Loko U Ku Rhandza Ku Tlula Mpimo Ku Saseka

MARIAa i muntshwa loyi swi n’wi fambelaka kahle naswona u tshama endyangwini lowunene. Hambiswiritano, a nga tsakanga. Ha yini? A nga yi tsakeli ndlela leyi a langutekaka ha yona. Hambileswi ndyangu wa ka vona wu ringetaka ku n’wi khutaza, Maria u tivona a swarhe ngopfu naswona sweswo swi n’wi vangela gome.

José u huma endyangwini lowu xiximekaka naswona swi vonaka onge u ni swivangelo hinkwaswo swo tshama a tsakile. Kambe u vona onge a nge n’wi kumi nsati. Ha yini? José u tivona a swarhile. U vona onge a nga kona wansati la hanyeke kahle la nga ta rhandza munhu wo fana na yena.

Luis la nga ni malembe ya nhungu u rhandza xikolo naswona u ni xinghana. U rhandza ku tlanga ni vadyondzi-kulobye kambe u tshamela ku rila hikuva va n’wi hlekula hikwalaho ka ndlela leyi a langutekaka ha yona. Va vula leswaku u nyuherile.

Timhaka to fana ni leti ti tolovelekile. Maria, José na Luis a va na xiphiqo xo tivonela ebodlheleni. Ntiyiso hileswaku a nga kona munhu la lavaka ku honisiwa hikwalaho ka ndlela leyi a langutekaka ha yona.

Hambiswiritano, vanhu va kandziyisa ngopfu ndlela leyi va langutekaka ha yona. Entiyisweni, hakanyingi swi vonaka onge swi va fambela kahle lavo saseka. Hi xikombiso, swi vonaka onge ku thoriwa ngopfu vanhu vo saseka. Pilar Muriedas, un’wana wa vakongomisi va Minhlangano ya Rihanyo ya Vavasati eLatin-Amerika ni le Kharibiya, u vula leswaku eka vavasati, “ku languteka kahle hi xin’wana xa swilaveko leswikulu leswaku swilo swi va fambela kahle.” Naswona hi ku ya hi Dok. Laura Martínez, vavasati va swi tiva kahle leswaku “ku languteka kahle swa pfuna leswaku munhu a thoriwa.”

Ina, vavanuna vo tala na vona va nghene hi nhloko emhakeni ya ku aka miri leswaku va va “timbhurhi leti hetisekeke.” Hakunene, vanhu vo tala, vavanuna ni vavasati va endla hinkwaswo leswi va nga swi kotaka leswaku va tisasekisa, hambi ku ri ku titsona swakudya kumbe ku tihoxa ekhombyeni ra vuhandzuri lebyi vavisaka leswaku va va ni swikandza swo saseka. Xana sweswo swa pfuna? Xana ku ni makhombo yo karhi lama katsekaka?

[Nhlamuselo ya le hansi]

[Xifaniso lexi nga eka tluka 19]

Munhu a nga ha kuma ntirho hileswi a sasekeke