Goza Ra Vunkombo

Veka Xikombiso Lexinene

Ha yini goza leri ri ri ra risima? Mintirho ya vulavula. Marito yo hundzisa rungula ntsena. Hi xikombiso, vatswari va nga byela vana va vona leswaku va va ni xichavo ni ku vulavula ntiyiso. Kambe, loko vatswari volavo va hoxana hi marito kumbe va holovela vana va vona ni ku hemba leswaku va nga voniwi nandzu eka swihoxo swa vona, va dyondzisa vana va vona leswaku hi yona ndlela leyi munhu lonkulu a hanyaka ha yona. Ku tekelela eka vatswari hi “yin’wana ya tindlela ta nkoka leti n’wana a dyondzaka ha tona,” ku vula Dok. Sal Severe.

Xiphiqo xa kona: Vatswari a va hetisekanga. Muapostola Pawulo u tsarile a ku: “Hinkwavo va dyohile, naswona va kayivela ku vangama ka Xikwembu.” (Varhoma 3:23) Malunghana ni ku lawula mavulavulelo ya hina, mudyondzisiwa Yakobo u tsarile: “Ririmi, a nga kona ni un’we eka vanhu la nga ri lerhisaka.” (Yakobo 3:8) Ku engetela kwalaho, swi tolovelekile leswaku vana va tshamela ku siringa vatswari va vona. Larry, tata wa vana vambirhi, loyi a rhuleke naswona a nga rhandziki timholovo u ri: “Ndzi hlamarile ku vona ndlela leyi vana va mina va ndzi hlundzukiseke ha yona .”

Ntlhantlho: Lwelani ku va vatswari lavanene ku nga ri lava hetisekeke. Nakambe loko u tshuka u endle xihoxo, tirhisa nkarhi wolowo ku dyondzisa vana dyondzo leyinene. Chris, tatana wa vana vambirhi, u ri: “Loko ndzi hlundzukela vana va mina kumbe loko ndzi endle xiboho lexi va twiseke ku vava hi ndlela yo karhi, ndza pfumela leswaku ndzi endle xihoxo kutani ndzi kombela ku rivaleriwa. Leswi swi dyondzisa vana va mina leswaku vatswari na vona va swi endla swihoxo nileswaku hinkwerhu hi fanele hi tikarhatela ku antswisa mahanyelo ya hina.” Kostas loyi a boxiweke eku sunguleni, u ri: “Ndzi kume leswaku leswi ndzi tisolaka loko ndzi va karihela, vana va mina va vanhwanyana va dyondze ku tisola loko va endle xihoxo.”

Yehovha Xikwembu u ri: “Mi nga karhati vana va n’wina, kambe hambetani mi va kurisa hi ku tshinya ni nkongomiso wa mianakanyo wa Yehovha.” (Vaefesa 6:4) Loko munhu loyi a vekaka milawu a vula nchumu wo karhi kambe yena a nga wu endli, sweswo swi va nyangatsa ngopfu vana hilaha swi vaka ha kona ni le ka vanhu lavakulu. Hikokwalaho, siku rin’wana ni rin’wana tivutise swivutiso leswi: Loko ndzi nga vuli nchumu siku hinkwaro, xana vana va mina va ta va va dyondze yini eka sweswo? Xana leswi ndzi va dyondzisaka hi nomu hi swona leswi ndzi swi endlaka?

[Nkomisoa eka tluka 9]

“Xana wena, loyi u dyondzisaka un’wanyana, a wu tidyondzisi ke?”—Varhoma 2:21

[Swifaniso nga eka tluka 9]

Loko mutswari a kombela ku rivaleriwa, n’wana na yena u dyondza ku endla tano