Ta Rivala
◼ Vana va le Brazil lava endlaka 60 wa tiphesente va bola meno va nga si va ni malembe manharhu. Xin’wana xa swivangelo sweswo i ku va mamisa bodlhela nivusiku, leri hakanyingi ri cheriweke swakunwa swo tsokombela, kambe va nga khathaleli meno ya vona hi mfanelo.—FOLHA ONLINE, BRAZIL.
◼ Kotara ya vana lava velekiwaka eUnited States masiku lawa va velekiwa hi ndlela yo endla Vuhandzuri. EDorobeni ra New York, nhlayo yoleyo yi tlakuke hilaha ku phindhekeke ka ntlhanu eka ya 1980. Xivangelo hileswaku swa olova ku endla sweswo, kambe makhombo yo endla vuhandzuri byo tano swi nga fanelanga i “makulu ngopfu.”—THE NEW YORK TIMES, U.S.A.
◼ Emalembeni ya 100 lama hundzeke, maxelo lama tolovelekeke ya le Dorobeni ra Mexico ma tlakuke hi kwalomu ka mune wa tidigri ta Celsius, kasi emisaveni hinkwayo ku ve 0,6 wa tidigri ta Celsius. Vativi va vona onge swi vangiwa hi ku tsemeleriwa ka makhwati ni ku cinca-cinciwa ka tindhawu ti va madoroba.—EL UNIVERSAL, MEXICO.
◼ Ku tlula hafu ya mimpatswa leyi tekanaka eUnited States, hi leyi ana se a yi tshama swin’we. Khombo ra leswaku mimpatswa yoleyo yi dlaya vukati i rikulu loko ri pimanisiwa ni mimpatswa leyi tekaneke yi nga si tshama swin’we.—PSYCHOLOGY TODAY, U.S.A.
Mikhuva Leyi Nyenyetsaka eNtirhweni
Washington Post ya vika: “Ku vulavulela ehenhla loko u ri eriqinghweni, [ku tirhisa] swipikara swa riqingho ni ku tshamela ku vilela hi ntirho wo tala lowu munhu a nyikiweke wona hi swona leswi nga le henhla ka nxaxamelo wa swilo leswi nyenyetsaka ngopfu hi vatirhi-kulorhi.” Mikhuva yin’wana leyi nyangatsaka vatirhi-kulorhi i “mintlawa-ntlawa leyi vumbiwaka hi vatirhi-kulorhi, ku fika entirhweni nkarhi se wu hundzile, munhu la vulavulaka a ri swakwe, ku vulavula ni mutirhi-kulobye va ri karhi va huwelelana un’wana ni un’wana a ri ehofisini yakwe, munhu la nga hlambiki a basa kahle ni lava ncakunhaka ngopfu loko va ri karhi va dya.” Mikhuva yo tano yo biha yi kavanyeta ni vatirhi leswaku va nga pindzuli kahle. Kambe, vo tala lava hlamuleke swivutiso swa valavisisi va pfumerile leswaku a va si tshama va bula ni vanhu lava va va nyangatsaka hi mikhuva yoleyo. Phepha-hungu leri ri ri: “Naswona ku ni xivangelo lexi twalaka xa sweswo. Lava nga ni swivilelo swo tano na vona va nga va va endla leswi fanaka.”
Se Ku Ni Vanhu Vo Tala Lava Tshamaka eMadorobeni
CBC News yi ri: “Hafu ya vaaka-tiko va misava va ta va va tshama emadorobeni emalembeni mambirhi lama taka. Hi ku ya hi xiviko xa Nhlangano wa Matiko, United States ri ni vanhu vo tala ngopfu lava tshamaka emadorobeni ku tlula matiko hinkwawo ya misava, laha ku nga ni vanhu va kaye eka va khume lava tshamaka emadorobeni. Emalembeni ya 55 lama hundzeke, New York na Tokyo a ko va wona ntsena madoroba mambirhi lama nga ni vanhu va timiliyoni ta khume kumbe ku tlula ta vanhu lava tshamaka emadorobeni. Namuntlha, se ku ni madoroba ya 20 lama nga ni vanhu lava tlulaka eka khume ra timiliyoni, ku katsa na Jakarta, Doroba ra Mexico, Mumbai na São Paulo. Kofi Annan, murhangeri-nkulu wa Nhlangano wa Matiko, u ri: “Ku engeteleka ko tano ka xihatla ku ta lava leswaku ku endliwa mindzulamiso leyikulu ya ikhonomi ni ya tiko ematikweni yo tala.”
Lava Alaka Hikwalaho Ka Ripfalo
Komiti ya Timfanelo ta Vanhu ya le Riphabliki ra Korea yi vula leswaku lava alaka ku nghenela vusocha hikwalaho ka ripfumelo va ni mfanelo yo endla tano. Komiti leyi yi bumabumele leswaku mfanelo leyi yi fanele yi xiximiwa hi ku endla leswaku lava va nga laviki ku nghenela vusocha va nyikiwa ntirho wun’wana wo tirhela tiko. The Korea Times yi vula leswaku xibumabumelo lexi xi “hambana” ni xiboho lexa ha ku tekiwaka hi Huvo ya Vumbiwa lexi seketelaka milawu leyi nga kona ya vusocha, yi hava lunghiselelo ra lava alaka hikwalaho ka ripfumelo ra vona. Huvo-nkulu leyi yi vule leswaku nawu lowu wu fanele wu vekiwa hi vaveki va milawu ku nga ri hi tihuvo ta vuavanyisi. Lembe ni lembe, vantshwa va majaha va le xikarhi ka 500 na 700 lava nga Timbhoni ta Yehovha va yisiwa ejele le Riphabliki ra Korea hikwalaho ko ala ku nghenela vusocha. Emalembeni lama hundzeke, Timbhoni ta kwalomu ka 10 000 ti pfaleriwile hikwalaho ka xivangelo lexi fanaka.