Ndzima 74
Ndzayo Leyi Yaka Eka Marta, Ni Dyondzo eHenhleni Ka Xikhongelo
HI NKARHI wa vutirheli bya Yesu bya le Yudiya, u nghena emutini wa Betaniya. Laha hi laha Marta, Mariya ni makwavo wa vona wa xinuna Lazaro va tshamaka kona. Kumbexana Yesu u hlangane ni lava vanharhu eku sunguleni evutirhelini bya yena naswona ana se i munghana lonkulu wa vona. Eka xiendlakalo xin’wana, Yesu u ya emutini wa Marta naswona u amukeriwa hi yena.
Marta u gingiritekela ku nyika Yesu leswinene ngopfu leswi a nga na swona. Hakunene, i ku dzuneka lokukulu ku va Mesiya la tshembisiweke a endzela kaya ra munhu! Kutani Marta u sungula ku lunghiselela swakudya swa le henhla naswona u endla leswaku swilo swin’wana swo tala swi kunguhatiwa leswaku ku endza ka Yesu ku va loku tsakisaka ni loku phyuphyisaka.
Hi tlhelo rin’wana, Mariya makwavo wa Marta wa xisati u tshame ehansi emilengeni ya Yesu kutani a n’wi yingisela. Endzhaku ka nkarhinyana, Marta wa tshinela kutani a ku eka Yesu: “Hosi, xana a hi nchumu eka wena loko makwerhu a ndzi tshika ndzi tirha swa vayeni ndzi ri ndzexe? N’wi byeli a ndzi pfuna.”
Kambe Yesu u ala ku vula xanchumu eka Mariya. Ematshan’wini ya sweswo, u tshinya Marta hikwalaho ka ku khathalela ngopfu swilo leswi vonekaka. U tshinya hi tintswalo a ku: “Marta, Marta, u vilela ni ku tikarhata hi leswo tala; kasi xilo lexi pfumariwaka i xin’we ntsena.” Yesu u vula leswaku a hi swa nkoka ku heta nkarhi wo tala a lunghiselela tindyelo to tala ta swakudya. Tindyelo tintsongo ntsena kumbe hambi ku ri yin’we ntsena yi ringene.
Makungu ya Marta i manene, u lava ku va muamukeri wa vayeni loyi a nga ni malwandla. Kambe, hi ku hisekela ka yena malunghiselelo ya swa nyama, u lahlekeriwa hi nkarhi wo kuma dyondzo ya munhu hi xiyexe leyi humaka eka N’wana wa Xikwembu hi yexe! Kutani Yesu u heta hi ku: “Kutani Mariya u tihlawulela ku averiwa lokunene, loku a nga ta ka a nga tekeriwi kona.”
Endzhakunyana, hi nkarhi wun’wana, mudyondzisiwa u kombela Yesu a ku: “Hosi, hi dyondzise ku khongela, hikuva Yohane na yena ú dyondzisile vadyondzisiwa va yena.” Kumbexana mudyondzisiwa loyi a a nga ri kona kwalomu ka lembe ni hafu eku sunguleni loko Yesu a nyikele xikhongelo xa xikombiso eDyondzweni ya yena ya le Ntshaveni. Kutani Yesu u phindha swiletelo swa yena kambe endzhaku a ya emahlweni a nyika xifaniso ku tiyisisa xilaveko xa ku phikelela eku khongeleni.
“Un’wana wa n’wina a nga va ni nakulobye,” ku sungula Yesu, “kutani a ya eka yena exikarhi ka vusiku, a ku ka yena: ‘Nakulorhi, ndzi lombe swinkwa swinharhu hikuva nakulorhi un’wana la nge riendzweni ú fikile kwala ka mina, kutani ndzi pfumala leswi ndzi nga n’wi fihlutaka ha swona.’ Kambe yena a n’wi hlamula a ri ndlwini a ku: ‘U nga ndzi karhati, nyangwa yi pfariwile; mina ni vana hi etlele, a ndzi swi koti ku pfuka, ndzi ku nyika.’ Mina ndzi ri: Hambi loko a nga lavi ku pfuka a n’wi nyika, hi mhaka ya vunakulobye bya vona ú ta kala a pfuka, a n’wi nyika hinkwaswo leswi a swi lavaka hikuva wa sindzisa.”
Hi ku pimanyeta loku Yesu a nga vuleli swona ku kombisa leswaku Yehova Xikwembu a nga lavi ku amukela swikombelo, tanihi leswi munghana luya a a ri tano emhakeni ya yena. E-e, kambe u kombisa leswaku loko munghana loyi a nga swi laviki a ta amukela swikombelo leswi phikelelaka, Tata wa hina wa rirhandzu la nge matilweni u ta endla swo tlula sweswo! Kutani Yesu u ya emahlweni a ku: “Hikokwalaho ke ndzi ri ka n’wina: Kombelani, mi ta nyikiwa; lavani, mi ta swi kuma; gongondzani mi ta pfuleriwa. Hikuva un’wana ni un’wana la kombelaka, wa nyikiwa; la lavaka, wa swi kuma; ku ta pfuleriwa la gongondzaka.”
Yesu u kombetela eka vatatana va vanhu lava nga hetisekangiki, lava dyohaka, a ku: “Tata wa munhu hi wihi exikarhi ka n’wina, loyi ku nga ku loko n’wana wa yena a kombela nhlampfi, a nga n’wi nyikaka nyoka ematshan’wini ya nhlampfi xana? Ni loko a kombela tandza, ú ta n’wi nyika xipame xana? Kutani ke, leswi n’wina mi nga vanhu va tihanyi, mi tivaka ku nyika vana va n’wina swilo leswinene, xana Tatana wa le tilweni a nge tlurisi ngopfu ku nyika Moya lowo Kwetsima eka lava kombelaka ka yena xana?” Hakunene, mawaku xikhutazo lexi susumetaka swonghasi lexi Yesu a xi nyikaka xa ku phikelela eswikhongelweni. Luka 10:38–11:13.
▪ Ha yini Marta a endlela Yesu malunghiselelo yo kurisa leswi?
▪ Xana Mariya u endla yini, naswona ha yini Yesu a n’wi bumabumela ematshan’wini yo bumabumela Marta?
▪ I yini lexi susumetelaka Yesu ku phindha swiletelo swa yena ehenhleni ka xikhongelo?
▪ Yesu u xi kombisa njhani xilaveko xa ku phikelela eku khongeleni?