Vantshwa Va Vutisa . . .

Ndzi Nga Wu Hlurisa Ku Yini Mukhuva Lowu?

“Ndzi sungule ku tlangisa swirho swa mina swa rimbewu loko ndzi ri ni malembe ya nhungu hi vukhale. Hi ku famba ka nkarhi ndzi dyondze ndlela leyi Xikwembu xi swi langutaka ha yona ku endla sweswo. A ndzi titwa ndzi nyamile nkarhi ni nkarhi loko ndzi hluriwa hi ndzingo lowu. Ndzi tivutise ndzi ku, ‘Xikwembu xi nga n’wi rhandza njhani munhu wo fana na mina?’ A ndzi swi vona leswaku a ndzi nge ngheni emisaveni leyintshwa ya Xikwembu.”—Luiz.a

KUMBEXANA na wena u hlonga ra ku tlangisa swirho swa wena swa rimbewu ku fana na Luiz. Wa swi tiva leswaku Yehovha u ta tsaka hi wena loko wo ka u nga hluriwi hi ku navela loku kutani u tikhoma, ku nga mbhandzu wa moya wa Xikwembu wo kwetsima. (Vagalatiya 5:22, 23; 2 Petro 1:5, 6) Kambe minkarhi yin’wana wa hluleka ku tikhoma. Naswona loko u rhetile, u tibyela leswaku ku hava lexi u nga xi endlaka, a wu nge swi koti ku cinca, a wu nge swi koti ku hanya hi milawu ya Xikwembu yo lulama.

Leyi hi yona ndlela leyi Pedro la ha riki ntsongo a a titekisa xiswona. U ri: “Loko ndzi rhetemukile, a ndzi khomiwa hi gome. A ndzi vona onge a ndzi nge he swi koti ku lulamisa leswi ndzi swi endleke. A swi ndzi tikela ku khongela. Loko ndzi lava ku khongela a ndzi sungula hi ku: ‘Yehovha, a ndzi tshembi leswaku u ta yingisa xikhongelo lexi, kambe . . . ’” Muntshwa un’wana la vuriwaka André a a titwa hi ndlela leyi fanaka. U ri: “A ndzi tivona ndzi ri mukanganyisi lonkulu. A swi ndzi tikela ku pfuka nimixo leswaku ndzi endla mintirho ya siku. A swi ndzi tikela ku yingisela loko ndzi ri eminhlanganweni ya Vukreste ni ku ya ensin’wini.”

Loko na wena u titwa hi ndlela leyi fanaka ni ya Luiz, Pedro na André, tiya mbilu. A hi wena u ri wexe u lwaka na mhaka leyi, naswona a swi vuli leswaku u nge humeleli. Vantshwa vo tala—ni vanhu lavakulu—va lwisane ni ku tlangisa swirho swa rimbewu naswona va swi kotile ku hlula. Na wena u nga swi kota ku hlula.b

Ku Langutana Ni Gome

Hilaha se swi vuriweke hakona, lava weleke eka mukhuva lowu wo tlangisa swirho swa rimbewu va tivona nandzu. I ntiyiso leswaku ‘ku hlunamisiwa hi ndlela ya vukwembu’ swi nga ku nyika matimba yo lava ku hlula mukhuva lowu. (2 Vakorinto 7:11) Kambe a swi pfuni nchumu ku tshamela ku tivona nandzu. Swi ta ku heta matimba lerova u lava ni ku lan’wa kunene.—Swivuriso 24:10.

Kutani, lwela ku languta timhaka hi tihlo ra xiviri. Ku tlangisa swirho swa rimbewu i mukhuva lowu nga basangiki. Swi nga ku endla ‘hlonga ra ku navela ko hambana-hambana ni mintsako’ naswona swi endla munhu a va ni mavonelo lama nga tlanyataka mianakanyo. (Tito 3:3) Hambiswiritano, ku tlangisa swirho swa rimbewu a hi xidyoho lexikulu ku fana ni vumbhisa. (Vaefesa 4:19) Xisweswo, loko u ri ni xiphiqo xa ku tlangisa swirho swa rimbewu, a wu fanelanga u gimeta hileswaku u endle xidyoho lexi nga taka xi nga rivaleriwi. Mhaka-nkulu i ku lwa ni ndzingo lowu naswona u nga hatli u hela matimba eku lweni ka wena!

Minkarhi yin’wana swa olova ku titwa u hele matimba endzhaku ka loko u rhetile. Loko u titwa hi ndlela yoleyo, tsundzuka marito ya Swivuriso 24:16 lama nge: “Lowo lulama a nga ha wa ka nkombo, kunene u ta pfuka; kambe lavo homboloka va ta khunguvanyisiwa hi khombo.” Loko swo tshuka swi ku kanganyisile, a swi vuli leswaku u munhu wo homboloka. Xisweswo, u nga heli matimba. Ku ri na sweswo, kambisisa leswi ku endleke leswaku u rheta kutani u ringeta ku papalata leswaku u nga weli endzingweni lowu fanaka.

Ematshan’weni yo tshamela ku ti tshandza, tinyike nkarhi wo anakanyisisa hi rirhandzu ra Xikwembu ni musa wa xona. Mupisalema Davhida, loyi na yena a a tsanile minkarhi yin’wana, u te: “Kukota loko tatana a kombisa tintswalo eka vana vakwe, Yehovha u kombise tintswalo eka lava va n’wi chavaka. Hikuva yena u ku tiva kahle ku vumbeka ka hina, wa tsundzuka leswaku hi ntshuri.” (Pisalema 103:13, 14) Ina, Yehovha wa swi tiva leswaku a hi hetisekangi kutani u tshama a “lunghekele ku rivalela” loko hi dyoha. (Pisalema 86:5) Hi hala tlhelo, u langutele leswaku hi endla matshalatshala yo antswisa.

Hi wahi magoza lawa u nga ma tekaka leswaku u hlula mukhuva lowu ni ku endla leswaku u nga weli endzingweni nakambe?

Nkoka Wa Ku Phofula Swa Le Mbilwini

Hambileswi ematikweni yo tala timhaka ta vuxaka bya rimbewu ku vulavuriwaka ha tona swinene, vanhu vo tala swa ha va tikela ku vulavula hi vuxaka bya rimbewu hi ndlela leyi hlutekeke, leyi nga ni xichavo. Na wena swi nga ku khomisa tingana ku bula ni munghana wa wena lonkulu hi mhaka leyi. Mukreste un’wana loyi a a kayakayisiwa hi mukhuva lowu ku ringana malembe yo hlayanyana u te: “Ndzi navela onge loko a ndzi lo va ni xivindzi xa ku byela munhu un’wana loko ndza ha ri muntshwa! A ndzi tshamela ku tivona nandzu malembe yo tala, naswona leswi swi byi khumbe ngopfu vuxaka bya mina ni van’wana, ku tlula kwalaho, swi khumbe vuxaka bya mina na Yehovha.”

Xana u nga vulavula na mani? Munhu loyi a wupfeke hi tlhelo ra moya, ngopfu-ngopfu mutswari, hi yena la nga vaka exiyin’weni lexinene xo bula na yena hi mhaka leyi. U nga ha sungula hi ndlela leyi: “Xana ndzi nga vulavula na wena hi xiphiqo xin’wana lexi ndzi karhataka swinene?”

Mário u kunguhate ku bula ni tata wakwe, loyi a veke ni ntwela-vusiwana naswona a a twisisa. U byele Mário leswaku na yena a a karhatiwa hi xiphiqo lexi loko a ha ri ntsongo. Mário u ri: “Ku tshembeka ka tatana emhakeni leyi swi ndzi khutazile swinene. Ndzi tibyele leswaku loko a swi kotile ku hlula ndzingo lowu, na mina ndzi ta swi kota. Vonelo ra tatana ri ndzi khumbe lerova ndzi sungule ku rila.”

André u kanye mbilu a vulavula ni Mukreste la nga nkulu, naswona wa tsaka hileswi a vulavuleke na yena.c André u ri: “Loko nkulu loyi a ri karhi a ndzi yingisela, mahlo ya yena a ma tenga-tenga mihloti. Loko ndzi heta, u ndzi byele leswaku Yehovha wa ndzi rhandza. U ndzi byele leswaku xiphiqo xa mina xi tolovelekile. U tshembise leswaku u ta tshama a ri karhi a kambela nhluvuko wa mina ni ku ndzi tisela rungula leri humaka eka minkandziyiso yin’wana leyi sekeriweke eBibeleni. Hi ku bula na yena, ndzi tiyimisele ku ka ndzi nga heli matimba—hambileswi ndzi rheteke minkarhi yin’wana.”

Ku fana na Mário na André, na wena u nga kuma mpfuno wo lwisana ni mukhuva wo tlangisa swirho swa rimbewu. Landzela switsundzuxo leswi nga le ka bokisi leri fambisanaka ni xihloko lexi leri nge, “Teka Magoza Yo Lwisana Ni Mukhuva Lowu!” Ina, tiyiseka leswaku u nga swi kota ku hlula mukhuva lowu!

SWIVUTISO SWO ANAKANYISISA HA SWONA

◼ Ha yini swi ri swa nkoka ku tsundzuka leswaku Yehovha u “lunghekele ku rivalela”?—Pisalema 86:5.

◼ Hi wahi magoza lawa u nga ma tekaka leswaku u ta hlula mukhuva lowu wo tlangisa swirho swa rimbewu?

◼ Ha yini u nga fanelanga u khomiwa hi tingana ku kombela mpfuno?

◼ Xana u nga swi kotisa ku yini ku endla leswaku mianakanyo ya wena yi tshama eka swilo leswi tengeke?

[Tinhlamuselo ta le hansi]

[Bokisi/Xifaniso lexi nga eka tluka 19]

Loko U Tshuka U Rhetile A Swi Vuli Leswaku Se U Hluriwile!

Swa olova ku ehleketa leswaku: ‘Ndzi tsandzekile ku tikhoma, xisweswo a ndzi nge swi koti ku hlula mukhuva lowu.’ Lwana ni vonelo ro tano. Loko wo tshuka u rhetile kan’we kumbe ko hlayanyana, u nga pfumeli leswaku sweswo swi ku heta matimba.

Anakanya hi xifaniso lexi: A hi nge u le ku gonyeni ka switepisi kutani u rhetemuka eka xitepisi xin’we kumbe swimbirhi, xana a wu ta vula leswaku ‘Leswi ndzi nga rhetemuka ndzi to tlhelela lomu ndzi sunguleke kona kutani ndzi ya sungula nakambe’? Doo, a wu nge swi endli sweswo! Ha yini u ehleketa hi ndlela leyi loko swi ta eku lweni ni mikhuva yo biha?

Loko wo tshuka u rhetile, hi xitalo u tivona nandzu. U nga ha hundzeleta mhaka leyi hi ku tivona u nga pfuni nchumu, nileswaku a wu na matimba yo hlula ndzingo lowu nileswaku a wu faneriwi hi leswinene. U nga hundzeleti swilo hi ndlela yoleyo. Swi nga ku heta matimba yo ya emahlweni u lwisana ni mukhuva lowu. Naswona tsundzuka mhaka leyi: Nghwazi leyi tshameke yi hanya, ku nga Yesu Kreste, u tele ku ta ponisa vadyohi, ku nga ri vanhu lava hetisekeke. Xisweswo, a nga kona ni un’we eka hina la nga ta endla swilo hi ndlela leyi hetisekeke swa sweswi.—Mhaka leyi yi tekiwe eka Xalamuka! (ya Xinghezi) ya April 8, 1991 tluka 15.

[Bokisi/Xifaniso lexi nga eka tluka 20]

Teka Magoza Yo Lwisana Ni Mukhuva Lowu!

◼ Sindzisa miehleketo ya wena ku ehleketa hi timhaka tin’wana.—Vafilipiya 4:8.

◼ Papalata ku languta swilo leswi nga ku vangelaka ku navela ko biha.—Pisalema 119:37.

◼ Khongelela “matimba lama tlulaka lama tolovelekeke.”—2 Vakorinto 4:7.

◼ Tshama u khomekile hi swilo swa moya.—1 Vakorinto 15:58.

[Bokisi/Xifaniso lexi nga eka tluka 20]

Mpfuno Lowu Engetelekeke

Leswaku u kuma rungula leri engetelekeke mayelana ni ku hlula mukhuva lowu wo tlangisa swirho swa rimbewu, vona ndzima 25 na 26 eka buku leyi nge, Swivutiso Leswi Vantshwa Va Swi Vutisaka . . . Tinhlamulo Leti Tirhaka, leyi kandziyisiweke hi Timbhoni ta Yehovha.