Goza Ra Vutsevu

Tiva Ndlela Leyi N’wana Wa Wena A Titwaka Ha Yona

Ha yini goza leri ri ri ra risima? Vana va tsaka loko vatswari va vona va tiva ndlela leyi va titwaka ha yona. Loko vatswari va titoloveta ku tshamela ku kaneta leswi vana va vona va swi vulaka, vana a va nge tiphofuli hi ku ntshunxeka naswona va ta sungula ku ka va nga titshembi.

Xiphiqo lexi nga kona: Vana va ni mboyamelo wo tiphofula hi marito lama hundzeletaka. Entiyisweni, swin’wana leswi va swi vulaka swi karhata vatswari. Hi xikombiso, n’wana loyi a karhatekeke a nga ha ku, “Onge ndzi ngo tidlaya.”a Hi ku karhateka mutswari a nga ha ku, “Wa hemba!” Vatswari va vilela hileswi vuriwaka hi vana va vona, va vona onge loko va nga va kaneti loko va vula leswi hundzeletiweke va va khutaza leswaku va hambeta va endla tano.

Ntlhantlho: Tirhisa xitsundzuxo xa le Bibeleni xa ku “hatlisa emhakeni yo twa, [u] nonoka emhakeni yo vulavula, [u] nonoka emhakeni ya vukarhi.” (Yakobo 1:19) Xiya leswaku Yehovha Xikwembu u rhiye ndleve loko malandza yakwe ya titshandza kutani a endla leswaku swirilo swa wona swi tsariwa eBibeleni. (Genesa 27:46; Pisalema 73:12, 13) Hi xikombiso, loko Yobo a ri enhlomulweni lowukulu, u vule leswaku u navela ku fa.—Yobo 14:13.

A swi kanakanisi leswaku ndlela leyi Yobo a a titwa ha yona a yi lava ku lulamisiwa. Kambe, ematshan’weni yo honisa ndlela leyi Yobo a a titwa ha yona kumbe ku n’wi miyeta, Yehovha u xixime Yobo hi ku lehisa mbilu a n’wi pfumelela a phofula ta le mbilwini. Endzhaku ka sweswo, hi kona Yehovha a nga n’wi kongomisa hi ndlela ya rirhandzu. Tatana un’wana la nga Mukreste u andlala mhaka ya yena, a ku, “Leswi Yehovha a ndzi pfumelelaka leswaku ndzi phofula ta le mbilwini hi xikhongelo, ndzi anakanya leswaku swa twala ku va ndzi pfumelela vana va mina va titshandza eka mina.”

Nkarhi lowu taka, loko n’wana wa wena a titshandza u nga n’wi siveli, tsundzuka nawu wa Yesu lowu tivekaka ngopfu lowu nge: “Leswi mi lavaka vanhu va swi endla eka n’wina, swi endleni eka vona hilaha ku fanaka.” (Luka 6:31) Hi xikombiso, ehleketa u khomiwe hi ndlela yo biha entirhweni kumbe u hetiwe matimba hi ndlela yo karhi, hikwalaho ka swihoxo leswi u swi endleke. Kutani u byela munghana wa wena leswi ku karhateke nileswaku a wu dyi byi rhelela entirhweni. Xana u ta lava leswaku munghana wa wena a endla yini? Xana a wu ta tsaka loko a ku byela leswaku i mhangu ku ti lavela? Kumbe, xana a wu ta swi amukela loko munghana wa wena a ku: “Swa vava hakunene. Mbuyangwana ri fambe ximatsi siku ra wena.”

Vana swin’we ni vanhu lavakulu va ni mboyamelo wo amukela ndzayo loko va vona leswaku munhu loyi a va tshinyaka wa va twisisa ni ku twisisa swiphiqo leswi va langutaneke na swona. Rito ra Xikwembu ri ri: “Mbilu ya lowo tlhariha yi endla leswaku nomu wakwe wu kombisa ku twisisa, naswona yi engetela ku khorwiseka emilon’wini yakwe.”—Swivuriso 16:23.

Xana u nga tiyiseka njhani leswaku xitsundzuxo xin’wana ni xin’wana lexi u xi nyikelaka xa yingisiwa?

[Nhlamuselo ya le hansi]

[Nkomiso eka tluka 8]

“Loko munhu a angula malunghana ni mhaka yo karhi kambe a nga si yi twa, sweswo i vuphukuphuku eka yena.” —Swivuriso 18:13