Xana Ndzi Nga Ri Hlamusela Njhani Langutelo Ra Bibele Hi Vusodoma?

HILAHA swi kombisiweke hakona laha henhla, swilo leswi vanhu lava dumeke va swi endlaka swi rhandziwa ngopfu loko swi hlamuseriwa eka swihaxa-mahungu ku tlula loko vona vini va vula erivaleni leswaku i vasodoma, kumbe va ni rimbewu-mbirhi. Vanhu van’wana va va bumabumela vanhu volavo hikwalaho ka xivindzi lexi va nga na xona; kasi van’wana va va sola. Exikarhi ka mintlawa leyimbirhi, van’wana va languta vusodoma tanihi mhaka leyi tolovelekeke. Daniel la nga ni malembe ya 21 u ri: “Loko ndza ha nghena xikolo, vana van’wana a va vula leswaku loko u ri ni xiphiqo malunghana ni vusodoma, u ni xihlawuhlawu naswona wa avanyisa.”a

Vanhu va ni mavonelo yo hambana hi vusodoma naswona bya hambana hi ku ya hi matiko. Kambe Vakreste a va fanelanga va “yingayingisiwa hi mheho yin’wana ni yin’wana ya ku dyondzisa.” (Vaefesa 4:14) Ematshan’weni ya sweswo, va fanele va namarhela leswi Bibele yi swi vulaka.

Hi rihi langutelo ra Bibele hi vusodoma? Loko u hanya hi milawu ya Bibele, xana u nga va angula njhani vanhu lava vulaka leswaku u ni xihlawu-hlawu, wa avanyisa kumbe u venga vasodoma? Xiya swivutiso leswi landzelaka ni ndlela leyi u nga swi hlamulaka ha yona.

Xana Bibele yi dyondzisa yini hi vusodoma?

Bibele yi swi veka erivaleni leswaku Xikwembu xi endle lunghiselelo ra rimbewu leswaku ri endliwa hi wanuna ni wansati lava tekaneke ntsena. (Genesa 1:27, 28; Levhitika 18:22; Swivuriso 5:18, 19) Loko Bibele yi sola vumbhisa, yi va yi vulavula hi vusodoma ni timhaka ta masangu leti endliwaka hi vanhu vambirhi lava nga tekanangiki.b—Vagalatiya 5:19-21.

Loko munhu a ku vutisa a ku: “U va languta njhani vasodoma?”

U nga ha ku: “A ndzi va vengi vasodoma kambe ndzi venga swiendlo swa vona.”

✔ Tsundzuka: Loko u hanya hi milawu ya Bibele, sweswo hi leswi u ti hlawuleleke swona naswona u ni lunghelo ro endla tano. (Yoxuwa 24:15) U nga khomiwi hi tingana hikwalaho ka langutelo ra wena.—Pisalema 119:46.

Xana Vakreste va fanele va xixima vanhu hinkwavo ku nga khathariseki matikhomelo ya vona hi tlhelo ra rimbewu?

Ina. Bibele yi ri: “Xiximani vanhu va mixaka hinkwayo.” (1 Petro 2:17) Hikwalaho, Vakreste a va va vengi vasodoma. Va kombisa musa eka vanhu hinkwavo, ku katsa ni vasodoma.—Matewu 7:12.

Loko munhu a ku vutisa a ku: “Xana ndlela leyi u va langutaka ha yona vasodoma yi hlohlotela xihlawuhlawu?”

U nga ha ku: “Nikatsongo. Ndzi venga swiendlo swa vusodoma ku nga ri vanhu lava byi endlaka.”

✔ U nga ha tlhela u ku: “Hi xikombiso ndzi hlawule ku ka ndzi nga dzahi. Entiyisweni swa ndzi nyenyetsa. Kambe a hi nge wa dzaha naswona u titwa hi ndlela leyi hambaneke. A ndzi nge ri soli vonelo ra wena tanihi leswi ndzi tiyisekaka leswaku na wena a wu nge ri soli ra mina—a swi tano ke? Nawu lowu wa tirha ni le ka ndlela leyi hi byi langutaka ha yona vusodoma.”

Xana Yesu a nga vulanga leswaku hi fanele hi rhandza vanhu van’wana? Loko swiri tano, xana Vakreste a va fanelanga va rhandza va vasodoma?

Yesu a nga va khutazanga valandzeri vakwe leswaku va amukela mahanyelo hinkwawo. Ematshan’weni ya sweswo, u vule leswaku ndlela leyi yisaka evuton’wini yi pfulekele “un’wana ni un’wana loyi a kombisaka ripfumelo eka yena.” (Yohane 3:16) Ku kombisa ripfumelo eka Yesu swi katsa ku hanya hi ku pfumelelana ni milawu ya Xikwembu, leyi lwisanaka ni mahanyelo ya tano—ku katsa ni vusodoma.—Varhoma 1:26, 27.

Loko munhu un’wana a ku: “Vasodoma a va nge cinci mahanyelo ya vona; va velekiwe va ri tano.”

U nga ha ku: “Bibele a yi vuli nchumu hi leswaku ku ni vanhu lava velekiwaka va ri vasodoma, hambileswi yi vulaka leswaku mahanyelo man’wana swa tika ku ma cinca. (2 Vakorinto 10:4, 5) Hambiloko van’wana va rhandza vanhu va rimbewu leri fanaka, Bibele yi byela Vakreste leswaku va papalata swiendlo swa vusodoma.”

✔ Xiringanyeto: Ematshan’weni yo phasiwa hi ku kanetana malunghana ni leswi endlaka leswaku ku va ni ku navela ka vusodoma, kandziyisa leswaku Bibele yi lwisana ni swiendlo swa vusodoma. Hi xikombiso u nga ha ku: “Vanhu vo tala va vula leswaku mahanyelo yo biha ma tlulela naswona eku heteleleni vanhu van’wana va velekiwa va ri na wona. (Swivuriso 29:22) Xana sweswo i ntiyiso? Hi laha u swi tivaka hakona, Bibele yi sola vanhu lava nga ni swifafa. (Pisalema 37:8; Vaefesa 4:31) Xana nawu lowu a hi wunene hileswi van’wana madzolonga ma ngo va engatini?

Xana Xikwembu xi nga n’wi byela njhani munhu loyi a rhandzaka vanhu va rimbewu leri fanaka leswaku va papalata vusodoma? Sweswo a swi twali.

Kambe mavonelo wolawo ma sekeriwe eka langutelo ra vanhu lava nga hetisekangiki ra leswaku vanhu va fanele va hanyela ku enerisa ku navela ka vona ka timhaka ta masangu. Bibele yi xixima vanhu hi ku va tiyisekisa leswaku va nga swi kota ku hanya handle ko enerisa ku navela ka vona ka rimbewu loko hakunene va tiyimisele ku endla tano.—Vakolosa 3:5.

Loko munhu un’wana a ku: “Hambileswi u nga riki musodoma, u fanele u cinca ndlela leyi u byi langutaka ha yona vusodoma.”

U nga ha ku: “A hi nge a ndzi swi seketeli ku gembula kambe wena wa swi seketela. Xana swi nga twala leswaku u ndzi sindzisa ku cinca langutelo ra mina, ntsena hileswi vanhu va timiliyoni va gembulaka?”

✔ Tsundzuka leswi: Vanhu vo tala (ku katsa ni vasodoma) va ni mahanyelo man’wana lama endlaka leswaku va tekelela mukhuva wolowo—kumbexana vukanganyisi, vuhomboloki kumbe nyimpi. Bibele yi sola mahanyelo wolawo; nakambe yi sola mixaka yo karhi ya mahanyelo ya rimbewu, ku katsa ni vusodoma.— 1 Vakorinto 6:9-11.

Bibele a yi pfumelelani na yona mikhuva leyi naswona a yi xi seketeli xihlawuhlawu. Leswi Xikwembu xi swi languteleke eka vanhu va ri mbewu leri hambaneke hileswi xi swi languteleke ni le ka vanhu va rimbewu leri fanaka, hinkwavo va fanele va ‘balekela vumbhisa.’—1 Vakorinto 6:18.

Ntiyiso wa mhaka hileswaku timiliyoni ta vavanuna ni vavasati lava lavaka ku hanya hi milawu ya Bibele va fanele va tikhoma ku nga khathariseki miringo leyi va nga ha langutanaka na yona. Nhlayo ya vona yi katsa vanhu vo tala lava nga si nghenelaka vukati naswona va nga ni ntshembo lowutsongo swinene wo nghenela vukati swin’we ni vanhu vo tala lava tekaneke ni munhu la lamaleke loyi a nga ta ka a nga swi koti ku endla timhaka ta masangu. Va swi kota ku hanya handle ko endla timhaka ta masangu. Vanhu lava rhandzaka vusodoma va nga endla leswi fanaka loko hakunene va lava ku tsakisa Xikwembu.—Deteronoma 30:19.