Va Ni Gome Naswona Va Heleriwe Hi Ntshembo

“A KU tele mintsumbu hinkwako-nkwako naswona laha yindlu ya hina a yi ri kona a ku nga ha vonaki,” ku vula wanuna wa le Sri Lanka endzhaku ka loko tsunami yi lovise muganga wa ka vona hi December 2004. Muhleri un’wana wa swihloko leswi vulavulaka hi vukhongeri eka phepha-hungu, u vule leswaku minkarhi yin’wana u ti kuma a “khongela a hlundzukile.”

Vanhu vo tala va vona onge timhangu ta ntumbuluko i ndlela leyi Xikwembu xi xupulaka vanhu ha yona. Mutsari un’wana wa mahungu u hlamusele xidzedze lexi onheke swinene a ku i “xibakele xa Xikwembu.” Le United States varhangeri van’wana va vukhongeri va vule leswaku makhombo yo fana na Xidzedze lexi vuriwaka Katrina i “ndlela leyi Xikwembu xi kombisaka ha yona leswaku xi hlundzukele” “madoroba lama endlaka vudyoho.” Le Sri Lanka Mubudha la hlundzukeke u vule leswaku Vakreste hi vona va endleke leswaku ku va na tsunami, a nyanyisa nyimpi leyi a na yi nga kona exikarhi ka vukhongeri bya Mabudha ni Vakreste. Mufambisi wa tempele ya Mahindu u vule leswaku xikwembu xa vona Shiva xi hlundzukile hileswi vanhu va nga riki ni mahanyelo lamanene. Murhangeri wa vukhongeri bya Mabudha le United States u vule leswi landzelaka mayelana ni leswi vuriwaka timhangu ta ntumbuluko, u te: “A hi tivi leswaku ha yini timhangu leti ti humelela. Naswona a hi swi tivi leswaku ha yini hi ri laha emisaveni.”

Loko u vona swifaniso swa makaya lama onhakeke, mintsumbu ni vanhu lava nga ni gome, xana wa tivutisa leswaku, ‘Ha yini Xikwembu xi pfumelela ku xaniseka konghasi?’ Kumbe u vona onge, ‘Xikwembu xi ni swivangelo leswi twalaka swo pfumelela swilo leswi leswaku swi endleka kambe a xi si hi byela swivangelo swa kona’? Swihloko leswi landzelaka swi ta bula hi mhaka leyi. Swi ta tlhela swi bula hi leswi vanhu va nga swi endlaka leswaku va nga vaviseki kumbe ku fa loko ko humelela mhangu ya ntumbuluko.

[Xifaniso nga eka tluka 3]

Varhangeri vo tala va vukhongeri a va swi tivi leswaku ha yini Xikwembu xi pfumelela timhangu ta ntumbuluko