Tidyondzo Hi Malwandla Ni Xikhongelo

Evuxeni bya Ntshava ya Mitlhwari, kwalomu ka 3 wa tikhilomitara ku suka eYerusalema, ku ni muti wa Betaniya. (Yohane 11:18) Yesu u ya kwalaho naswona u nghena ekaya ra vamakwavo vambirhi va xisati, ku nga Marta na Mariya. Vona ni makwavo wa xinuna Lazaro, i vanghana va Yesu naswona va n’wi amukela hi malwandla.

I nkateko ku endzeriwa hi Mesiya. Marta u gingiritekela ku kombisa Yesu malwandla, kutani u sungula ku lunghiselela swakudya swo tala. Loko Marta a ri karhi a tirha, makwavo Mariya u tshama emilengeni ya Yesu a n’wi yingisela. Swi nga si ya kwihi, Marta u ri eka Yesu: “Hosi, xana a wu na mhaka ni leswi makwerhu a nga ndzi pfuniki? N’wi byele a ta ndzi pfuna.”—Luka 10:40.

Ematshan’weni yo sola Mariya, Yesu u tshinya Marta hileswi a karhatekaka ku tlula mpimo hi swakudya, a ku: “Marta, Marta, u vilela ni ku karhateka hi swilo swo tala. Ku laveka swilo switsongo kumbe xin’we ntsena. Loko ku ri Mariya, u hlawule leswinene naswona a nge tekeriwi swona.” (Luka 10:41, 42) Yesu u kombisa leswaku a hi swa nkoka ku heta nkarhi wo tala hi ri karhi hi sweka swakudya swo tala. Swakudya leswi nga riki swa xiyimo xa le henhla swi ringene.

Swikongomelo swa Marta swi kahle. U lava ku kombisa malwandla. Kambe ku vilerisiwa kakwe hi swakudya ku endla leswaku a lahlekeriwa hi dyondzo ya nkoka leyi humaka eka N’wana wa Xikwembu. Yesu u kandziyisa leswaku Mariya u teke xiboho xa vutlhari, lexi nga ta n’wi vuyerisa hilaha ku nga heriki ni dyondzo leyi hinkwerhu hi nga ta yi tsundzuka.

Eka xiendlakalo xin’wana, Yesu u dyondzisa dyondzo leyi hambaneke kambe leyi na yona yi nga ya nkoka. Mudyondzisiwa un’wana u n’wi vutisa a ku: “Hosi, hi dyondzise ndlela yo khongela, hilaha Yohane a dyondziseke vadyondzisiwa vakwe hakona.” (Luka 11:1) Yesu u swi endlile sweswo kwalomu ka lembe ni hafu leri hundzeke eDyondzweni yakwe ya le Ntshaveni. (Matewu 6:9-13) Kambe swi nga endleka leswaku mudyondzisiwa loyi a nga ri kona hi nkarhi wolowo kutani Yesu u phindha tinhla ta nkoka. Hikwalaho, u hlamusela xifaniso lexi kombisaka nkoka wo phikelela exikhongelweni.

Kutani u va byela a ku: “A hi nge un’wana wa n’wina u ni munghana, kutani a ya eka yena nivusiku a fika a ku, ‘Munghana, ndzi lombe swinkwa swinharhu, hikuva ndza ha ku endzeriwa hi un’wana wa vanghana va mina naswona ndzi hava swo n’wi nyika swona.’ Munghana wakwe a n’wi hlamula a ri endzeni ka yindlu a ku: ‘Tshika ku ndzi karhata. Nyangwa se wu khiyiwile naswona mina ni vana va mina se hi etlele. A ndzi nge swi koti ku pfuka ndzi ku nyika swo karhi.’ Ndza mi byela, u ta pfuka a n’wi nyika leswi a swi lavaka ku nga ri hileswi a nga munghana wakwe, kambe hikwalaho ka ku phikelela kakwe.”—Luka 11:5-8.

Yesu a nga vuli swona leswaku Yehovha a nga swi lavi ku hlamula swikombelo hilaha munghana a endleke hakona. Kambe u kombisa leswaku loko munghana loyi a nga laviki ku amukela xikombelo a amukela swikombelo leswi phikelelaka, Tata wa hina wa rirhandzu wa le tilweni u ta swi hlamula swikombelo swa malandza yakwe yo tshembeka. Yesu u ya emahlweni a ku: “Hikwalaho ndzi ri eka n’wina, yanani emahlweni mi kombela, mi ta nyikiwa; yanani emahlweni mi lava, mi ta swi kuma; yanani emahlweni mi gongondza, mi ta pfuleriwa. Hikuva loyi a kombelaka u ta nyikiwa, loyi a lavaka u ta swi kuma naswona loyi a gongondzaka u ta pfuleriwa.”—Luka 11:9, 10.

Yesu u kandziyisa yinhla yakwe hi ku endla xifaniso hi vatatana, a ku: “Xana u kona tatana loyi loko n’wana wakwe a kombela nhlampfi, a nga n’wi nyikaka nyoka ematshan’weni ya nhlampfi? Kumbe loko a kombela tandza, a nga n’wi nyikaka xipamu? Hikwalaho, loko n’wina hambileswi mi nga vadyohi mi kota ku nyika vana va n’wina tinyiko letinene, xana Tata wa n’wina loyi a nge matilweni a nge va nyiki moya lowo kwetsima hilaha ku tlurisaka lava n’wi kombelaka!” (Luka 11:11-13) Mayana xitiyisekiso lexinene swonghasi xa leswaku Tata wa hina wa swi lava ku hi yingisela ni ku hi nyika leswi hi swi lavaka!