Xiyenge 4

Xikwembu Xi Hi Tivisa Hi Ta Swikongomelo Swa Xona

1, 2. Hi swi tivisa ku yini leswaku Xikwembu xa va hlamula lava lavaka ku tiva hi mbilu hinkwayo?

XIKWEMBU xa rirhandzu xa swi paluxa hakunene swikongomelo swa xona eka vanhu lavanene lava xi lavaka. Xi nyika vanhu lava lavaka ku tiva tinhlamulo eka swivutiso swo tanihi leswaku ha yini xi pfumelele ku xaniseka.

² Bibele yi ri: “Loko u [xi] lavisisa [Xikwembu], u ta [xi] kuma.” “Xi kona Xikwembu ematilweni, lexi hlavutelaka swihundla.” “Hosi, Yehova, a nga endli nchumu a nga si kombisa makungu ya yena eka malandza ya yena va nga vaprofeta.”—1 Tikronika 28:9; Daniel 2:28; Amos 3:7.

Tinhlamulo Ta Kona Ti Kwihi?

3. Hi nga xi kuma kwihi xivangelo xa leswaku Xikwembu xi pfumelela ku xaniseka?

³ Tinhlamulo ta swivutiso swo tanihi leswi nge ha yini Xikwembu xi pfumelela ku xaniseka naswona xi ta endla yini ha swona ti kumeka eka rhekhodo leyi xi yi huhuteleke leswaku ku pfuneka hina. Rhekhodo yoleyo i Rito ra xona, Bibele yo Kwetsima. “Matsalwa lawa hinkwawo ma huhutiwile hi Xikwembu, ma pfuna ku dyondzisa, ni ku laya, ni ku ololoxa, ni ku tolovetisa leswo lulama, leswaku mutirheli wa Xikwembu a va la hetisekeke, a tilulamisela ku endla ntirho wun’wana ni wun’wana lowunene.”—2 Timotiya 3:16, 17.

4, 5. I yini lexi endlaka leswaku Bibele yi va buku yo hlawuleka?

⁴ Bibele i buku yo hlawuleka hakunene. Yi ni rhekhodo leyi kongomeke swinene ya matimu ya vanhu naswona yi vulavula na hi swilo swa le mahlweni ka ku vumbiwa ka vanhu. Naswona yi le nkarhini, hikuva vuprofeta bya yona byi khumba swiendlakalo swa nkarhi wa hina ni swa nkarhinyana lowu taka.

⁵ A yi kona buku yin’wana leyi nga ni timfanelo to tano ta ku kongoma ka matimu. Hi xikombiso, i matsalwa ma nga ri mangani ntsena ya vatsari va khale lava xiyekaka lama nga kona. Kambe matsalwa ya Bibele yo tala, laha man’wana ya nga swiphemu ni man’wana lama heleleke, ma ha ri kona: kwalomu ka 6 000 wa Matsalwa ya Xiheveru (tibuku ta 39 ta “Testamente ya Khale”) ni ya kwalomu ka 13 000 ya Matsalwa ya Vukriste ya Xigriki (tibuku ta 27 ta “Testamente Leyintshwa”).

6. Hikwalaho ka yini hi nga tiyisekaka leswaku namuntlha Bibele kahle-kahle ya ha fana ni nkarhi lowu Xikwembu xi yi huhuteleke ha wona?

⁶ Xikwembu xa Matimba Hinkwawo, lexi huhuteleke Bibele, xi endle leswaku vutshembeki bya marito ya yona byi hlayisiwa eka tikopi teto ta matsalwa. Kutani Tibibele ta hina namuntlha ti fana swinene ni matsalwa yo sungula lama huhuteriweke. Yinhla yin’wana leyi hi pfunaka ku twisisa leswi hi leswaku tikopi tin’wana leti tsariweke hi voko ta Matsalwa ya Vukriste ya Xigriki i ta nkarhi wa le ndzhaku ka dzana ra malembe ya ku tsala ko sungula. Tikopi ti nga ri tingani ta matsalwa ta vatsari va khale va misava leti ta ha riki kona, a hi tingani leti nga ta nkarhi wa malembe xidzana yo talanyana ku sukela eka vatsari vo sungula.

Nyiko Ya Xikwembu

7. Ndzhendzeleko wa Bibele wu aname ku fikela kwihi?

⁷ Bibele i buku leyi hangalasiwaka hi vutalo ematin’wini. Tikopi ta kwalomu ka tibiliyoni tinharhu ti kandziyisiwile. A yi kona buku yin’wana leyi tshinelelaka nhlayo yoleyo. Naswona Bibele kumbe swiphemu swa yona swi hundzuluxeleriwe eka tindzimi ta kwalomu ka 2 000. Xisweswo, ku ringanyetiwa leswaku 98 wa tiphesente ta vaaka-tiko va planete ya hina va yi kuma Bibele.

8-10. Hi swihi swivangelo swin’wana leswi endlaka leswaku hi fanela ku kambisisa Bibele?

⁸ Hakunene buku leyi vulaka leswaku yi huma eka Xikwembu naswona yi ri ni vumbhoni bya ntiyiso wa yona bya le handle ni le ndzeni, hi fanele ku yi kambisisa.a Yi hlamusela xikongomelo xa vutomi, nhlamuselo ya swiyimo swa misava, ni leswi vumundzuku byi swi khomeke. A yi kona buku yin’wana leyi nga endlaka sweswo.

⁹ Ina, Bibele i ndlela leyi Xikwembu xi vulavurisanaka ni ndyangu wa vanhu ha yona. Xi kongomise ku tsariwa ka yona hi matimba kumbe moya wa xona lowu tirhaka, laha vavanuna va kwalomu ka 40 va yi tsaleke. Xisweswo Xikwembu xi vulavula na hina hi Rito ra xona, Bibele yo Kwetsima. Muapostola Pawulo u tsarile: “Loko hi mi tisele rito ra Xikwembu, mi ri yingisile ni ku ri amukela, ku nga ri kukota mahungu yo huma eka vanhu, kambe tanihi mahungu yo huma eka Xiwembu.”—1 Vatesalonika 2:13.

¹⁰ Abraham Lincoln, muungameri wa vu-16 wa United States, u vule leswaku Bibele i “nyiko leyinene ngopfu eka leti Xikwembu xi tshameke xi ti nyika munhu . . . Hikuva handle ka yona a hi nga ta swi tiva leswinene ni leswo biha.” Kutani ke, xana nyiko leyi leyikulu yi hi byela yini hi ndlela leyi ku xaniseka ku sunguleke ha yona, leswaku ha yini Xikwembu xi ku pfumelerile, ni leswi xi nga ta swi endla ha kona?

[Nhlamuselo ya le hansi]

[Xifaniso lexi nga eka tluka 10]

Bibele, leyi huhuteriweke hi Xikwembu, i ndlela leyi xi vulavurisanaka ha yona ni ndyangu wa vanhu