Xana U Nga Yi Tshemba Ndzayo Ya Bibele?

‘Xana ndzi fanele ndzi swi kholwa leswi munhu loyi a ndzi byelaka swona?’ U nga ha tivutisa xivutiso xexo loko muxavisi wo karhi a ringeta ku ku xavisela movha wa khale kumbe loko n’watipolitiki a endla switshembiso swo karhi loko a ri eka tsima ro lava ku vhoteriwa. A wu lavi ku tlanga hi mali kumbe nkarhi wa wena u xava swilo leswi nga pfuniki nchumu kumbe u yingisela rungula leri nga pfuniki nchumu.

U NGA ha tivutisa leswi: ‘Xana Bibele yi tamele rungula ro karhi ra nkoka leri ndzi nga ri dyondzaka? Loko ndzo yi hlaya ndzi tlhela ndzi yi dyondza, xana ndzi ta va ndzi nga tlanganga hi nkarhi ni matimba ya mina?’ Ndlela ya nkoka yo hlamula swivutiso sweswo yi le ka ndzimana ya Bibele hi yoxe, leyi nge: “Vutlhari byi kombisiwa byi ri lebyi lulameke hi mintirho ya byona.” (Matewu 11:19) Ina, vuyelo lebyi vanhu va vaka na byona hikwalaho ka ku tirhisa ndzayo yo karhi kumbe “vutlhari,” hi swona swi kombaka loko ndzayo ya kona yi ri ya nkoka kumbe yi nga ri ya nkoka. Hi lawa marito lama phofuriweke hi vanhu lava tinyikeke nkarhi wo dyondza Bibele. Leswi va swi vuleke swi ta ku pfuna ku tiendlela xiboho loko swi fanerile leswaku u hlaya ni ku dyondza buku yoleyo yo hlawuleka.

Swivutiso Malunghana Ni Rifu Ni Vutomi Endzhaku Ka Rifu

I khalenyana Karen wa le United States a lovele hi mana wakwe. Ku sukela evutsongwanini bya yena a a pfumela leswaku vanhu hinkwavo vo lulama loko va fa va ya etilweni. Vukholwa-hava lebyi a a byi n’wi chavelelanyana. Kambe a a tivutisa leswi: ‘Xana leswi manana a nga etilweni u languteka njhani? Xana ndzi ta n’wi kuma njhani loko ndzi fika kwale, loko ku ri leswaku ndzi ta ya kwale? Xana loko ndzi fa swi nga endleka ndzi ya kun’wana?’

Karen u sungule ku dyondza Bibele kahle ni Timbhoni ta Yehovha. U dyondze leswaku vafi a va le tilweni kambe swi fana niloko va etlele vurhongo lebyikulu. Eklesiasta 9:5 yi ri: “A va tivi nchumu nikatsongo.” Kambe, xana u ta swi kota ku tlhela a vona mana wakwe?

Tsalwa leri landzelaka ra le Bibeleni leri nga lo tlangandla erivaleni, ri n’wi chavelerile ni ku n’wi nyika ntshembo, ri ri: “Mi nga hlamaleni ha swona, hikuva nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra yena [Kreste] kutani va huma.” (Yohane 5:28, 29) Karen u dyondze leswaku Xikwembu lexi huhuteleke Bibele xi ta tirhisa N’wana wa xona leswaku lava va feke a va pfuxela kwala misaveni. U te: “Leswi Bibele yi swi dyondzisaka malunghana ni vafi ni ta ku pfuka ka vafi swi twisiseka kahle ngopfu.”

Hi Yihi Ndlela Leyinene Yo Gandzela?

Loko nhwanyana wa le Romania la vuriwaka Angela, a ha ri ni malembe ya 14 hi vukhale mufundhisi wa kereke ya Pentekosta u n’wi khongelerile leswaku a ta kuma moya lowo kwetsima, hiloko a sungula ku vulavula hi tindzimi. Hambiswiritano, vatswari vakwe va ehlekete leswaku tidyondzo ta kereke ya Pentekosta a ti pfumelelani ni Bibele. Hiloko ndyangu hinkwawo wu tshika ku ya ekerekeni kutani wu sungula ku dyondza Bibele ni Timbhoni ta Yehovha.

Hambileswi yi nga n’wi tsakisangiki mhaka yoleyo, Angela u hatle a vona ku hambana loku nga kona exikarhi ka leswi a swi endliwa eka vukhongerini byakwe bya khale ni leswi Bibele yi swi dyondzisaka. Hi xikombiso, u hlaye Yohane 17:3, leyi nge: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” Angela u xiye leswaku lava va amukelekaka eka Xikwembu va fanele va rhanga va va ni vutivi ha xona. U vutisile a ku, “Xana swi nga va swi tise ku yini leswaku enkarhini wolowo a ndzi kume moya wa Xikwembu hi ndlela yo hlawuleka kasi a ndzi nga tivi nchumu ha xona?” Angela u ri, “Ndzi nkhensa Yehovha leswi a ndzi pfuneke leswaku ndzi kuma leswi vugandzeri bya ntiyiso byi vulaka swona hi ku tirhisa Rito ra yena leri huhuteriweke.”

Ndzayo Leyi Cincaka Vutomi

Gabriel, wanuna un’wana wa le Indiya u ri, “A ndzi ri ni ximbilwambilwana. Loko munhu o ndzi tlhontlha, a ndzi tlatlarhuka, ndzi hangalasela swilo ndzi pfanga no phyandlasela nhlambha kumbe ndzi ba vanhu. Dyondzo ya Bibele yi ndzi pfune leswaku ndzi nga vi ni ximbilwambilwana. Sweswi hambi ko va ni xiyimo xo tika, a ndza ha karihi.”

Gabriel u hlaye matsalwa yo tanihi Swivuriso 16:32, leri nge: “Loyi a hlwelaka ku hlundzuka wa antswa ku ri ni wanuna wa matimba, ni loyi a lawulaka moya wakwe ku ri ni loyi a tekaka muti.” Wanuna un’wana loyi va nge i Dhiraj, loyi na yena a nga hlula ximbilwambilwana lexi a a ri na xona u te, “Rona tsalwa leri ri ndzi pfune ku vona leswaku ku va ni ximbilwambilwana swi kombisa ku tsana, kambe ku tikhoma swi kombisa ku va ni matimba.”

Philip wa laha Afrika Dzonga a a ri xigevenga. A a tshamela ku lwa ni vanhu, a a yiva ni ku rhuketela. U hete nkarhi wo leha ejele hikwalaho ka vugevenga byakwe. Kambe hambileswi a a hanya tano a a swi navela ngopfu ku tiva Xikwembu. Endzhaku ko sungula ku dyondza Bibele ni Timbhoni ta Yehovha, u sungule ku navela ku tirhela Xikwembu kutani a endla xiboho xo hanya vutomi lebyo tenga. Hiloko a ku yi thya, ehansi mikhuva yo biha kutani a papalata khale ka vanghana va yena va swigevenga. Hi tihi tidyondzo ta Bibele leti n’wi susumeteleke ku cinca hi ndlela yoleyo?

Timbhoni ta Yehovha ti n’wi kombe marito ya Yesu lama kumekaka eka Yohane 6:44. Ti n’wi hlayele marito lawa: “Ku hava munhu loyi a nga taka eka mina handle ka loko Tatana, loyi a ndzi rhumeke, a n’wi koka.” Philip u ri, “Yehovha u vone swo karhi leswinene eka mina kutani a ndzi kokela eka vanhu va yena, vamakwerhu lava va misava hinkwayo.” Nakambe Philip u yingise rungula ra Bibele ra leswaku Yehovha u ni musa eka vadyohi lava hundzukaka. Philip u ri, “Timhaka leti ti ndzi pfune leswaku ndzi vona ndlela ya musa leyi Yehovha a va khomaka ha yona vanhu lava nga hetisekangiki lava hundzukaka.”—2 Samuwele 12:1-14; Pisalema 51.

Wade wa le Australia la ha riki jaha a a ri xidakwa naswona a a tirhisa ni swidzidzirisi, a gembula ni ku tikhoma hi ndlela yo biha. Kambe sweswo a swi nga n’wi dyisi byi rhelela. Hiloko siku rin’wana a bula ni Timbhoni ta Yehovha a tlhela a pfumela ku fambiseriwa dyondzo ya Bibele ya le kaya ya mahala. I yini leswi Wade a swi dyondzeke?

Wade u ri, “Yi ndzi tsakise ngopfu ndlela leyi Yesu a a hanyisana ni vanhu ha yona. A kombisa musa, ntwela-vusiwana ni ku rhandza vanhu hinkwavo ku katsa ni vana. Loko ndzi ya ndzi dyondza a ndzi ya ndzi lava ku fana na yena. Bibele yi ndzi dyondzise ndlela yo va wanuna wa xiviri ni ndlela yo cinca mahanyelo ya mina.” Kambe, xana ku humelele yini hi vubihi lebyi a byi endleke? Wade u ya emahlweni a ku: “Bibele yi ndzi dyondzise leswaku loko ndzo hundzuka eswidyohweni swa mina ndzi cinca mahanyelo ya mina, Xikwembu xi ta ndzi rivalela. Entiyisweni, a ndzi ta hanya hilaha ku nga heriki eparadeyisini laha misaveni. Eku heteleleni, a ndzi ta langutela ku va ni vumundzuku lebyinene!” (Matewu 5:5) Wade u tshike mahanyelo ya yena hinkwawo ya khale kutani sweswi u gandzela Yehovha hi ripfalo ro tenga.

Timhaka leti wa ha ku ti hlayaka ti huma eka vanhu lava a va lava ku cinca vutomi bya vona. Va kambisise Bibele ku vona loko leswi yi swi dyondzisaka swi ta va pfuna eka swiphiqo leswi va nga na swona swi tlhela swi hlamula swivutiso swa vona. Vuyelo lebyinene lebyi va byi kumeke byi va khorwisile leswaku va tshemba nkongomiso wa Bibele lowu pfunaka. Na wena u nga wu tshemba.

Rungula leri huhuteriweke ra khale ka khaleni ri hlayekisa xileswi: “Wa tsaka munhu la kumeke vutlhari, ni munhu la kumaka ku twisisa, hikuva ku byi pindzula swa antswa ku ri ni ku pindzula silivhere ni ku byi kuma swi tlula ku kuma nsuku. I byinene ku tlula tikorala, naswona hinkwaswo leswi tsakisaka swa wena a swi nge ringani na byona. Ku leha ka masiku ku le vokweni ra byona ra xinene; naswona evokweni ra byona ra ximatsi ku ni rifuwo ni ku vangama. Tindlela ta byona i tindlela ta ku tsakisa, naswona tindlela ta byona hinkwato i ku rhula. I murhi wa vutomi eka lava va khomelelaka eka byona, naswona va ta vuriwa lava tsakeke lava va khomelelaka swi tiya eka byona.”—Swivuriso 3:13-18.

[Bokisi/Xifaniso eka tluka 25]

NDLELA LEYI BIBELE YI PFUNEKE MUBOHIWA UN’WANA HA YONA

Wanuna un’wana la vuriwaka Bill a a tihanyela kahle ni nghamu yakwe. Kambe loko va nga si hlanganisa lembe va tekanile, u hoxiwe ekhotsweni hikwalaho ka xidyoho lexi a a xi endlile eka malembe lama hundzeke.

Endzhaku ka loko a toloverile le khotsweni, u kunguhate ku wu tirhisa hi vutlhari nkarhi lowu a a ta wu heta kwale. U ri: “A ndzi titshamela emubedweni wa mina ndzi hlaya ni ku dyondza Bibele.” Nakambe a a tirhisa leswi a a swi dyondza. “A ndzi ri ni musa ni xinghana eka vabohiwa-kulorhi, lava a va swi vona leswaku a ndzi nga lavi ku endla swilo swo biha leswi a va swi endla. A va vulavula hi mina va ku: ‘Bill u lava ku tirhisa nkarhi wa yena wa ku va laha khotsweni hi ndlela ya yena n’wini leswaku a tiva Xikwembu ni Bibele. A nge karhati munhu.’

“Leswi a ndzi ri ni ndhuma leyinene, vabohiwa lavan’wana a va nga ndzi katsi eka timholovo ta vona ni le ka swiendlo swin’wana leswi nga tsakisiki. Varindzi va kale va swi xiya leswaku a ndzi nge va khomisi nyarhi hi timhondzo. Kutani va hetelele va vula leswaku ndzi nyikiwa mintirho yin’wana leyi nga ta ndzi endla ndzi nga tirhi swin’we ni vabohiwa lavan’wana siku hinkwaro. Ku tirhisa Bibele evuton’wini bya mina swi ve nsirhelelo lowukulu.”

Bill a a va kona eka minhlangano ya Timbhoni ta Yehovha leyi a yi khomeriwa ekhotsweni a tlhela a hisekela ku byela vabohiwa lavan’wana timhaka leti a a ti dyondza. U khuvuriwile a va Mbhoni ya Yehovha a ha ri kwale khotsweni. Loko a rungula ntokoto wa yena, u ri: “Ndzi tlange hi malembe ya 50 ya vutomi bya mina, naswona ndzi lava ku antswisa vutomi bya mina. Ndza kholwa leswaku ndlela leyi nga yona ntsena leyi mubohiwa a nga byi antswisaka ha yona vutomi byakwe i ku va a tirhisa tidyondzo ta Bibele. Kutani ku dyondza Bibele hi ndlela leyi faneleke i ku yi dyondza ni Timbhoni ta Yehovha. Vukhongeri bya tona hi byona ntsena lebyi dyondzisa ntiyiso wa Bibele. Sweswo swa olova.”

Leswi Bill a nga huma ekhotsweni u tirha hi ku hiseka evandlheni rin’wana ra Timbhoni ta Yehovha le United States. Yena ni nsati va hambeta va dyondza Rito ra Xikwembu ni ku hanya hi leswi ri swi dyondzisaka. Va wu tlangela ngopfu ntiyiso wa marito lama kumekaka eka Esaya 48:17, 18, lama nge: “Mina Yehovha, ndzi Xikwembu xa wena, Loyi a ku dyondziselaka ku ku pfuna, Loyi a ku fambisaka endleleni leyi u faneleke u famba ha yona. Kunene loko a wu yingise swileriso swa mina! Kutani ku rhula ka wena a ku ta fana ni nambu, ni ku lulama ka wena a ku ta fana ni magandlati ya lwandle.”

[Xifaniso eka tluka 23]

Karen wa le U.S.A.

[Xifaniso eka tluka 23]

Angela wa le Romania

[Xifaniso eka tluka 24]

Gabriel wa le India

[Xifaniso eka tluka 24]

Dhiraj wa le India

[Xifaniso eka tluka 24, 25]

Philip wa laha Afrika Dzonga ni ndyangu wakwe

[Xifaniso eka tluka 24]

Wade wa le Australia