A Ndza Ha Ri Rona Hlonga Ra Byala

Ku nwa byala hi ku ringanisela swi nga endla leswaku u tsakela swakudya kumbe swi endla leswaku nkhuvo wa n’wina wu tsakisa. Kambe eka van’wana, ku nwa byala swi va vangela swiphiqo leswikulu. Ehleketa hi mhaka leyi landzelaka ya wanuna un’wana loyi a koteke ku tshika mukhuva wa ku nwa ngopfu.

XIYIMO xo biha lexi a xi ri kona le kaya a xi vava lerova swa ndzi tikela ku vulavula ha xona hambi sweswi. Tatana na Manana a va nwa. Kutani Tatana a ba Manana. Minkarhi yin’wana na mina a ndzi pfa ndzi himiwa. Loko va hambana, a ndzi ri ni malembe ya mune ntsena. Ndzi tsundzuka kahle loko ndzi yisiwa eka Kokwana ndzi ya tshama kona.

A ndzi titwa ndzi nga rhandziwi. Loko ndzi ri ni malembe ya nkombo, a ndzi yiva wayini ndzi nwa, tanihi leswi a yi vonaka onge ya ndzi chavelela emaxangwini ya mina. Loko ndzi ri ni malembe ya 12, manana na kokwana va holove ngopfu hikwalaho ka mina. Mhani u hlundzuke lerova a ndzi hoxa hi foroko yo hlakula ha yona. Ndzi yi vhikile leswaku yi nga ndzi tlhavi! A ku nga ri ro sungula vutomi bya mina byi va ekhombyeni hi ndlela leyi. Kambe swivati leswi a ndzi ri na swona emirini, a swi nga ri nchumu loko ndzi swi pimanisa ni ku vava loku a ndzi ku twa embilwini ya mina.

Loko ndzi ri ni malembe ya 14, a ndzi nga hambani ni byala. Eku heteleleni, loko ndzi ri ni malembe ya 17, ndzi baleke ekaya. Loko ndzi nwile, a ndzi vona onge misava hinkwawo i ya mina, a ndzi va ni nkani, ndzi pfuxa madzolonga ebyaleni. A ndzi titsakisa hi ku nwa ntsena. Hi siku a ndzi kota ku nwa ntlhanu wa tilitara ta wayini, mabhondlela ma nga ri mangani ya byala ni thothotho.

Loko ndzi teka nsati, ku nwa ka mina a ku endla leswaku nsati wa mina a dya mbitsi a xeva hi nhlomulo. A ndzi tshama ndzi virile naswona ndzi ri ni swifafa, kutani a ndzi ba nsati ni vana, ndzi endla hilaha tatana a a endla hakona le kaya. Yo tala ya mali leyi a ndzi yi hola a yi helela ebyaleni. A hi kala ni mubedo wunene, kutani mina ni nkatanga a hi etlela ehansi. A ndzi vona vutomi byi nga ri na xikongomelo kutani a ndzi nga endli nchumu ku antswisa xiyimo xa hina.

Hiloko siku rin’wana ndzi bula ni Mbhoni ya Yehovha. Ndzi yi vutise leswaku ha yini ku ri ni maxangu yo tala swonghasi, hiloko Mbhoni yi ndzi komba eBibeleni leswaku Xikwembu xi tshembisa misava leyi nga hava swiphiqo. Sweswo swi endle leswaku ndzi sungula ku dyondza Bibele ni Timbhoni. Loko ndzi ri karhi ndzi tirhisa leswi a ndzi swi dyondza eBibeleni ni ku hunguta ku nwa byala, vutomi bya ndyangu wa mina byi sungule ku antswa swinene. Hambiswiritano, ndzi swi xiyile leswaku loko ndzi lava ku tirhela Yehovha Xikwembu hi ndlela leyi a yi tsakelaka, a swi ta lava ndzi hlula xiphiqo xa mina xa ku nwa ngopfu. Endzhaku ko lwa ni xiphiqo lexi tin’hweti tinharhu, ndzi swi kotile ku tshika. Endzhaku ka tin’hweti ta tsevu ndzi tinyiketele eka Xikwembu kutani ndzi kombisa ku tinyiketela ka mina hi ku khuvuriwa.

Ndzi swi kotile ku hakela swikweleti swa mina tanihi leswi a ndzi nga ha ri hlonga ra byala. Ndzi kote ni ku xava yindlu ni movha, lowu hi wu tirhisaka ku ya eminhlanganweni ya Vukreste ni le ku chumayeleni hi yindlu ni yindlu. Eku heteleleni, ndzi ve ni xindzhuti.

Minkarhi yin’wana eswinkhubyanini, van’wana va ndzi rhamba leswaku ndzi ta nwa. Vo tala a va swi tivi leswaku ndzi lwa hi matimba leswaku ndzi nga nwi, nileswaku nghilazi yin’we ntsena yi nga ndzi tlherisela emikhuveni ya mina ya khale. Nisweswi ndza ha byi navela byala. Swi lava ndzi khongela swinene naswona ndzi va ni xivindzi xo ala ku nwa. Loko ndzi ri ni torha, ndzi nwa swakunwa swo tala leswi nga riki na xihoko. Sweswi se ku hele malembe ya khume ndzi nga si veka nghilazi ni yin’we ya byala enon’wini wa mina.

Yehovha u kota ku endla leswi vanhu va tsandzekaka ku swi endla. U ndzi pfune leswaku ndzi kuma ntshunxeko lowu a ndzi nga anakanyi leswaku ndzi nga wu kuma! Ndza ha karhateka hikwalaho ka maxangu lama ndzi langutaneke na wona loko ndza ha ri ntsongo, naswona ndza ha lwa ni miehleketo yo biha minkarhi hinkwayo. Kambe ndza tsaka leswi ndzi nga ni vuxaka lebyinene na Yehovha, ni vandlha leri nga ni vanghana va xiviri ni ndyangu lowunene lowu nga ni ripfumelo ro fana ni ra mina. Nkatanga ni vana va hina va ndzi seketela swinene eku lweni ka mina ni byala. Nsati wa mina u ri: “Eku sunguleni, vutomi bya mina a byi vava swinene. Kambe namuntlha ndzi nkhensa Yehovha leswi ndzi kotaka ku hanya vutomi byo tsakisa ni nuna wa mina swin’we ni vana va hina vambirhi.”—Xi lo nyikeriwa.

[Marito lama tshahiweke exihlokweni lama nga eka tluka 21]

Loko ndzi ri ni malembe ya 14, a ndzi nga hambani ni byala

[Marito lama tshahiweke exihlokweni lama nga eka tluka 22]

Yehovha u kota ku endla leswi vanhu va tsandzekaka ku swi endla

[Bokisi/Swifaniso leswi nga eka tluka 22]

BIBELE NI KU NWA BYALA

◼ Bibele a yi ali leswaku vanhu va nwa byala. Yi vula leswaku “vhinyo leyi tsakisaka mbilu ya munhu wa nyama” i nyiko leyi humaka eka Xikwembu. (Pisalema 104:14, 15) Bibele yi tlhela yi hlamusela nsinya wa vhinya tanihi xikombiso xa ku fuwa ni nsirheleleko. (Mikiya 4:4) Entiyisweni, singita ro sungula leri Yesu Kreste a ri endleke a ku ri ku hundzula mati ma va vhinyo enkhubyeni wa vukati. (Yohane 2:7-9) Naswona loko muapostola Pawulo a twa hi ta ‘ku vabya ka nkarhi ni nkarhi’ ka Timotiya, u n’wi byele leswaku a nwa “vhinyo yitsongo.”—1 Timotiya 5:23.

◼ Leswi Bibele yi swi yirisaka i ku nwa byala ngopfu:

“Swidakwa . . . swi nge wu voni mfumo wa Xikwembu.”—1 Vakorinto 6:9-11, “The Jerusalem Bible.”

“Mi nga dakwiwi hi vhinyo, yi vangela manyala.”—Vaefesa 5:18.

“I vamani lava nga ni khombo? I vamani lava vilelaka? I vamani lava nga ni timholovo? I vamani lava karhatekeke? I vamani lava nga ni timbanga ku nga ri na xivangelo? I vamani lava nga voniki kahle? Hi lava va tshamaka nkarhi wo leha ni vhinyo, lava va fikaka leswaku va ta lavisisa vhinyo leyi pfanganisiweke. U nga yi languti vhinyo loko yi ri yo tshwuka, loko yi humesa swimbyaru-mbyaru exinwelweni, loko yi rhelela. Eku heteleleni yi luma ku fana ni nyoka, naswona yi humesa vuxungu ku fana ni mhiri. Mahlo ya wena ma ta vona swilo leswi nga tolovelekangiki, ni mbilu ya wena yi ta vulavula swilo leswi humeke endleleni.”—Swivuriso 23:29-33.

Hilaha swi kombisiweke hakona eka xihloko lexi fambisanaka ni bokisi leri, van’wana lava nga ni xiphiqo xa ku nwa va endle xiboho xa vutlhari xa ku vhela va ku byi thya!—Matewu 5:29.