Leti Humaka Eka Vahlayi
Ntlhamu Wa Ku Nwa—Xana U Le Khombyeni? (October 8, 2005) Ndzi hlaye mapapila yo tala lama humaka eka vahlayi lava tsaleke va ku: “Xihloko lexi xi fike hi nkarhi lowu faneleke.” A ndzi nga anakanyi leswaku na mina ndzi nga titwa hi ndlela leyi fanaka, kambe swi ve tano loko ndzi ri karhi ndzi hlaya swihloko leswi swa ntlhandlamano. Se i nkarhinyana ndzi karhatekile hi ndlela leyi ndzi nwaka ha yona siku ni siku, hambileswi a ndzi nga dakwi. Hiloko ku fika magazini lowu. Endzhaku ko hlaya hi makhombo lama nga vaka kona, ndzi vone swi fanerile ku tshika ku nwa byala.
K. W., Jarimani
Swihloko leswi swi vulavule hi ntokoto wa Hilario, loyi a heteke malembe ya 30 a ri karhi a nwa naswona u “rhetemuke ko tala” loko a ri karhi a ringeta ku tshika. U vule leswaku swirho swa vandlha “minkarhi hinkwayo a [swi] ri etlhelo ka mina ku ndzi seketela.” Kambe, xana a a nga fanelanga a layiwa kumbe ku susiwa evandlheni ra Vukreste?
R. L., United States
“Xalamuka!” ya hlamula: Matimu yo koma ya Hilario a ma boxi leswaku eka malembe yakwe ya 30 a ri karhi a lwa ni byala, u khuvuriwe rini tanihi Mukreste. Naswona a ma boxi loko a tshame a soriwa hi vakulu va vandlha. Xihloko lexi xi boxa leswaku Hilario u nyikiwe “ndzayo ya Bibele hi nkarhi” leyi minkarhi yin’wana yi nyikiwaka hi huvo ya vuavanyisi. Vanhu lava lwaka ni vudakwa va rhetemuka minkarhi yin’wana, hilaha swi veke hakona hi Hilario. Leswaku mhaka yo fana ni leyi yi tirhiwa njhani loko Mukreste la khuvuriweke a wela evudakweni, hi kombela u vona “Xihondzo xo Rindza” xa Xinghezi xa May 1, 1983, matluka 8-11.
Vantshwa Va Vutisa . . . Ha Yini Ndzi Rhandza Vanhu Lava Nga Riki Vanene? (August 8, 2005) Xihloko lexi xi ndzi pfunile ku vona leswaku a ndzi fanelanga ku kanakana eka tipakani ta mina. Xi ndzi khutazile leswaku ndzi nga ha tlheleli endzhaku tanihi leswi ndzi tiyimiseleke ku hambana ni vanghana lava nga riki vanene. Sweswi ndzi ni xinghana lexikulu ni vo tala evandlheni, lavakulu ni lavatsongo, leswi swi ndzi endle ndzi titwa ndzi rhandziwa hi vanhu lava rhandzaka Yehovha ni lava va ndzi khutazaka ku khomelela endleleni leyi yaka evuton’wini.
M. D., Mexico
A Ndzi Tiyimiserile Ku Fikelela Pakani Ya Mina (July 8, 2005) Loko ndzi ri karhi ndzi hlaya ntokoto wa Martha, a ndzi xiririka ni mihloti. Na mina ndzi ni vuvabyi bya switshetshela. Se ndzi ni malembe ya khume ndzi ri muhuweleri wa mahungu lamanene wa nkarhi hinkwawo, minkarhi yin’wana swa ndzi tikela—ngopfu-ngopfu loko ndzi tshuka ndzi titivarile hikwalaho ka vuvabyi lebyi. Ku tiyimisela ka mina leswaku ndzi nga karhali ku tiyisiwe hi mhaka ya Martha. Yi ndzi chavelerile hakunene.
J. S., Poland
Ndzi ni xiphiqo lexi fanaka ni xa Marha. Endzhaku ko hlaya mhaka yakwe, na mina ndzi sungule ku va ni vuxiyaxiya hi swakudya. Ku hundze malembe lama tlulaka khume ndzi pfumelele vuvabyi bya switshetshela byi ndzi sivela ku tirhela Yehovha hi vutalo. Kambe emalembeni ya kwalomu ka manharhu lama hundzeke, ndzi sungule ku tirha tanihi muevhangeli wa nkarhi hinkwawo, naswona a ndzi tisoli hi ku endla sweswo. Onge Yehovha a nga mi katekisa hi ku kandziyisa swihloko swo tano leswi nga ni mintokoto leyi khutazaka!
B.C.C., Brazil
Lexi xi ndzi tsakiseke ngopfu hi xihloko lexi hileswaku Martha a nga helanga matimba. Ndzi chavelelekile hikuva hambileswi ntirho wa yena a wu pfa wu kavanyeteka, a a ri ni vonelo lerinene ni ku tshemba leswaku Yehovha wa tsaka hi ntirho wa hina lowu hi wu endlaka hi mbilu hinkwayo.
S. H., Japani
Ndzi langutane ni xiyimo lexi fanaka ni xa Martha, naswona ndzi fanele ndzi xiya leswaku a ndzi nge fikeleli hinkwaswo leswi ndzi swi lavaka. Ku fana na Martha, ndzi swi kotile ku tirha tanihi muevhangeli wa nkarhi hinkwawo. Xisweswo mhaka ya yena yi ndzi khutazile swinene.
F. G., Switzerland