Langutelo Ra Bibele

Xana U Fanele U Chava Armagedoni?

“ARMAGEDONI” i yini? Hi ku komisa, rito leri ri hlamusela ndhawu leyi vafumi va misava va nga ta hlengeletana eka yona ku lwa ni Xikwembu ni Mfumo wa xona lowu nga emavokweni ya Yesu Kreste. Ebukwini ya Bibele ya Nhlavutelo, muapostola Yohane u vone xivono laha vafumi a va hlengeletana ni ku lwa ni Xikwembu endhawini yo fanekisela leyi vuriwaka Armagedoni.

Rito leri nge “Armagedoni” ri humelela kan’we ntsena eMatsalweni, hambiswiritano namuntlha eka tindzimi tin’wana ri tirhisiwa ngopfu tanihi xigego. Ri tirhisiwa eka nyimpi ya nyutliya leyi dlayetelaka vanhu ni le ka switsongwatsongwana swa tikhompyuta, rito leri ri tirhisiwe eka timhangu letikulu ni le ka swilo leswi nga vuliki nchumu. Tibuku to hlayanyana leti xaviwaka ngopfu ti sekeriwe eka leswi vuriwaka minkarhi ya makumu kumbe nkarhi wa le mahlweni ka Armagedoni. Ntlhandlamano wun’wana wa tibuku lowu a wu ri ni xihloko xexo wu xavise tikopi to tlula 60 wa timiliyoni eka malembe ya khume lama hundzeke.

Vanhu van’wana va chava Armagedoni. Va ehleketa leswaku matherorisi, matiko lama rhandzaka nyimpi kumbe makhombo lawa vanhu va nga swi kotiki ku ma lawula ma ta vanga khombo lerikulu emisaveni hinkwayo, leri nga ta endla leswaku swi nga ha koteki leswaku ku va ni vutomi emisaveni. Van’wana va ehleketa leswaku enkarhini lowu vekiweke, Xikwembu hi xoxe xi ta herisa pulanete ya hina ni hinkwaswo leswi nga eka yona. Leswi i swiendlakalo leswi chavisaka hakunene! Kambe hi yihi nhlamuselo leyinene ya “nyimpi ya siku lerikulu ra Xikwembu xa Matimba Hinkwawo” eArmagedoni?—Nhlavutelo 16:14, 16.

Xana Misava Yi Ta Herisiwa?

A hi vanhu hinkwavo lava nga ta lovisiwa eArmagedoni. Hi swi tivisa ku yini sweswo? Bibele ya hi tiyisekisa leswaku “Yehovha wa yi tiva ndlela yo va kutsula endzingweni vanhu lava nga ni ku tinyiketela loku nga ni vukwembu, kambe u vekela vanhu lava nga lulamangiki siku ra vuavanyisi leswaku va ta lovisiwa.” (2 Petro 2:9) Kutani ha tiyiseka leswaku Xikwembu xi ta lawula matimba lamakulu ya xona hi ndlela leyi hetisekeke. Lava lwisanaka ni vuhosi bya Xikwembu hi vona ntsena va nga ta langutana ni vukarhi bya xona eArmagedoni. A ku nge vi na lava nga ta dlayiwa hi xihoxo.—Pisalema 2:2, 9; Genesa 18:23, 25.

Bibele yi vula leswaku Xikwembu xi ta “lovisa lava onhaka misava.” (Nhlavutelo 11:18) Kutani, handle ko kanakana xikongomelo xa Yehovha Xikwembu a hi ku herisa pulanete ya hina. Ematshan’weni ya sweswo, xi ta lovisa vanhu lavo homboloka lava lwisanaka ni vulawuri bya xona. Leswi hi leswi xi swi endleke hi nkarhi wa Ndhambhi ya Nowa.—Genesa 6:11-14; 7:1; Matewu 24:37-39.

‘Siku Leri Chavisaka’

Entiyisweni, vuprofeta byo tala lebyi nga eBibeleni lebyi vulavulaka hi ndzoviso lowu taka bya chavisa. Hi xikombiso, muprofeta Yuwele u vulavule hi “siku lerikulu ni leri chavisaka ra Yehovha.” (Yuwele 2:31) Evuhlayiselweni bya matlhari ya Xikwembu ku kumeka ni gamboko, xihangu, ku tsekatseka ka misava, mavabyi lama tlulelaka, ndhambhi, mpfula ya ndzilo ni xivavula, mpfilumpfilu lowukulu, rihati ni ntungu lowu borisaka nyama ya vanhu.a (Yobo 38:22, 23; Ezekiyele 38:14-23; Habakuku 3:10, 11; Zakariya 14:12, 13) Nakambe Bibele yi vulavula hi nkarhi lowu vafi va nga ta tata misava, va tshikiwa tanihi manyoro kumbe tanihi swakudya swa tinyenyana ni swiharhi swin’wana. (Yeremiya 25:33, 34; Ezekiyele 39:17-20) Hi nkarhi wa nyimpi yoleyo valala va Xikwembu va ta chava ngopfu.—Nhlavutelo 6:16, 17.

Xana leswi swi vula leswaku vagandzeri lava yingisaka va Xikwembu xa ntiyiso va fanele va chava swiendlakalo leswi chavisaka leswi nga ta endleka eArmagedoni? Nikatsongo, hikuva malandza ya Xikwembu lama nga laha misaveni a ma nge hlanganyeli enyimpini yoleyo. Tlhandlakambirhi, Yehovha u ta ma sirhelela. Hambiswiritano, vagandzeri va ntiyiso va ta chavisiwa hi swiendlo swo chavisa swa matimba ya Xikwembu.—Pisalema 37:34; Swivuriso 3:25, 26.

Hambiswiritano, nchumu wa nkoka hi lowu, muapostola Yohane u huhuteriwile leswaku a hi tiyisekisa: “Wa tsaka munhu un’wana ni un’wana la hlayisaka marito ya vuprofeta bya buku-nsongwa leyi” ku katsa ni xilemukiso xa malunghana ni Armagedoni. (Nhlavutelo 1:3; 22:7) Xana munhu a nga tsaka njhani hi ku anakanya hi Armagedoni? Xana leswi swi ta endlekisa ku yini?

Xikwembu Xi Teka Goza

Loko moya lowukulu kumbe xidzedze xi ri eku teni, vafumi va kwalaho va nyikela swilemukiso malunghana ni ndlela yo sirhelela vanhu. Ku tiyisekisa leswaku un’wana ni un’wana u twa xilemukiso xexo, maphorisa ma nga ha famba ma khome tialamu leti lemukisaka vanhu kumbe ma nghena hi yindlu ni yindlu. Xikongomelo a hi ku chavisa vanhu kambe i ku va pfuna leswaku va teka goza leswaku va ta pona. Vanhu vo tlhariha va amukela xilemukiso hi mandla mambirhi, naswona lava tekeke goza va tsaka hi ku va va endle tano.

Swi ta va tano ni hi rungula ra Xikwembu ro tsundzuxa malunghana ni “mheho” leyi tshinelaka ya Armagedoni. (Swivuriso 10:25) Yehovha u hi nyike vuxokoxoko malunghana ni nyimpi ya yena eRitweni ra yena leri tsariweke. Xikongomelo xa yena a hi ku hi chavisa kambe i ku hi nyika xitsundzuxo lexi faneleke ni ku endla leswaku vanhu va hundzuka naswona va tiyimisela ku n’wi tirhela. (Sofaniya 2:2, 3; 2 Petro 3:9) Lava nga ta endla sweswo va ta ponisiwa. Hikwalaho, a hi fanelanga hi chava nyimpi ya Xikwembu leyi tshinelaka. Ematshan’weni ya sweswo, hi nga langutela emahlweni hi ri ni ntshembo wa leswaku “un’wana ni un’wana loyi a vitanaka vito ra Yehovha u ta pona.”—Yuwele 2:32.

[Nhlamuselo ya le hansi]

[Xifaniso lexi nga eka tluka 12]

Loko moya lowukulu wu ri eku teni, vafumi va kwalaho va nyikela swilemukiso leswaku va sirhelela vanhu

[Xifaniso lexi nga eka tluka 13]

Rungula ra Xikwembu ro lemukisa vanhu hi Armagedoni i xilemukiso xa leswaku munhu a teka goza leri nga ta n’wi ponisa