Xana Ku Va Ni Ntshembo Swi Nga Endla Leswaku U Va Ni Rihanyo Lerinene?

“Mbilu leyi tsakeke i muhanyisi lonene,” marito lawa ma tsariwe hi hosi yo tlhariha ya Muisrayele emalembeni ya kwalomu ka 3 000 lama hundzeke. (Swivuriso 17:22) Namuntlha madokodela yo tala ma swi xiya leswaku marito lawa lama huhuteriweke ma vurisile hakunene. Kambe a swi olovi ku va ni “mbilu leyi tsakeke.”

A hi vangani lava kotaka ku hlula mintshikilelo ya vutomi ya siku ni siku, leyi yi hi pfilunganyaka ni ku hi endla hi nga tsaki. Hambiswiritano, minkambisiso ya manguva lawa yi komba leswaku, hambiloko hi langutane ni maxangu i swinene ku va ni ntshembo.

Ku va ni ntshembo swi vula ku va “ni langutelo lerinene hi swilo kumbe ku tshemba leswaku hinkwaswo swi ta famba kahle.” Loko munhu loyi a nga ni ntshembo a va ni xiphiqo xana u endla yini? A nga languti xiphiqo xolexo tanihi nchumu lowu nga n’wi kavanyetaka evuton’wini. Leswi a swi vuli leswaku u tiomisa nhloko a nga lavi ku amukela xiyimo. Ku ri na sweswo u twisisa xiyimo ni ku xi amukela. Kutani loko swi koteka, u teka goza ra ku cinca kumbe ku antswisa xiyimo.

Kambe munhu la pfumalaka ntshembo, wa titshandza loko a langutane ni maxangu. U tibyela leswaku i mhangu ku tilavela. Hikwalaho ka sweswo u tibyela leswaku se u tsandzekile.

Xana ku va ni ntshembo swi khumba rihanyo ra hina? Ina. Eka nkambisiso lowu tekeke malembe ya 30 eka vavabyi vo tlula 800 va le Tliliniki ya Mayo le Rochester, Minnesota, eU.S.A., vativi va sayense va kume leswaku vanhu lava nga ni ntshembo va tala ku hanya nkarhi wo leha ku tlula van’wana. Valavisisi va tlhele va kuma leswaku lava nga ni ntshembo va kota ni ku tiyiselela ntshikilelo.

Kambe eka misava leyi nga tala maxangu a swi olovi leswaku munhu a tshama a ri ni ntshembo. Hikwalaho ka sweswo vanhu swa va tikela ku ehleketa hi swilo leswinene. Xana ku nga endliwa yini leswaku ku lwiwa ni xiphiqo lexi? Eka xibokisana lexi nga eka tluka leri, u ta kuma swiringanyeto leswi nga ku pfunaka.

Hambileswi ku tshama u tsakile, swi nga horisiki mavabyi swi nga ku endla u tshama u hanye kahle ni ku va ni vutomi lebyi tsakisaka. Bibele yi ri: “Masiku hinkwawo, swisiwana swi hanya enhlomulweni, kasi ku va ni mbilu leyi tsakeke i nkhuvo lowu nga heriki.”—Swivuriso 15:15, Mahungu Lamanene.

[Bokisi/Xifaniso eka tluka 26]

Swiringanyeto Swa Ku Hlakulela Ntshemboa

◼ Loko u tikuma u ehleketa leswaku a wu nge wu tsakeli nchumu wo karhi kumbe a wu nge swi koti ku humelela eka nchumu wo karhi lowu u wu sunguleke, bakanya miehleketo yo tano. Veka mbilu ya wena eka leswinene.

◼ Ringeta ku tiphina hi ntirho wa wena. Ku nga khathariseki leswaku u endla ntirho wa muxaka muni, kuma nchumu wo karhi lowu ku tsakisaka entirhweni wa wena.

◼ Kuma vanghana lava tsakelaka vutomi.

◼ Langutana ni swiyimo leswi u nga kotaka ku swi lawula; ringeta ku amukela leswi u nga kotiki ku swi lawula.

◼ Siku ni siku tsala swilo swinharhu leswinene leswi ku humeleleke.

[Nhlamuselo ya le hansi]