Xana Swi Fanerile Ku Masaja Xihlangi?

HI MUTSARI WA XALAMUKA! LE SPANIYA

ANITA, manana la ha riki muntshwa wa le Nigeria, u hlambisa xihlangi xakwe kutani a xi masaja (kandza-kandza miri) hi vukheta. Manana ni xihlangi xakwe a va ri eku tiphineni. Anita u ri: “Lowu i mukhuva lowu tolovelekeke eka vamanana va le Nigeria wo khathalela swihlangi swa vona. Mana wa mina a a tala ku masaja mina na vabuti. Ku masaja xihlangi swa pfuna swinene eku tiyiseni misiha ya xona ni ku endla leswaku miri wa xona wu ntshunxeka kahle. Loko ndzi ri karhi ndzi masaja xihlangi xa mina, ndza xi yimbelelela ni ku vulavula na xona, kutani xi hlekelela xi tlhela xi n’wayitela. A hi ku tsakisa ka swona!”

Ematikweni yo tala swi tolovelekile ku masaja swihlangi, naswona se swi sungula ku rhandziwa ematikweni man’wana ya le Vupela-dyambu. Hi ku ya hi Vandla ra le Spaniya ra ku Masaja Swihlangi, ku xi masaja i ndlela leyinene, yo tsakisa, leyi pfunaka mutswari ku vulavula ni xihlangi hi ku xi khoma-khoma ni hi ku bula kunene. Swi katsa ku tshamela ku xi swoswa-swoswa hi ndlela ya rirhandzu eminkondzweni ni le milengeni swin’we ni le nhlaneni, exifuveni, ekhwirini, emavokweni ni le xikandzeni.

Xana xihlangi xi pfuneka njhani loko xi masajiwa? Xa nkoka ngopfu, xi titwa xi rhandziwa. Xihlangi lexa ha ku velekiwaka a xo lava ku wundliwa ntsena kambe xi lava ni rirhandzu ra vatswari. Tanihi leswi n’wana a vaka ni switwi a ha ri ntsongo, loko manana kumbe tatana a masaja n’wana wakwe, swi endla leswaku n’wana loyi a titwa a rhandziwa. Vatswari va nga dyondzisa n’wana swo tala leswi va lavaka leswaku a swi tiva. Ku masaja xihlangi swi nga pfuna ku tiyisa vuxaka exikarhi ka vatswari ni xihlangi xa vona ku sukela loko xa ha ku velekiwa.

Ku masaja xihlangi swi kombisa leswaku wa xi rhandza naswona swi nga xi dyondzisa leswaku xi va ni ku rhula, leswi nga endlaka leswaku xi etlela nkarhi wo leha naswona xi nga vi na ntshikilelo lowukulu. Swi nga tlhela swi xi pfuna leswaku misiha ya xona ya ngati, fambiselo ro gayela ni ra moya swi tirha kahle. Van’wana va vula leswaku swi pfuna ni fambiselo ra nsawutiso ra n’wana. Ku masaja xihlangi swi nga tlhela swi xi pfuna leswaku xi tsundzuka swilo ni ku dyondza hi ku olova, tanihi leswi ku xi masaja swi khumbaka switwi swa xona, leswi xi swi vonaka, ni ndlela leyi xi twaka mpfumawulo ha yona.

Swibedlhele swin’wana swi endle vukambisisi malunghana ni ndlela leyi ku masaja xihlangi swi nga swa risima ha yona. Hi xikombiso, nkambisiso wun’wana wu kume leswaku swihlangi leswi velekiweke nkarhi wa swona wu nga si fika swi ntshunxiwa exibedlhele ka ha sele masiku ya nkombo loko swi pimanisiwa ni leswi nga masajiwangiki, naswona swi engetela ntiko wa swona hi mpimo lowu fikaka ni le ka 47 wa tiphesente loko swi pimanisiwa ni leswin’wana.

Swi le rivaleni leswaku a hi vanhu lavakulu ntsena lava vuyeriwaka hi ku masajiwa! Phela, ku masaja xihlangi a swi heleli kwalaho ntsena. Ku va ku ri rirhandzu leri kombisiwaka hi mavoko yo kufumela ni tintiho ta vurhon’wana, leswi fambisanaka ni n’wayitelo lowukulu.