Mintsako Ni Mintlhontlho Ya Ku Va Muntshwa

MALEMBE ya vuntshwa ma nga ha va malembe yo tsakisa swinene. Eka vantshwa vo tala, swi tano. Naswona vanhu vo tala lavakulu va tsaka loko va tsundzuka malembe ya vona ya kondlo-a-ndzi-dyi.

Hi nkarhi lowu fanaka, hi fanele hi pfumela leswaku hi hanya ‘eminkarhini ya mangava leyi swi nonon’hwaka ku langutana na yona.’ (2 Timotiya 3:1) Leswi swi tise ntshikilelo lowukulu eka vantshwa, ntshikilelo lowu switukulwana leswi hundzeke swi nga si tshamaka swi langutana na wona. Kumbexana hi swona leswi endleke leswaku Sabrina Solin Weill, muhleri-nkulu wa magazini wa vantshwa, a hlamusela malembe ya kondlo-a-ndzi-dyi tanihi nkarhi lowu nga ni mintlhontlho yo tala, swi fana ni ku famba ehenhla ka ntambhu u nga ri na xo khomelela eka xona. Kunene, nkarhi lowu wa ku pfilunganyeka wu nga ha va ni swiyimo swo tala swo tika, gome ni nkitsikitsi. Weill u tsale a ku: “Vantshwa va tikuma va ri exikarhi, va nga swi tivi leswaku va fanele va hanya tanihi vana kumbe vanhu lavakulu.”

Loko u ri n’wana wa kondlo-a-ndzi-dyi, xana u nga langutana njhani ni mintlhontlho ya vuntshwa? Loko u ri ni n’wana la nge malembeni ya kondlo-a-ndzi-dyi, i yini lexi nga ku tsundzuxaka malembe lawaya ya ku pfilunganyeka loko wa ha ri muntshwa, kutani u swi twisisa kahle leswi vana va wena va langutaneke na swona? Eswihlokweni leswi, hi rhamba vantshwa ni lavakulu ku kambisisa malembe ya kondlo-a-ndzi-dyi. Leswi swi ta pfuna vantshwa leswaku va langutana na wona hilaha ku humelelaka.