Tikereke—Xana Ti Kongome Kwihi?

XANA ku humelela yini hi tikereke ta “Vukreste”? Laha u tshamaka kona, xana ta nyuka kumbe ta wa? U nga ha twa van’wana va vula leswaku ta pfuka, naswona minkarhi yin’wana u twa ni swiviko swa tikereke leti kulaka swo huma eAfrika, eYuropa Vuxa ni le United States. Kambe, swiviko swa mahungu leswi humaka ematikweni man’wana, ngopfu-ngopfu eYuropa Vupela-dyambu, swi vulavula hi ku wa ka tikereke, ku hunguteka ka vanhu etikerekeni nileswaku vo tala a va ha byi tsakeli vukhongeri.

Tikereke to tala ti cince ndlela leyi a ti endla swilo ha yona hikwalaho ka leswi vanhu vo tala va nga ha yiki ekerekeni. Van’wana va vula leswaku vona “a va avanyisi munhu,” va vula leswaku Xikwembu xi amukela ndlela yin’wana ni yin’wana leyi vanhu va tikhomaka ha yona. Se swi ya swi andza leswaku tikereke ti tirhisa vuhungasi, ti nyanyula vanhu ni swin’wana leswi vanhu va swi rhandzaka ematshan’weni yo landzela nkongomiso wa Rito ra Xikwembu. Hambileswi vanhu van’wana lava nghenaka kereke, ku cinca loku va ku vonaka va ku tekaka tanihi nchumu lowu fambisanaka ni minkarhi ya manguva lawa, kambe vo tala va timbilu letinene va vona onge tikereke ta hambuka entirhweni lowu Yesu a ti leriseke wona. A hi kambisiseni mikhuva leyi tikereke ti yi landzelaka manguva lawa.