Goza Ra Vunharhu
Kongomisa Vana Va Wena
Ha yini goza leri ri ri ra risima? Minkambisiso yi kombisa leswaku “vana lava kurisiweke hi vatswari lava nga ni rirhandzu kambe lava nga pfumeleliki swilo swo huma endleleni—va pasa kahle exikolweni, va kota ku hanyisana ni vanhu, va titshemba naswona va tsaka ku tlula vana lava kurisiweke hi vatswari lava debyisaka voko kumbe va va khoma hi voko ra nsimbi,” ku vula magazini lowu nge Parents.
Xiphiqo lexi nga kona: Ku sukela evuhlangini ku fika eka malembe ya kondlo-a-ndzi-dyi, vana va tala ku tlhontlha vulawuri bya vatswari. John Rosemond, mutsari wa buku leyi nge Parent Power! u te, “Vana va hatla va swi vona loko vatswari va vona va chava ku va tshinya.” U ri: “Loko swi ta eka xivutiso lexi nge, ‘I mani loyi a lawulaka emutini?’ loko vatswari va khondla mavoko vana hi vona va nga ta lawula.”
Ntlhantlho: U nga vileli hileswaku vana va wena va nga ku venga kumbe leswaku va nga hela matimba loko u va vekela milawu ni ku va laya. Yehovha Xikwembu, Musunguri wa ndyangu, a nga langutelanga leswaku vana va hoxa xandla emhakeni yo rhangela ndyangu. Ematshan’weni ya sweswo, u veke vatswari leswaku va kongomisa kutani vana a va lerisa a ku: “Yingisani vatswari va n’wina.”—Vaefesa 3:14, 15; 6:1-4.
U nga kongomisa vana handle ko kariha. Njhani? Hi ku landzela xikombiso lexinene xa Yehovha. U ni matimba yo sindzisa vanhu leswaku va endla ku rhandza ka yena, kambe u hi khongotela hi ku languta leswinene leswi hi swi endlaka. Rito ra yena ri ri: “Kunene loko a wu yingise swileriso swa mina! Kutani ku rhula ka wena a ku ta fana ni nambu.” (Esaya 48:18) Yehovha u lava leswaku hi n’wi yingisa, ku nga ri hileswi hi n’wi chavaka kambe hileswi hi n’wi rhandzaka. (1 Yohane 5:3) Leswi a swi lavaka eka hina swa twala naswona wa swi tiva leswaku hi ta vuyeriwa loko hi hanya hi milawu ya yena ya mahanyelo.—Pisalema 19:7-11.
Xana u nga tiyiseka njhani leswaku u kongomisa vana va wena hi ndlela leyi faneleke? Xo sungula, u fanele u tiyiseka leswaku Xikwembu xi lava u kongomisa vana va wena. Xa vumbirhi, u fanele u tiyiseka leswaku wena ni vana va wena mi ta vuyeriwa loko mi hanya hi milawu ya Xikwembu.—Varhoma 12:2.
Kahle-kahle, i yini leswi u faneleke u swi endla leswaku u kongomisa vana va wena?
[Nkomiso eka tluka 5]
“Laya n’wana wa wena, o ta ku nyika ku wisa.”—Swivuriso 29:17, Bibele ya Xitsonga