Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • g 6/06 matl. 10-13
  • Ndzi Nga Yi Lawula Njhani Ndlela Leyi Ndzi Tirhisaka Mali Ha Yona?

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Ndzi Nga Yi Lawula Njhani Ndlela Leyi Ndzi Tirhisaka Mali Ha Yona?
  • Xalamuka!—2006
  • Swihloko
  • Tinhlokomhaka Tin'wana Leti Yelana Na Yona
  • Dyondza Leswi U Faneleke Ku Swi Tiva
  • Xalamukela Mintlhontlho
  • Dyondza Swo Karhi Loko Vatswari Va Wena Va Ku Alela
  • Ku Tirhisa Mali Swi Lava Nkarhi
  • Ndzi Nga Yi Tirhisa Njhani Mali Ya Mina Hi Vutlhari?
    Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2
  • Tirhisa Mali Ya Wena Hi Vutlhari
    Xalamuka!—2009
  • Ndlela Yo Tirhisa Mali
    U Nga Va Ni Ndyangu Lowu Tsakeke
  • Ndlela Leyi Mi Nga Yi Tirhisaka Ha Yona Mali
    Xihondzo xo Rindza Xi Huwelela Mfumo Wa Yehovha
Vona Swo Tala
Xalamuka!—2006
g 6/06 matl. 10-13

Vantshwa Va Vutisa . . .

Ndzi Nga Yi Lawula Njhani Ndlela Leyi Ndzi Tirhisaka Mali Ha Yona?

“Hakanyingi ndzi tikuma ndzi ri eku endleni ka makungu yo xava nchumu lowu nga riki wa nkoka, naswona ni mali ya wona ndzi nga riki na yona, ntsena hileswi nchumu wa kona wu chipisiweke.”—Anna,a Brazil.

“Minkarhi yin’wana vanghana va mina va ndzi rhamba leswaku hi endla swilo swo karhi leswi lava-ka mali yo tala. Ndza swi rhandza ku va ni vanghana va mina, hi tiphina. A nga kona la rhandzaka ku vula a ku: ‘Ndzi khomeleni, a ndzi na mali yo famba na n’wina.’”—Joan, Australia.

XANA u vona onge a wu si tshama u va na yona mali leyi eneleke yo xava leswi u swi lavaka? U nga ha navela onge vatswari va wena va nga ku nyika mali yo talanyana leswaku u ta xava xo tlangisa lexi u xi lavaka. Loko a wu hola mali yo talanyana, a wu ta xava tintangu letiya u ti “lavaka.” Hambiswiritano, ematshan’weni yo vilela hi mali leyi u nga riki na yona, ha yini u nga dyondzi ku tirhisa leyi u vaka na yona?

Loko u ri muntshwa la tshamaka ni vatswari va wena, u nga ha rindza u kondza u huma ekaya kutani ku va kona u dyondzaka matirhiselo ya mali. Kambe sweswo swi nga fana ni ku tlula eka xihaha-mpfhuka lexi nga emoyeni u nga si dyondza ku tirhisa parachute. I ntiyiso leswaku munhu a nga ha hetelela a swi vonile leswaku parachute yi tirhisiwa njhani loko yi ri karhi yi ehla. Kambe a swi ta antswa swinene loko a a lo dyondza ku yi tirhisa a nga si tlula!

Hilaha ku fanaka, nkarhi lowunene wa leswaku u dyondza ku tirhisa mali hiloko u nga si langutana ni mintlhontlho leyikulu ya swa timali evuton’wini. Hosi Solomoni u tsale a ku: ‘Mali i xisirhelelo.’ (Eklesiasta 7:12) Kambe, mali yi ta ku sirhelela ntsena loko wo dyondza ku yi tirhisa kahle. Loko wo endla tano swi ta endla leswaku u titshemba naswona vatswari va wena va ta ku xixima ngopfu.

Dyondza Leswi U Faneleke Ku Swi Tiva

Xana u tshame u kombela vatswari va wena leswaku va ku hlamusela leswaku ku laveka yini leswaku munhu a khathalela ndyangu? Hi xikombiso, xana wa swi tiva leswaku gezi, swikufumerisi ni mati swi durha mali muni hi n’hweti, nileswaku swi durha mali muni ku va ni movha, ku xava swakudya ni ku hakela rhente kumbe xikweleti xa yindlu? U nga ha ehleketa leswaku ku tiva vuxokoxoko lebyi swi ta ku phirha. Kambe, tsundzuka leswaku na wena u hoxa xandla eka swikweleti sweswo. Tlhandlakambirhi, loko u huma muti, na wena u ta sungula ku hakela swikweleti swo tano. Hikwalaho swi ta ku pfuna ku tiva swilo leswi. Kombela vatswari va wena va ku komba swin’wana swa swilo leswi va swi hakelaka, kutani u yingiserisisa loko va ku hlamusela leswaku va hlela njhani leswaku va kota ku swi hakela.

Xivuriso xa le Bibeleni xi ri: “Munhu wo tlhariha u ta yingisa a tlhela a amukela swiletelo leswi engetelekeke, munhu la twisisaka hi loyi a amukelaka nkongomiso wa vutshila.” (Swivuriso 1:5) Anna loyi ku vulavuriweke hi yena eku sunguleni u ri: “Tatana u ndzi dyondzise ndlela yo hlela matirhiselo ya mali, naswona u ndzi kombe ndlela leyi swi nga swa nkoka ha yona ku hlela timali ta ndyangu.” Hi nkarhi lowu fanaka mana wa Anna u n’wi dyondzise tindlela tin’wana leti tirhaka to endla swilo. Anna wa engetela: “U ndzi kombe ndlela leyi swi nga swa nkoka ha yona ku kambisisa minxavo ndzi nga si teka xiboho xo xava. Manana wa swi kota ku xava swilo swo tala hi swimalana.” Swi n’wi pfune njhani sweswo? Anna u ri: “Sweswi ndzi kota ku khathalela swilaveko swa mina swa timali. Ndzi yi lawula hi vukheta ndlela leyi ndzi tirhisaka mali ya mina ha yona, kutani ndzi ni ku rhula hileswi ndzi papalataka swikweleti leswi nga lavekiki.”

Xalamukela Mintlhontlho

I ntiyiso leswaku ku lawula ndlela leyi u tirhisaka mali ha yona swa olova ku swi vula hi nomu ku ri ni ku swi endla, ngopfu-ngopfu loko u tshama ekaya u kuma mali yo xava leswi u swi lavaka kumbe u tirha. Hikwalaho ka yini? Hikuva swi nga ha endleka vatswari va wena va hakela swo tala swa swikweleti leswi nga kona. Xisweswo u nga ha sala ni mali yo tala leyi u nga xavaka xin’wana ni xin’wana lexi u xi rhandzaka. Ku xava leswi u swi rhandzaka swa tsakisa. Paresh, muntshwa la tshamaka eIndiya u ri: “Swa ndzi olovela ku tirhisa mali, naswona ndza swi tsakela.” Sara la tshamaka eAustralia u titwa hi ndlela leyi fanaka. U ri: “Ku xava swilo swa ndzi nyanyula.”

Tlhandlakambirhi, vanghana va wena va nga ha ku kucetela leswaku u xava swilo swo tala. Ellena, la nga ni malembe ya 21, u ri: “Tintangha ta mina se ti tihungasa hi ku xava. Loko hi ri swin’we, swi vonaka onge ku ni nawu lowu nga tsariwangiki helo lowu nge, xava leswaku u ta tsaka.”

I swa ntumbuluko leswaku u lava ku endla leswi vanghana va wena va swi endlaka. Kambe tivutise ‘Xana ndzi tirhisa mali ni vanghana va mina hileswi ndzi nga na yona kumbe, hileswi ndzi faneleke ku endla tano?’ Vanhu vo tala va tlangisa mali ya vona leswaku va tsakisa vanghana. Loko wo ti toloveta mukhuva lowu swi ta ku vangela swiphiqo leswikulu swa timali, ngopfu-ngopfu loko u ri ni khadi ra xikweleti. Mutsundzuxi wa swa timali Suze Orman u ri: “Loko u titwa u lava ku tsakisa vanhu hileswi u nga na swona, ku ri ni ku va tsakisa hileswi u nga swona, u le khombyeni ro tlanga hi khadi ra wena ra xikweleti.”

Ematshan’weni yo tirhisa khadi ra wena hi vusopfa kumbe ku dya muholo wa wena hinkwawo hi vusiku byin’we, ha yini u nga ringeti leswi endliwaka hi Ellena? U ri: “Loko hi ya eswitolo ni vanghana, ndzi kunguhata ka ha ri emahlweni leswaku ndzi ta tirhisa mali muni. Muholo wa mina wu nghena ebanki hi ku kongoma, kutani ndzi teka ntsena mali leyi ndzi nga ta yi tirhisa siku rero. Ndzi swi kuma swi pfuna ku ya eswitolo ni vanghana lava nga ni vuxiya-xiya loko va tirhisa mali ya vona, lava ndzi khutazaka ku rhanga ndzi langutisa minxavo yo hambana-hambana ndzi nga si xava leswi ndzi swi vonaka ku sungula.”—Swivuriso 13:20.

Dyondza Swo Karhi Loko Vatswari Va Wena Va Ku Alela

Hambiloko u nga kumi mali yo karhi kumbe u nga tirhi, u nga ha dyondza swo karhi hi mali loko wa ha tshama ekaya. Hi xikombiso, loko u kombela mali eka vatswari va wena kumbe u va kombela ku ku xavela swo karhi, va nga ha ala. Ha yini? Xivangelo xin’wana ku nga ha va leswaku leswi u swi koxaka swi durha ku tlula mali leyi ndyangu wu nga na yona. Hi ku bakanya xikombelo xa wena—hambileswi kahle-kahle va swi lavaka ku ku pfuna—vatswari va wena va ku vekela xikombiso lexinene xa ku tikhoma. Ku tikhoma i swa nkoka leswaku munhu a ta kota ku tirhisa mali ya yena kahle.

A hi nge vatswari va wena va na yona mali ya ku ku xavela xin’wana ni xin’wana lexi u xi lavaka. Kambe va ala ku ku xavela nchumu wo karhi. U nga ha ehleketa leswaku va tsonana. Kambe, ehleketa: Va nga ha va va ku dyondzisa dyondzo ya nkoka ya leswaku ku tsaka ka wena a swi titsheganga hi ku kuma hinkwaswo leswi u swi lavaka. Emhakeni leyi Bibele yi ri: “La rhandzaka silivhere ntsena a nge enerisiwi hi silivhere, hambi ku ri la rhandzaka rifuwo a nge enerisiwi hi vuyelo.”—Eklesiasta 5:10.

Ntiyiso wa mhaka leyi wu seketeriwa hi vuyelo lebyi vantshwa vo tala lava vatswari va vona va va xavelaka hinkwaswo leswi va swi lavaka va va ka na byona. Ku nga ri kungani vantshwa va swi xiya leswaku a va eneriseki. Hambi vo va ni swilo swo tala, va tshama va lava ku engetela swo karhi eka leswi va nga na swona. Hi ku famba ka nkarhi vantshwa lava toloveleke ku kuma hinkwaswo leswi va swi lavaka, loko va kurile va nga va vanhu lava pfumalaka ku nkhensa. Solomoni u lemukisile: “Loko munhu a lema nandza [kumbe n’wana] wakwe ku sukela evuntshweni, evuton’wini byakwe lebyi landzelaka u ta va la nga nkhensiki.”—Swivuriso 29:21.

Ku Tirhisa Mali Swi Lava Nkarhi

Tinxaka tin’wana ti ni xivulavulelo lexi nge, Nkarhi i mali. Leswi swi kandziyisa mhaka ya leswaku vanhu va fanele ku heta nkarhi wo karhi va tirha leswaku va ta hola, kutani loko va tlanga hi nkarhi swi fana niloko va tlanga hi mali. Loko hi hundzula marito lawa hi kuma marito lawa na wona ma nga ntiyiso lama nge—mali i nkarhi. Loko u tlanga hi mali, kahle-kahle u tlanga hi nkarhi lowu u wu heteke u tirhela mali yoleyo. Dyondza ku tirhisa mali ya wena hi vukheta kutani u ta dyondza ku lawula nkarhi wa wena. Njhani?

Ehleketa hi marito ya Ellena. U ri: “Loko ndzi lawula mali leyi ndzi yi tirhisaka, ndzi va ndzi ri eku lawuleni ka mali leyi ndzi yi holaka. Hi ku tirhisa mali ya mina hi ndlela leyi ndzi yi hleleke ha yona, swi endla leswaku ndzi nga tirhi tiawara to tala leswaku ndzi ta hakela swikweleti leswikulu leswi ndzi tivangeleke swona. Ndzi kota ku lawula nkarhi ni vutomi bya mina.” Xana a wu nge swi rhandzi ku va ni langutelo ro tano hi vutomi bya wena?

SWIVUTISO SWO ANAKANYISISA HA SWONA

◼ Xana swa ku tikela ku lawula ndlela leyi u tirhisaka mali ya wena ha yona? Ha yini?

◼ Hikwalaho ka yini u fanele u papalata ku rhandza mali?—1 Timotiya 6:9, 10.

[Nhlamuselo ya le hansi]

a Mavito ma cinciwile.

[Bokisi/Xifaniso lexi nga eka tluka 12]

Xana Mali Yi Nga Tlhantlha Swiphiqo Swa Timali?

Xana ku va ni mali yo tala swi nga herisa swiphiqo swa wena swo tsandzeka ku tirhisa mali ya wena hi vukheta? Mutsundzuxi wa swa timali Suze Orman u ri: “Hinkwerhu ka hina hi ehleketa leswaku swiphiqo swa hina swa timali swi nga hela loko ho hola mali yo tala, kambe hakanyingi a swi tano.”

Hi xikombiso: Loko a wu ri eku chayeleni kutani u tsandzeka ku lawula movha wa wena kumbe u ri ni mukhuva wa ku chayela movha u pfale matihlo, xana ku tatisa petirolo a swi ta ku endla u chayela kahle? Xana sweswo a swi ta ku endla u fika u hlayisekile laha u yaka kona? Hilaha ku fanaka, loko u nga dyondzi ku tirhisa mali ya wena hi vukheta, ku hola mali yo tala a swi nge endli leswaku xiyimo xa wena xi antswa.

[Bokisi/Chati leyi nga eka tluka 13]

LAWULA MATIRHISELO YA WENA YA MALI

Xana u tirhise mali muni n’hweti leyi nga hundza? U xave yini hi mali ya kona? Xana a wu swi tivi? Hi leyi ndlela yo lawula matirhiselo ya wena ya mali swi nga si ku peta nhloko.

◼ Tsala hinkwaswo leswi u swi xavaka. Yi tsale ehansi mali leyi u yi kumaka ni siku leri u yi kumaka ha rona ku ringana n’hweti. Tsala xin’wana ni xin’wana lexi u xi xavaka ni leswaku xi vitana mali muni. Loko ku hela n’hweti, hlanganisa timali hinkwato leti u ti kumeke u tlhela u hlanganisa ni timali hinkwato leti u ti tirhiseke.

◼ Hlela matirhiselo ya mali. Teka phepha ro tsalela eka rona leri nga tsariwangiki nchumu kutani u dirowa tikholomu tinharhu. Eka kholomu yo sungula, tsala timali hinkwato leti u languteleke ku tikuma hi n’hweti. Eka kholomu ya vumbirhi, xaxameta leswi u nga ta swi endla hi mali ya wena; tirhisa leswi u swi tsaleke eku sunguleni leswaku swi ku olovela. Loko n’hweti yi ya yi famba, tsala eka kholomu ya vunharhu mali leyi u yi tirhisaka ku xava kumbe ku hakelela leswi u hleleke ku swi xava. Tlhela u tsala hinkwaswo leswi u swi xavaka u nga swi kunguhatanga.

◼ Lulamisa pulani ya wena. Loko u tirhisa mali yo tala ku tlula leyi u hleleke ku yi tirhisa naswona swi ku vangela swikweleti, lulamisa pulani ya wena. Hakela swikweleti swa wena. Lawula ndlela leyi u tirhisaka mali ha yona.

[Chati]

Xi namekete kun’wana u xi tirhisa!

Ku Hlela Mali Ya Mina Ka N’hweti Ni N’hweti

Mali leyi ndzi Mali leyi ndzi

Leyi ngheneke lavaka ku yi tirhisa yi tirhiseke

mali leyi ndzi swakudya

yi kumeke

ntirho wa swiambalo

nkarhinyana

swin’wana riqingho

vuhungasi

minyikelo

mali leyi ndzi nga

ta yi veka

swin’wana

Ntsengo Ntsengo Ntsengo

R R R

[Xifaniso]

Tsundzuka, loko u tlanga hi mali, u le ku tlangeni hi nkarhi lowu u wu tirhiseke ku tirhela mali yoleyo

[Xifaniso lexi nga eka tluka 11]

Ha yini u nga kombeli vatswari va wena va ku komba ndlela ya ku hlela mali?

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela