi vuriwaka Goliyadi: “Ndzi ta eka wena hi vito ra Yehovha wa mavuthu.”—1 Samuwele 17:45.

● Marito ya Yobo loko a lahlekeriwe hi swilo swakwe hinkwaswo ni ku fa ka xitshuketa ka vana vakwe hinkwavo: “Vito ra Yehovha a ri ye emahlweni ri dzunisiwa.”—Yobo 1:21.

● Muapostola Petro a tshaha Matsalwa ya Xiheveru loko a ri karhi a vulavula: “Un’wana ni un’wana la vitanaka vito ra Yehovha u ta ponisiwa.”—Mintirho 2:21.

● Muprofeta Esaya: “Nkhensani Yehovha! Vitanani vito rakwe. . . . Vulani leswaku vito rakwe ri yisiwa ehenhla.”—Esaya 12:4.

● Yesu Kreste a dyondzisa vadyondzisiwa vakwe ku khongela: “Kutani mi fanele mi khongela hi ndlela leyi: ‘Tata wa hina la nge matilweni, vito ra wena a ri kwetsimisiwe.’ ”—Matewu 6:9, 10.

● Yesu Kreste a khongela eka Xikwembu: “Vito ra wena ndzi ri kombise vanhu.”—Yohane 17:6.

● Xikwembu xi vulavula ni vanhu va xona: “Hi mina Yehovha. Rero i vito ra mina; naswona ku vangama ka mina a ndzi ku nyiki un’wana.”—Esaya 42:8.