Vantshwa Lava Nyikelaka Vumbhoni Bya Matimba

Vantshwa vo tala lava nga Timbhoni ta Yehovha va vulavula hi xivindzi malunghana ni ripfumelo ra vona exikolweni ni le vutirhelini bya Vukreste naswona va humelela hi ku endla tano. Anakanya hi swikombiso leswi landzelaka.a

Kristina u ri: “Loko ndzi ri eka gredi ya vunharhu, mudyondzisi u nyike un’wana ni un’wana dayari leyi a hi fanele hi tsala eka yona leswi a hi swi endla siku ni siku. Mudyondzisi u vule leswaku u ta hlaya tidayari ta hina ivi na yena a hi tsalela swin’wana. Ndzi kunguhate ku tsala edayarini ya mina malunghana ni nkulumo leyi a ndzi ta yi veka eXikolweni Xa Vutirheli Bya Le Tilweni. Mudyondzisi swi n’wi tsakisile sweswo, kutani ndzi n’wi rhambile leswaku a ta eHolweni ya Mfumo a ta twa nkulumo ya mina. A nga tanga a ri swakwe kambe u te ni mudyondzisi wa mina wa le ka gredi yo sungula. Loko hi ri exikolweni, mudyondzisi u byele tlilasi hinkwayo ndlela leyi a yi tsakeleke ha yona nkulumo ya mina. A ndzi tsakile swinene. Kambe a swi helelanga kwalaho. Endzhaku ka lembe, ndzi hlamusele ntokoto wa mina enhlengeletanweni ya xifundzha ya Timbhoni ta Yehovha naswona mudyondzisi wa mina na yena a a ri kona kwalaho. Endzhakunyana, mina ni munghana wa mina la nga phayona hi n’wi endzerile kutani hi n’wi nyika buku leyi nge Vutivi Lebyi Yisaka eVuton’wini Lebyi Nga Heriki. U tlhele a ta entsombanweni wun’wana wa hina wa muganga!”

Loko Sydnee a ri ni malembe ya tsevu hi vukhale a a ri ni xivindzi xo vulavula ni vadyondzi-kulobye hi ntiyiso lowu nga eRitweni ra Xikwembu, ku katsa ni xiyimo xa vafi ni vuxaka bya Yesu ni Xikwembu. Mana wakwe u ri: “A a ri mutirheli lontsongo la hisekaka ni la nga ni xivindzi.” Eku heleni ka lembe ra yena ro sungula exikolweni, Sydnee a a vonaka a nga tsakanga. U te: “Ndzi vilerisiwa hi vadyondzi-kulorhi. Xana va ta dyondzisa ku yini hi Yehovha?” Sydnee u endle kungu. Hi siku leri xikolo a xi pfala ha rona, u nyike xichudeni xin’wana ni xin’wana nyiko leyi a yi phutseleke. A ku ri buku leyi nge Buku Yanga Ya Timhaka Ta Bibele. Sydnee u fambise tikopi ta 26 naswona u byele swichudeni leswi leswaku swi pfula tinyiko ta swona loko swi ri ekaya ni vatswari va swona. Sydnee u teka lava a dyondzaka na vona etlilasini tanihi nsimu yakwe. U tlhele a va bela tiqingho ku twa leswaku va ti tsakele njhani tibuku ta vona. Nhwanyana un’wana u vule leswaku u hlaya buku leyi madyambu man’wana ni man’wana ni mana wakwe.

Loko Ellen a ri ni malembe ya 15 hi vukhale u nyike mudyondzisi wakwe wa matimu minkandziyiso yo hlayanyana ya Xalamuka! Ellen u ri: “Wa yi rhandza, naswona sweswi u ni malembe mambirhi a ri karhi a hlaya Xalamuka!” Ellen u ya emahlweni a ku: “Sweswinyana ndza ha ku n’wi nyika buku leyi nge Buku Yanga Ya Timhaka Ta Bibele, naswona u vule leswaku vana vakwe vambirhi va vanhwanyana va yi rhandza swinene. Kutani ndzi n’wi nyike buku leyi nge Dyondza Eka Mudyondzisi Lonkulu. Hi ku famba ka nkarhi, u ndzi nyike khadi. Khadi ra kona a ri ku: ‘Ndzi nkhensa swinene tibuku leti u ndzi nyikeke tona. Ta hi pfuna mina ni vana va mina va vanhwanyana. Swa tsakisa ku vona munhu lontshwa la hlutekeke emianakanyweni naswona a tinyiketerile ku fana na wena. Ku hava nyiko leyi nga ringanisiwaka ni nyiko ya ripfumelo ra wena. U ndzi dyondzise swo tala ku tlula leswi mina a ndzi ta ku dyondzisa swona!’ Ntokoto lowu wu ndzi kombe ndlela leyi vanhu va wu tlangelaka ha yona ntiyiso wa Bibele loko hi endla matshalatshala yo va byela wona.”

Daniel a a ri ni malembe ya tsevu loko a sungula dyondzo ya Bibele. U ri: “Manana a a ndzi dyondzisa kambe na mina a ndzi lava ku dyondzisa un’wana.” Daniel u hlawule ku dyondzisa Manana Ratcliff—mukhegula loyi a n’wi siyeleke buku ya Bibele. U te eka yena: “Ndzi lava ku ku kombisa buku ya mina leyi ndzi yi rhandzaka ngopfu leyi nge, Buku Yanga Ya Timhaka Ta Bibele,” u engetele a ku: “A ndzi tivi loko u nga swi rhandza leswaku ndzi ku endzela vhiki ni vhiki ndzi ta ku hlayela yona.” Manana Ratcliff u pfumerile. Laura, ku nga mana wa Daniel u ri: “Hi sungule ku hlaya na Manana Ratcliff madyambu wolawo. Daniel na Manana Ratcliff a va cincana ku hlaya tindzimana naswona Daniel u n’wi kombele leswaku a hlaya matsalwa lama kombisiweke emakumu ka xitori. A ndzi hamba ndzi heleketa Daniel kambe Manana Ratcliff a a vonaka a tsakela ku bula na Daniel ntsena!” Hi ku famba ka nkarhi, Daniel na Manana Ratcliff va sungule ku dyondza buku leyi nge U Nga Hanya Hi Masiku aParadeyisini eMisaveni. Hi nkarhi wolowo Natalie makwavo lontsongo wa Daniel a a swi kota ku hlaya, kutani u hlanganyele edyondzweni yoleyo. Manana Ratcliff a a ri ni swivutiso swo tala—swin’wana swa swona a swi tika. Kambe Daniel na Natalie va tirhise xibukwana lexi nge Tinhloko-mhaka To Vulavurisana Ta Bibele ni nxaxamelo wa matsalwa lama nga emakumu ka Bibele leswaku va nyikela tinhlamulo leti humaka eMatsalweni. Manana Ratcliff, loyi a a ri Mukhatoliki vutomi bya yena hinkwabyo, a a tsakisiwa hi leswi a swi dyondzaka. U vule leswi endzhaku ka dyondzo yin’wana: “Ndzi navela onge loko a ndzi sungule ku dyondza Bibele khale!” Lexi vavisaka, Manana Ratcliff wa ha ku fa sweswinyana a ri ni malembe ya 91. Kambe ku dyondza Bibele swi endle leswaku a tolovelana ni ntiyiso wa risima, ku katsa ni ntshembo lowu nga eBibeleni wa ku pfukela eparadeyisini emisaveni. Daniel sweswi u ni khume ra malembe hi vukhale naswona u fambisa tidyondzo timbirhi ta Bibele. Natalie, sweswi u ni malembe ya nhungu naswona u dyondza Bibele ni nhwanyana un’wana la ringanaka na yena.

Vantshwa vo fana na Kristina, Sydnee, Ellen, Daniel na Natalie va endla leswaku vatswari va vona lava nga Vakreste va tsaka. Xa nkoka ngopfu, va endla leswaku Yehovha a tsaka naswona a nge ri rivali rirhandzu ro tano leri vantshwa va ri kombisaka hikwalaho ka vito ra yena.—Swivuriso 27:11; Vaheveru 6:10.

[Nhlamuselo ya le hansi]

[Swifaniso leswi nga eka tluka 26]

Kristina (ehenhla) na Sydnee

[Xifaniso lexi nga eka tluka 27]

Daniel na Natalie

[Xifaniso lexi nga eka tluka 27]

Ellen