Langutelo Ra Bibele

Xana U Nga Va Pfuna Lava Feke?

“Ku sukela eku sunguleni Kereke a yi . . . khongelela lava [feke] . . . leswaku loko va basisiwile, va ta va ni nkateko wo vona Xikwembu.”—“Catechism of the Catholic Church.”

VANHU va tinxaka hinkwato va karhatekile hi xiyimo lexi vafi va nga le ka xona. Kumbexana na wena u titwe u lahlekeriwile swinene loko u loveriwa hi loyi a wu n’wi rhandza. Kumbexana u ehleketa leswaku lava feke ka ha ri ni leswi va swi tivaka, leswaku va le ku xanisekeni kumbe va tshame hi ku rhula, niloko ku ri ni swo karhi leswi u nga va endlelaka swona.

Vanhu vo tala va vukhongeri va tshemba leswaku ku ni swo karhi leswi va nga pfunaka lava feke ha swona. Hi xikombiso, Mahindu ma tshemba leswaku loko mo hisa ntsumbu wa mufi la rhandzekaka etimbuweni ta Nambu wa Ganges kutani nkuma wa yena wu haxiwa ematini ya wona, va tiyiseka leswaku moya-xiviri wa mufi wu ta kuma ntsako wa hilaha ku nga heriki. Etindhawini ta le Vuxeni, Mabudha ma hisa swifaniso swa maphepha swa timovha, tindlu, tinguvu ni swa mali hi ku tshemba leswaku vafi va ta kota ku tirhisa swilo leswi eka misava leyi va yaka eka yona. Laha Afrika, vanhu va phahla emasirheni hi ku chela byala, va tshemba leswaku byi ta pfuna lava feke.

Makhatoliki ma dyondzisa leswaku loko munhu o fa a nga hundzukanga eka “xidyoho lexikulu,” Xikwembu a xi nge n’wi rivaleli. Xiyimo lexi xi “vitaniwa ‘tihele.’” Hi hala tlhelo, va dyondzisa leswaku loyi a nga ni vuxaka lebyinene ni Xikwembu u ni ntshembo wo kuma “ntsako wa hilaha ku nga heriki” ni Xikwembu etilweni kambe u fanele a rhanga hi ku basisiwa. Leswaku a ta basisiwa swi lava leswaku a tshama epagatori a tiyisela ku “basisiwa hi ndzilo” tanihi nxupulo wa swihoxo leswi nga rivaleriwaka. Hambiswiritano, loko a ha ri epagatori mufi a nga pfuniwa hi swikhongelo—ni hi swikhongelo leswi nga nyikeriwaka hi hofisi ya kereke ya khatoliki—ni Swilalelo leswi endleriwaka mufi. Mintirho leyi hi xitalo yi hakeleriwa hi vanghana ni maxaka ya mufi.

I swa ntumbuluko ku lava ku herisa ku vava loku la rhandzekaka eka wena a ku twaka. Loko a swi koteka ku va pfuna, xana Xikwembu a xi nga ta hi hlamusela leswaku hi nga swi endlisa ku yini sweswo? A hi voneni leswi Bibele yi swi dyondzisaka mayelana ni ku pfuna vafi.

Xiyimo xa Vafi

Hinkwaswo leswi ku vulavuriweke hi swona laha henhla swi titshenge hi ntshembo wa leswaku moya-xiviri wa munhu a wu fi, leswi vulaka leswaku moya-xiviri wa munhu wu ya emahlweni wu hanya loko miri wa yena wu fa. Xana leswi hi swona leswi Bibele yi swi dyondzisaka? Bibele yi ri: “Lava hanyaka va swi tiva leswaku va ta fa; kambe loko ku ri lava feke, a va tivi nchumu nikatsongo, naswona a va ha ri na hakelo, hikuva ku tsundzukiwa ka vona ku rivariwile. Rirhandzu ra vona, rivengo ra vona ni mavondzo ya vona se swi herile, naswona a va ha ri na xiavelo hilaha ku nga riki na makumu eka leswi swi nga ta endliwa ehansi ka dyambu. Hinkwaswo leswi voko ra wena ri swi kumaka leswaku ri swi endla, swi endle hi matimba ya wena, hikuva a ku na ntirho hambi ku ri kungu, vutivi kumbe vutlhari eSheol, ndhawu leyi u yaka eka yona.” (Eklesiasta 9:5, 6, 10) Sheol i rito ra Xiheveru leri vulaka sirha leri tolovelekeke ra vanhu.

Mayelana ni leswi endlekaka loko munhu a fa, mupisalema la huhuteriweke u tsale a ku: “Moya wakwe wa huma, a tlhelela entshurini wa yena; hi siku rero miehleketo yakwe ya lova.”—Pisalema 146:4.

Marito ya Bibele ma ni matimba naswona ma twisiseka. Xana u swi vonisa ku yini? Xana tatana la nga ni rirhandzu a nga xanisa vana va yena hikwalaho ka leswi va nga ni mboyamelo wo endla swihoxo? (Genesa 8:21) A swi tano nikatsongo. Kutani, xana Tata wa hina wa le tilweni a nga swi endlisa ku yini sweswo? Loko Vaisrayele va khale va amukele mukhuva wa vahedeni wo hisa vana va vona tanihi magandzelo eka swikwembu swa mavunwa, Yehovha u sole mukhuva wolowo wo biha, a vula leswaku i ‘nchumu lowu a nga wu lerisangiki naswona a wu vanga kona embilwini ya yena.’—Yeremiya 7:31.

Swidyoho swa munhu swi endla leswaku a fa, ku nga ri ku xanisiwa endzhaku ka rifu. Matsalwa ma vula leswaku “hakelo leyi tisiwaka hi xidyoho i rifu,” naswona “loyi a feke, xidyoho xa yena xi hlanguriwile.”—Varhoma 5:12; 6:7, 23.

Vafi a va le ku xanisekeni. Ku ri na sweswo, swi fana niloko va etlele vurhongo lebyikulu, va nga twi nchumu—naswona a va karhatiwi hi nchumu. Swi le rivaleni leswaku hinkwaswo leswi vanhu va swi endlaka ku pfuna vafi a swi fambisani ni leswi Bibele yi swi dyondzisaka.

Hi Wihi Ntshembo Hi Lava Feke?

Leswi a swi vuli swona leswaku varhandziwa va wena lava feke va fele makumu. Ku ri na sweswo, va ni ntshembo lowunene ngopfu.

Loko a nga si pfuxa munghana wa yena lonene Lazaro, Yesu u vule leswaku wa famba ku ya n’wi “pfuxa evurhongweni.” (Yohane 11:11) Eka xiendlakalo xin’wana u vule leswaku ‘hinkwavo lava nga eka masirha-bako ya xitsundzuxo va ta twa rito ra yena kutani va ta huma.’ (Yohane 5:28, 29) Swidyoho swa lava pfuxiweke swi ta va swi hlanguriwile kutani a va nge xanisiwi hikwalaho ka leswi va swi endleke loko va ha hanya, va nga si fa. Va ta va ni lunghelo ro tiphina hi vutomi ehansi ka swiyimo leswi hetisekeke. Lexi i xitshembiso lexinene hakunene!

Loko xitshembiso xexo xi ku tsakisa, u nga kanakani ku kambisisa mhaka leyi. Timbhoni ta Yehovha ti nga tsaka ngopfu ku ku pfuna.

XANA U TSHAME U TIVUTISA?

◼ Xana vafi va twa?—Pisalema 146:4; Eklesiasta 9:5, 6, 10.

◼ Xana Xikwembu xi nga swi pfumelela leswaku vafi va xaniseka etiheleni?—Yeremiya 7:31.

◼ Xana vafi va nga tlhela va pfuka?—Yohane 5:28, 29.