Bibele—Buku Yo Hlawuleka

Yi vuriwe buku leyi xaviwaka swinene emisaveni, naswona swi tano hakunene. Bibele yi hlayiwa ni ku tlangeriwa swinene ku tlula buku yihi na yihi. Ku ta fikela sweswi, ku hangalasiwa ka yona (yi helerile kumbe xiphemu xa yona) ku ringanyeteriwa mune wa magidi ya timiliyoni ta tikopi hi tindzimi leti tlulaka 2000.

Hambiswiritano, lexi tsakisaka ku tlula ku xaviwa ngopfu ka Bibele, i ku vula ka yona leswaku yi tsariwe hi Xikwembu. Muapostola Pawulo la nga Mukreste u tsarile: “Matsalwa lawa hinkwawo ma huhutiwile hi Xikwembu.” (2 Timotiya 3:16) Xana leswi swi vula yini? Xivulwa lexi nge “huhutiwile hi Xikwembu” (Xigriki, the·oʹpneu·stos) hi ku kongoma xi vula “ku hefemuleriwa hi Xikwembu.” Rito ra Xigriki leri nga mavizweni wa rona, pneuʹma, ri vula “moya.” Hikwalaho, ku vuriwa leswaku moya lowo kwetsima wa Xikwembu wu susumetele vatsari lava nga vanhu, wu va huhutela, hi ndlela yo fanekisela, leswaku lexi nga ta humesiwa entiyisweni xi ta vuriwa Rito ra Xikwembu, hayi ra munhu. Hakunene, vo tala lava hlayeke Bibele va hlamarisiwa hi ku pfumelelana ka yona hinkwayo, ku pakanisa ka yona eka swa sayense, ku tshembeka ni ku kongoma ka vatsari va yona, naswona xa nkoka swinene vuprofeta bya yona lebyi hetisekeke—leswi hinkwaswo ka swona swi khorwiseke timiliyoni ta vahlayi lava ehleketaka leswaku buku leyi yi huma eka xihlovo lexi tlakukeke ku tlula munhu.a

Xana Xikwembu xi kongomise ku tsariwa ka Bibele hi vukheta hi ndlela yihi? Van’wana va vula leswaku xi va endlele mbitanelo wa marito ya Bibele. Van’wana va vula leswaku xi huhutele ntsena tidyondzo leti kumekaka eBibeleni, hayi marito ya yona. Kambe, entiyisweni a ku nga ta tirhisiwa endlelo rin’we ra ku huhutela, hikuva Xikwembu xi vulavule hi “tindlela to tala, . . . na vatatana, hi milomo ya vaprofeta.” (Vaheveru 1:1, xiitaliki i xerhu; ringanisa 1 Vakorinto 12:6.) Exihlokweni lexi landzelaka, hi ta kambisisa tindlela leti Xikwembu xi vulavuleke ha tona ni vatsari lava nga vanhu va kwalomu ka 40 lava tsaleke Bibele.

[Nhlamuselo ya le hansi]