Langutelo Ra Bibele

Xana Ku Va Munhu “Lonene” Hi Swona Swa Nkoka Ku Tlula Hinkwaswo?

“ALLISON, u ri: “Ndzi hanya vutomi lebyinene hilaha ndzi kotaka hakona, naswona ndzi ringeta ku va munhu lonene.” Ku fana na yena, vanhu vo tala va kholwa leswaku ku hanya hi ndlela leyi hi swona leswi tsakisaka Xikwembu.

Van’wana va ehleketa leswaku hambiloko vo dyoha ngopfu, Xikwembu a xi na mhaka ntsena loko swo tala leswi va swi endlaka swi ri leswinene. Va kholwa leswaku Xikwembu xi tala ku rivalela ku ri ni ku avanyisa vanhu va xona.

I ntiyiso leswaku nhlamuselo ya rito “lonene” ya hambana hi ku ya hi vanhu. Kambe, Bibele yi ri yini? Hi fanele hi endla yini leswaku hi amukeleka eka Xikwembu? Swi vula yini ku va munhu lonene emahlweni ka Xikwembu?

Ku Amukela Nkongomiso Wa Muvumbi Wa Hina

Leswi Yehovha Xikwembu a nga Muvumbi wa hina, u ni mfanelo ya ku hi byela ndlela leyi hi faneleke hi hanya ha yona. (Nhlavutelo 4:11) EBibeleni, Xikwembu xi nyikela milawu ni misinya ya milawu leyi hi faneleke ku xi gandzela ni ku hanya ha yona. Xikwembu xi byele vanhu va xona xi ku: “Yingisani rito ra mina, naswona mi fanele mi endla hi ku landza swilo hinkwaswo leswi ndzi mi lerisaka swona; kunene mi ta va vanhu va mina kutani mina ndzi ta va Xikwembu xa n’wina.”—Yeremiya 11:4.

Kutani, ku va munhu “lonene” hi ku ya hi Xikwembu, swi lava leswaku hi dyondza milawu ya xona ni ku lulamisa vutomi bya hina leswaku hi hanya hi ku landza milawu leyi. A hi nge u lava munghana. Hi ntolovelo u ta lava ku tiva leswaku munhu wa kona u lava u n’wi khoma njhani, naswona u ta endla swilo hi ndlela leyi nga ta n’wi tsakisa. Bibele yi kombisa leswaku, ku fana na kokwa wa hina Abrahama, hi nga va vanghana va Yehovha—hileswaku, hi va vanhu lava a va tsakelaka. (Yakobo 2:23) Ku tlula kwalaho, tanihi leswi Xikwembu xi nga ni milawu leyi tlakukeke ku tlula ya hina, a hi langutelanga leswaku xi cinca milawu ya xona leswaku xi endla leswi laviwaka hi hina.—Esaya 55:8, 9.

Ku Yingisa I Swa Nkoka

Xana Xikwembu a xi nge tsaki loko hi honisa “swinawana” swo karhi? Van’wana va nga ha ehleketa leswaku a hi swa nkoka ku yingisa milawu leyi vonakaka yi nga “nyawuli.” Kambe, a wu kona nawu lowu simekiweke hi Xikwembu lowu nga riki wa nkoka. Xiya leswaku eka 1 Yohane 5:3, Bibele a yi hambanisi swinawana ni milawu loko yi ku: “Ku rhandza Xikwembu, hi kona ku hlayisa swileriso swa xona; kasi loko swi ri swileriso swa xona a swi tiki.” Loko hi endla hinkwaswo leswi nga ematimbeni ya hina leswaku hi yingisa milawu hinkwayo ya Xikwembu, hi va hi kombisa leswaku hi xi rhandza hi timbilu ta hina hinkwato.—Matewu 22:37.

Yehovha a nga langutelanga leswaku hi va vanhu lava hetisekeke. Loko hi tisola hakunene hikwalaho ka swihoxo leswi hi swi endleke, naswona hi endla hinkwaswo leswi hi nga swi kotaka leswaku hi nga ha swi engeti, wa hi rivalela hi mbilu hinkwayo. (Pisalema 103:12-14; Mintirho 3:19) Kambe, xana hi nga honisa milawu yo karhi hi vomu, hi ehleketa leswaku u ta hi rivalela hikwalaho ka leswi hi yingisaka etimhakeni tin’wana? Xikombiso lexi kumekaka eBibeleni xi kombisa leswaku a swi tano.

Hosi Sawulo wa le Israyele u hlawule ku yingisa milawu yo karhi ya Xikwembu. Loko a lwa ni Vaamaleke, u byeriwe leswaku a nga fanelanga a siya ni xifuwo ni xin’we. A a fanele a swi “dlaya.” Hambileswi a landzeleke swiletelo swin’wana, kambe Sawulo a nga yingisanga naswona u hlayise “leswinene swa ntlhambi wa tinyimpfu ni swa ntlhambi wa tihomu.” Ha yini? Yena ni vanhu lavan’wana a va lava ku titekela swona.—1 Samuwele 15:2-9.

Loko muprofeta Samuwele a vutisa Sawulo leswaku ha yini a nga yingisanga xileriso xa Xikwembu, Sawulo u kanetile leswaku a nga yingisanga. U boxe swilo leswinene leswi yena ni vanhu lavan’wana va swi endleke, ku katsa ni switlhavelo leswi va swi endleleke Xikwembu. Sawulo u vutise a ku: “Xana Yehovha u tsakisiwa hi magandzelo yo hisiwa ni switlhavelo ku fana ni ku yingisa rito ra Yehovha? Waswivo! Ku yingisa swa antswa ku ri ni xitlhavelo, ku nyikela nyingiso ku ri ni mafurha ya makhuna.” (1 Samuwele 15:17-22) Hikwalaho, a hi nge endli switlhavelo kumbe mintirho yin’wana leyinene hi xikongomelo xo pfala swiendlo swa hina swa ku tlula nawu.

Milawu Ya Xikwembu—I Vumbhoni Bya Leswaku Xa Hi Rhandza

Hi rirhandzu, Yehovha a nga hi tshiki hi mbambela emhakeni ya leswaku hi nga n’wi tsakisa njhani. EBibeleni, u hi nyika nkongomiso lowu nga erivaleni emhakeni ya mahanyelo, u ri: “Ndlela hi leyi. Fambani hi yona.” (Esaya 30:21) Loko hi landzela nkongomiso wakwe, a hi nge pfilunganyeki, hi nga tivi leswaku hi hlawula yini hi siya yini eka mahanyelo lawa vanhu va tivekeleke wona. A hi tiyisekeni leswaku nkongomiso wa Xikwembu wu pfuna hina, naswona xi hi ‘dyondzisela ku hi pfuna.’—Esaya 48:17, 18.

Hi rihi khombo ro va hina vini hi tihlawulela leswi nga ‘swinene’ ? Hinkwerhu hi ni mboyamelo wa vutianakanyi. Timbilu ta hina ti nga hi kanganyisa. (Yeremiya 17:9) Hi nga ha wu tekela ehansi nkoka wa swilaveko swa Xikwembu leswi hi vonaka onge swa tika kumbe swi hi sivela swo karhi.

Hi xikombiso, vanhu vambirhi lava nga tekanangiki va nga ha hlawula ku endla timhaka ta rimbewu, va ehleketa leswaku leswi ku nga riki na munhu un’wana eka vuxaka bya vona, va nga endla leswi va swi lavaka. Va nga ha swi xiya leswaku xiendlo xa vona a xi fambisani ni nkongomiso wa Bibele kambe va nga gimeta hi ku vula leswaku loko “va nga vavisi munhu,” Xikwembu a xi nge va voni nandzu. Ku navela ka vona ku nga va pfala mahlo va nga swi voni leswaku se va dyoha, va nga voni ni vuyelo bya kona. Bibele ya lemukisa: “Ku ni ndlela leyi lulameke emahlweni ka munhu, kambe endzhaku ka sweswo makumu ya yona i tindlela ta rifu.”—Swivuriso 14:12.

Milawu hinkwayo ya Yehovha yi kombisa ndlela leyi a hi rhandzaka ha yona nileswaku a nga lavi hi xaniseka. Ku bakanya nkongomiso wa Xikwembu etimhakeni ta rimbewu kumbe swiendlo swin’wana a swi endli vanhu va kuma ntsako ni ku nandziheriwa hi vutomi. Swi pfilunganye vutomi bya vanhu vo tala. Hi hala tlhelo, ku hanya hi milawu ya Xikwembu swi hi pfuna eka matshalatshala ya hina ya ku hanya vutomi lebyinene ni ku papalata khombo naswona hi nga vavisi van’wana.—Pisalema 19:7-11.

Loko u swi lava hi mbilu ya wena hinkwayo ku va munhu lonene emahlweni ka Xikwembu, endla matshalatshala yo landzela nkongomiso wa xona. U ta tivonela hi ya wena leswaku “swileriso swa [Yehovha] a swi tiki.”—1 Yohane 5:3.

XANA U TSHAME U TIVUTISA?

◼ Ha yini hi fanele hi hanya hi nkongomiso wa Muvumbi wa hina?—Nhlavutelo 4:11.

◼ Xana hi fanele hi yingisa swileriso hinkwaswo swa Xikwembu?—1 Yohane 5:3.

◼ Ha yini swi nga ri vutlhari eka hina ku tihlawulela milawu ya hina vini leswaku hi lava ku hanya njhani?—Swivuriso 14:12; Yeremiya 17:9.

[Xifaniso lexi nga eka tluka 21]

Xana u ni langutelo ra Xikwembu hi mahanyelo lamanene?