Minengenetsi—Yi Tirhiseriwa Swilo Swo Hambana-hambana — Watchtower LAYIBURARI YA LE KA WEB SITE

Minengenetsi—Yi Tirhiseriwa Swilo Swo Hambana-hambana

HI MUTSARI WA XALAMUKA! LE CZECH REPUBLIC

MUXAKA wun’wana wu larile naswona wu lehile, wu lo thwii! Kasi lowun’wana wu voyamile, naswona le henhla wu petsekile. Hambileswi yi nga faniki hi xivumbeko, kahle-kahle yi wela eka ntlawa wun’we. Hi yihi misinya ya kona? I nsinya lowu vitaniwaka phopla ni lowu vitaniwaka munengenetsi lowu rilaka. Hinkwayo yi wela eka ntlawa wa misinya ya munengenetsi.

Misinya leyi yi tala ku kumeka etlhelo ka milambu ni swinambyana. Le Czech Republic, yi tala ku mila etindhawini leti nga nhlangasi, yi tlhavela eka xirhabyana kutani yi mila hi ku hatlisa. Misinya leyi ya swi kota ku leha 30 wa timitara. Matluka ya yona ma nga ha va ma larile, ma lenga-lenga emarhavini yo lala. Kambe, minengenetsi leyo hatima ni leya matluka lama langutekaka onge i voya, yi ni matluka lamakulu.

Hambileswi ku nga ni kwalomu ka 350 wa mixaka ya misinya leyi, ku ni wun’wana lowu tsakisaka swinene—ku nga munengenetsi lowu rilaka. Muxaka wun’wana lowu vuriwaka munengenetsi wo fana ni mbuti, wu ni swichocho swa swiluva swo fana ni voya leswi humaka matluka ma nga si sungula. Ku vuriwa leswaku loko swichocho leswi swi huma, ximun’wana xi va xi ri kwala nyongeni.

Mirhi Yin’wana Ya Muxaka Lowu

Misinya ya phopla yi tele le Bohemia, ku nga muganga lowu ntsindza wa tiko ra Czech, ku nga Prague, wu nga eka wona. Ku ni mixaka ya kwalomu ka 35 ya nsinya lowa phopla, hinkwayo yi wela eka rixaka ra munengenetsi. Phopla ya ntima hi yona yi nga tala ngopfu, naswona hi xitalo yi kumeka eswinambyanini ni le makhwatini lama nga ni nhlangasi le Bohemia. Muxaka wun’wana wa phopla ya ntima lowu tiviwaka hi ra phopla ya Lombardy kumbe phopla ya le Italiya, wu ni miri wo lala naswona marhavi ya wona ma langute ehenhla, ma tlhavela emirini hi ku kongoma. Nsinya lowu wo saseka wu kula wu fika eka 35 wa timitara, ku lava ku ringana ni yindlu leyi nga ni swithezi swa 11! Phopla ya le Italiya yi kumeka etlhelo ka mapato yo tala, u ta kuma yi khavise magova ya le tindhawini ta le makaya, ngopfu-ngopfu hi xixikana loko matluka ya tona ma va ni muvala wa xitshopana lexo hatima.

Ti-aspen na tona i mixaka wun’wana wa phopla. Tona a ti lehanga ngopfu naswona le maninginingini ti languteka ti larile. Ti-aspen ti ni nchumu wun’wana lowu endlaka leswaku ti hambana ni letin’wana—hambiloko ko ba swimoyana matluka ya tona ma pewuka.

Xana Ka Buriwa Hi Munengenentsi eBibeleni?

U nga ha ehleketa leswaku misinya ya phopla a yi mili le Middle East. Kambe Bibele yi vula leswaku Vaisrayele a va hayeka tiharipa ta vona ehenhla ka mirhi ya phopla loko va ri evuhlongeni le Babilona. (Pisalema 137:2) A va swi endlela yini sweswo? Hambileswi tiharipa a ti tirhisiwa ku dzunisa Xikwembu, Vaisrayele a va nga tali ku tlanga tiharipa ta vona loko va nga tsakanga. (Esaya 24:8, 9) Rito ra Xikwembu ri tlhela ri vula leswaku marhavi ya nsinya wa phopla a ma hlawuriwile leswaku ma nga tirhisiwa ku endla mixaxa hi nkarhi wa Nkhuvo wa Ntshovelo. (Levhitika 23:40) Buku ya Yobo eBibeleni yi vulavula hi mpfuvu leyi yi tshameke exinambyanini nileswaku “mirhi ya phopla ya le nkoveni yi yi rhendzerile.”—Yobo 40:22.

Namuntlha, nsinya wa munengenetsi ni wa phopla yi tirhisiwa eka swilo swo hambana-hambana leswi xavisiwaka. Tiphopla ti tirhisiwa ku endla mahanti ya ku sasekisa swilo leswi vatliweke, mapulanga lama nga lo hlanganisiwa, mabokisi yo endliwa hi mapulanga, mabokisi yo endliwa hi maphepha ni swilo swin’wana leswi endliwaka hi maphepha. Nsinya lowu i wa nkoka swinene hikuva wu tirhisiwa ku endla swilo swo tala. Vavatli va luka swirhundzu hi swirhabyana swa wona. Kunene misinya ya minengenetsi yi tirhiseriwa swilo swo hambana-hambana.