Swivangelo Swo Tshemba Bibele

2. Ku Tshembeka

Swa olova ku endla vunghana ni munhu la tshembekaka. Munhu la dumeke hi ku tshembeka, na wena u nga n’wi tshemba kambe loko o ku hembela hambi ko va kan’we ntsena, a wu nge he pfuki u n’wi tshembile.

VATSARI va Bibele a va ri vanhu vo tshembeka lava tsaleke ntiyiso ntsena. Ku tshembeka ka vona ku endla leswaku hi tshemba leswi va swi tsaleke.

Swihoxo. Vatsari va Bibele va boxe swihoxo swa vona. Muxe u hlamusele xihoxo lexi a xi endleke ni vuyelo bya kona byo vava. (Tinhlayo 20:7-13) Asafa u vule leswaku nkarhi wun’wana u tikume a navela vutomi bya vulovolovo lebyi lavo homboloka va tiphinaka ha byona. (Pisalema 73:1-14) Yonasi u boxe ta ku nga yingisi ka yena ni langutelo ro biha leri a a ri na rona eku sunguleni loko Xikwembu xi kombisa tintswalo eka vadyohi lava hundzukeke. (Yonasi 1:1-3; 3:10; 4:1-3) Matewu u vule leswaku u baleke a siya Yesu eka vusiku lebyi Yesu a khomiweke ha byona.—Matewu 26:56.

Vatsari va Matsalwa ya Xiheveru va boxe ta ku tshamela ku gungula ni vuxandzuki bya vanhu varikwavo. (2 Tikronika 36:15, 16) Vatsari a va siyanga munhu, hambi ku ri vafumi va tiko ra rikwavo. (Ezekiyele 34:1-10) Mapapila ya vaapostola na wona ma boxa ntiyiso loko ma vika ta swiphiqo leswikulu swa Vakreste vo karhi, ku katsa ni swa lava a va ri ni vutihlamuleri evandlheni, kun’we ni swa mavandlha yo karhi ya lembe-xidzana ro sungula C.E.—1 Vakorinto 1:10-13; 2 Timotiya 2:16-18; 4:10.

Ntiyiso lowu nga lo dlaa, erivaleni. Vatsari va Bibele a va ringetanga ku sasekisa leswi van’wana va nga ha vaka va swi vone swi ri leswi khomisaka tingana. Vakreste va lembe-xidzana ro sungula va boxe leswaku vanhu a va nga va xiximi, a va va teka va ri swiphukuphuku. (1 Vakorinto 1:26-29) Vatsari va vule leswaku vaapostola va Yesu a va tekiwa va ri “lava nga dyondzekangiki, lava tolovelekeke.”—Mintirho 4:13.

Vatsari va tievhangheli a va cincanga ntiyiso leswaku va sasekisa ndlela leyi Yesu a kuleke ha yona. Ematshan’weni ya sweswo va vike ntiyiso wa leswaku u velekeriwe endyangwini wa xiyimo xa le hansi, ni leswaku a nga dyondzanga eswikolweni swa le henhla swa le minkarhini ya yena, nileswaku vo tala va vayingiseri va yena a va ri amukelanga rungula ra yena.—Matewu 27:25; Luka 2:4-7; Yohane 7:15.

Swi le rivaleni leswaku Bibele yi nyika swivangelo swo tala leswi kombisaka leswaku i buku leyi tsariweke hi vatsari lava tshembekaka. Xana ku tshembeka ka vona ku ku endla u tshemba Bibele?

[Xifaniso eka tluka 6]

Vatsari va Bibele vo tanihi Yonasi, va tsale hi ta swihoxo swa vona vini