Vantshwa Va Vutisa . . .

Vusodoma—Ndzi Nga Byi Papalata Njhani?

“Loko ndza ha ri ni malembe ya 12, a ku ri ni xinhwanyetana lexi a ndzi titwa ndzi xi rhandza exikolweni. A ndzi pfilunganyekile ni ku karhateka ndzi ehleketa leswaku kumbexana ndzi musodoma.”—Anna.a

“Loko ndza ha kula a ndzi tala ku titwa ndzi rhandza majaha-kulorhi. Kambe a ndzi swi tiva kahle leswaku mianakanyo yo tano a hi yinene.”—Olef.

“Mina ni munghana wa mina wa nhwanyana hi tshame hi tswontswana kan’we kumbe kambirhi. Se a ndzi nga ha tivi timhaka ta mina, hikuva a ndzi rhandza majaha ni vanhwana.”—Sarah.

LESWI vanhu va pfumelelaka xin’wana ni xin’wana masiku lawa, vantshwa vo hlayanyana se va lava ku ringeta ku rhandzana ni vanhu va rimbewu leri fanaka ni ra vona. Becky, la nga ni malembe ya 15 u ri: “Vanhwanyana vo tala exikolweni va vula leswaku vona i vasodoma, kumbe va lava ku rhandzana ni vanhwanyana-kulobye hala tlhelo va rhandzana ni vafana, kasi van’wana va lava ku twa leswaku swi njhani ku endla rimbewu ni munhu wa rimbewu leri fanaka ni rakwe ni wa leri hambaneke ni ra yena.” Christa, la nga ni malembe ya 18, u vula leswaku swi tano ni le xikolweni xa vona. U ri: “Ku ni vanhwanyana vambirhi lava kombeleke ku etlela na mina. Un’wana u ndzi tsalele xiphephana a ndzi vutisa leswaku a ndzi swi lavi ku twa leswaku swi njhani ku etlela ni nhwanyana-kulorhi.”

Leswi masiku lawa vusodoma byi bombisiwaka hinkwako-nkwako, u nga ha tivutisa: ‘Xana vusodoma byi bihile hakunene? Ndzi nga endla yini loko ndzi titwa ndzi rhandza jaha kumbe nhwanyana-kulorhi? Xana sweswo swi vula leswaku ndzi musodoma?’

Xikwembu Xi Byi Languta Njhani Vusodoma?

Vanhu vo tala namuntlha—hambi ku ri vafundhisi—va teka mhaka ya vusodoma ku nga ri nchumu. Kambe, Bibele yi yi veka erivaleni mhaka leyi. Yi hi byela leswaku Yehovha Xikwembu u endle wanuna ni wansati nileswaku wanuna ni wansati lava tekaneke hi vona ntsena va faneleke va tienerisa hi vuxaka bya rimbewu. (Genesa 1:27, 28; 2:24) Kutani, a swi hlamarisi leswi Bibele yi solaka vusodoma.—Varhoma 1:26, 27.

Phela, vo tala va vula leswaku Bibele yi hundzeriwe hi nkarhi. Hi xikombiso, Megan la nga ni malembe ya 14, u ri: “Timhaka tin’wana leti ku vulavuriwaka ha tona eBibeleni a hi ta nkoka eminkarhini leyi hi hanyaka eka yona.” Kambe, ha yini van’wana va hatlisela ku vula sweswo? Hakanyingi, swi vangiwa hi leswi mavonelo ya Bibele ma nga fambisaniki ni ya vona. Va bakanya Rito ra Xikwembu hikuva ri dyondzisa swilo leswi hambaneke ni leswi va lavaka ku pfumela eka swona. Kambe, vonelo rero ri hume ndleleni hikuva Bibele yi hi khutaza ku tirhisa matimba ya hina yo ehleketa! Kahle-kahle, eRitweni rakwe, Yehovha Xikwembu u hi khutaza ku anakanyisisa hi milawu ya yena, hikuva yi endleriwe ku hi pfuna. (Esaya 48:17, 18) Sweswo swa twisiseka. Phela, hi yena a hi tivaka ku antswa hikuva hi yena Muvumbi!

Tanihi muntshwa, swi nga ha endleka u titwa u rhandza vanhu va rimbewu leri fanaka kumbe leri hambaneke ni ra wena. U nga endla yini loko u titwa u rhandza munhu wa rimbewu leri fanaka ni ra wena? Xana sweswo swi vula leswaku u musodoma? Doo! Tsundzuka leswaku u le nkarhini lowu vuriwaka “vurhumbuki bya vuntshwa,” ku nga nkarhi lowu u tikumaka u navela ngopfu rimbewu. (1 Vakorinto 7:36) Swi nga ha endleka nkarhi wun’wana u titwa u navela munhu wa rimbewu leri fanaka ni ra wena. Kambe, ku titwa hi ndlela yoleyo a swi vuli leswaku u musodoma. Phela, minkambisiso yi komba leswaku ku titwa ko tano ka hela hi ku famba ka nkarhi. Hambiswiritano, u nga ha tivutisa, ‘Ku navela ko tano ku sungula njhani?’

Van’wana va vula leswaku vusodoma byi sukela eka fambiselo ra xitekela. Van’wana va vula leswaku i mukhuva lowu munhu a wu dyondzaka. Xikongomelo xa xihloko lexi a hi ku kanela njhekanjhekisano wa leswaku swi vangiwa hi fambiselo ra xitekela kumbe munhu wo swi dyondza. Phela, swi vonaka onge hi ta va hi yi tekela ehansi swinene mhaka ya vusodoma loko ho vula leswaku yi vangiwa hi nchumu wo karhi ntsena. Swi tikomba onge vusodoma—ku fana ni matikhomelo man’wana—byi rharhanganile swinene.

Ku nga khathariseki leswaku swi vangiwa hi yini, nchumu wa nkoka lowu hi faneleke hi wu xiya hileswaku Bibele a yi byi amukeli vusodoma. Xisweswo, munhu loyi a karhatiwaka hi vusodoma u ni pakani leyi a nga yi fikelelaka—a nga hlawula ku bakanya ku navela koloko ka yena. Hi xikombiso: Munhu a nga ha va a ‘voyamele evukarhini.’ (Swivuriso 29:22) Swi nga ha endleka leswaku khale ka yena a a ri ni ximbilwambilwana. Kambe, endzhaku ko hlaya Bibele, a sungula ku swi xiya leswaku u fanele a dyondza ku tikhoma. Xana sweswo swi vula leswaku a nge he pfuki a hlundzukile? A swi tano. Kambe, hikwalaho ka leswi a tivaka leswi Bibele yi swi vulaka hi ku va ni ximbilwambilwana, wa tikhoma leswaku a nga weli endzingweni. Swi tano ni hi munhu loyi a titwaka a rhandza vavasati kumbe vavanuna-kulobye, kambe loyi sweswi a dyondzeke leswi Bibele yi swi vulaka hi vusodoma. Minkarhi yin’wana a nga ha titwa a ri ni ku navela loku nga fanelangiki. Hambiswiritano, hi ku yingisa ndzayo ya Bibele, munhu a nga bakanya ku navela koloko.

I ntiyiso leswaku vusodoma byi nga ha va byi dzime timitsu eka munhu. Kambe, swi tive leswaku hambi ku ri ku navela ko biha loku nga dzima timitsu ku nga hluriwa. (1 Vakorinto 9:27; Vaefesa 4:22-24) Phela, hi wena u lawulaka ndlela leyi u hanyaka ha yona. (Matewu 7:13, 14; Varhoma 12:1, 2) Ku hambana ni leswi vanhu va swi vulaka, u nga swi kota ku lawula ku navela ka wena—kumbe u bakanya ndlela leyi u titwaka ha yona.

Papalata Mahanyelo Yo Biha

Xana u nga byi papalata njhani vusodoma?

◼ Xo Sungula Lahlela ku vilela ka wena hinkwako eka Yehovha hi xikhongelo, u tiyiseka leswaku wa ku “khathalela.” (1 Petro 5:7; Pisalema 55:22) Yehovha a nga ku tiyisa hi ku ku nyika ku rhula loku “tlulaka miehleketo hinkwayo.” Leswi swi nga ‘rindza mbilu ya wena ni matimba ya wena ya mianakanyo’ kutani swi ku nyika “matimba lama tlulaka lama tolovelekeke” leswaku u nga endli swilo swo biha. (Vafilipiya 4:7; 2 Vakorinto 4:7) Sarah, loyi a a titwa a ri munhu wa xinuna tlhelo wa xisati, u ri: “Loko mianakanyo ya mina yi ndzi karhata, ndza khongela; kutani Yehovha wa ndzi tiyisa. Handle ko pfuniwa hi yena, a ndzi nga ta swi kota ku hlula xiphiqo lexi. Xikhongelo xa ndzi pfuna!”—Pisalema 94:18, 19; Vaefesa 3:20.

◼ Xa Vumbirhi Tshama u ri karhi u ehleketa hi timhaka ta moya leti akaka. (Vafilipiya 4:8) Hlaya Bibele siku ni siku. U nga ma tekeli ehansi matimba ya yona yo kongomisa miehleketo ni mbilu ya wena. (Vaheveru 4:12) Muntshwa la vuriwaka Jason u ri: “Bibele—ku katsa ni matsalwa yo fana na 1 Vakorinto 6:9, 10 na Vaefesa 5:3—yi ndzi pfunile swinene. Ndzi hlaya matsalwa lawa nkarhi ni nkarhi loko ndzi fikeriwa hi ku navela ko biha.”

◼ Xa Vunharhu Papalata swifaniso swo navetisa rimbewu ni timhaka leti ndhundhuzelaka vusodoma, hikuva swi nga nyanyisa miehleketo yo biha ntsena.b (Pisalema 119:37; Vakolosa 3:5, 6) Tifilimi ni minongonoko yin’wana ya thelevhixini yi nyikela mavonelo ya leswaku vusodoma a hi nchumu wo biha, ko va mahanyelo man’wana lama hambaneke. Anna u ri: “Mavonelo ya misava lama hombolokeke ma khumbe ndlela leyi ndzi ehleketaka ha yona ni ku nyanyisa ku pfilunganyeka ka mina hi tlhelo ra rimbewu. Sweswi ndzi fambela ekule ni swilo kumbe munhu hambi a ri wihi la khutazaka vusodoma.”—Swivuriso 13:20.

◼ Xa Vumune Kuma munhu la tshembekaka, kutani u vulavula na yena hi leswi u swi ehleketaka. (Swivuriso 23:26; 31:26; 2 Timotiya 1:1, 2; 3:10) Olef, loyi a laveke mpfuno eka nkulu la nga Mukreste, u ri: “Ndzayo ya yena yi ndzi pfunile swinene. Ndzi twe onge loko a ndzi vulavule na yena khale.”

U Nga Heli Mbilu!

Phela van’wana va ta vula leswaku i ku tlanga hi nkarhi ku endla matshalatshala lawa hinkwawo, va vula leswaku u fanele u pfumela leswi u nga swona kutani u hanya hi ndlela yoleyo. Kambe Bibele yi vula leswaku u nga endla swo antswa ku tlula sweswo! Hi xikombiso, yi hi byela leswaku Vakreste van’wana va khale, lava a va endla swiendlo swa vusodoma, va hundzukile. (1 Vakorinto 6:9-11) Na wena u nga wu hlula ndzingo lowu—hambileswi swa sweswi, u vonaka onge wu tike ngopfu.

Loko ku navela ka wena ku tama ka ha ri kona, u nga heli matimba kumbe u ehleketa leswaku a wu nge swi koti ku hlula xiphiqo lexi. (Vaheveru 12:12, 13) Hinkwerhu ka hina hi tshama hi ri karhi hi lwa ni mboyamelo wo biha minkarhi yin’wana. (Varhoma 3:23; 7:21-23) Loko u bakanya ku navela ko biha, hi ku famba ka nkarhi ku ta hunguteka. (Vakolosa 3:5-8) Ku tlula hinkwaswo, kombela Yehovha leswaku a ku pfuna. Wa ku rhandza naswona wa swi tiva leswi nga ta ku endla u tsaka. (Esaya 41:10) Ina, “tshemba Yehovha u endla leswinene . . . , kutani u ta ku nyika leswi komberiwaka hi mbilu ya wena.”

Swihloko swin’wana leswi nge, “Vantshwa Va Vutisa . . .” swi kumeka eka Web-site leyi, www.watchtower.org/ype

[Tinhlamuselo ta le hansi]

SWIVUTISO SWO ANAKANYISISA HA SWONA

◼ Ha yini Xikwembu xi venga vusodoma?

◼ U nga endla yini loko u titwa u rhandza munhu wa rimbewu leri fanaka ni ra wena?

◼ I mani loyi u nga bulaka na yena loko u ri ni ku navela ka vusodoma?

[Xifaniso lexi nga eka tluka 30]

Lava mpfuno eka Mukreste la wupfeke, la kuleke