Vantshwa Va Vutisa . . .

Ha Yini Ndzi Fanele Ku Hanya Hi Milawu Ya Bibele?

AHI nge u le holweni yo dyela eka yona exikolweni hi nkarhi wo wisa, u le ku tidyeleni swin’we ni vanhwanyana-kuloni vambirhi. Kutani un’wana wa vona u langute mufana loyi a ha ku fikaka exikolweni.

Hiloko nhwanyana wo sungula a ku eka wena, “Mufana luya wa fa hi wena. Ndlela leyi a ku langutaka ha yona yi kombisa leswaku wa ku rhandza. Phela, mahlo yakwe a ma suki eka wena!”

Nhwanyana wa vumbirhi u ri, “Phela u hava ntombhi!”

Nhwanyana wo sungula u ri, “Khombo ra kona mina se ndzi ni jaha. Loko a ndzi nga ri na jaha a ndzi nga ta kanakana ku jola na yena!”

Hiloko nhwanyana wo sungula a vula leswi u nga laviki no swi twa.

U ri, “Swi ta njhani u ri hava jaha?”

A a wu swi tiva leswaku u ta vutisiwa xivutiso xexo. Mhaka ya xiheri hileswaku wa swi lava ku va ni jaha. Kambe u byeriwe leswaku swa antswa u rindza kukondza u kula lerova u fanelekela ku nghenela vukati. Loko a swi nga ri tano . . .

Nhwanyana wa vumbirhi u ri, “A wu na jaha hikwalaho ka vukhongeri bya wena, a swi tano ke?”

Hiloko embilwini ya wena u ku, ‘U be kona onge u vona leswi ndzi swi ehleketaka?’

Nhwanyana wo sungula wa ku sapatela a ku, “Bibele leyi ya wena se yi ku pete nhloko. Ha yini u nga tiphini hi vutomi wa ha tsakama?”

Xana u tshama u tikuma u ri exiyin’weni xo fana ni lexi, u hlekuriwa hikwalaho ka leswi u ringetaka ku hanya hi misinya ya milawu ya Bibele? Xana u angurise ku yini?

◼ U lwela mahanyelo ya wena lamanene hi ku tiyimisela.

◼ Hambileswi a swi tika u lwele ripfumelo ra wena hilaha u nga kotaka hakona.

◼ Kumbexana u vona onge vanghana va wena va tiyisile—a wu kayela swo karhi leswi a wu hanya hi milawu ya Bibele!

Xana u tshame u tivutisa u ku, ‘Xana swa pfuna hakunene ku hanya hi milawu ya Bibele?’ Muntshwa la vuriwaka Deborah u ehlekete hi mhaka leyi.a U ri, “Vanghana va mina a va endla nchumu wun’wana ni wun’wana lowu va wu lavaka. A swi tikomba onge a nga kona loyi va nga ta tihlamulela eka yena. A ndzi vona onge ku hanya hi milawu ya Bibele swi ndzi tsona swo tala. A ndzi navela ku hanya ku fana ni vanghana va mina va le xikolweni.”

Xana Swi Hoxile Ku Tivutisa Leswaku Xana I Swa Risima Ku Hanya Hi Milawu Ya Xikwembu?

Mutsari wa Bibele Asafa u tshame a hanya enkarhini lowu a tivutiseke loko swi ri swa nkoka ku hanya hi ndlela leyi tsakisaka Xikwembu. U tsarile a ku, “Ndzi navele lava tibumaka, loko ndzi vona ku rhula ka vanhu vo homboloka.” U tlhele a ku, “Hakunene ndzi yi basisele swa hava mbilu ya mina nileswi ndzi hlambeke mavoko hikwalaho ka ku pfumala nandzu.”—Pisalema 73:3, 13.

A swi kanakanisi leswaku Yehovha Xikwembu wa swi twisisa leswaku minkarhi yin’wana vanhu va nga ha tivutisa loko swi ri swa risima ku hanya hi misinya ya milawu yakwe. Hikuva, u endle leswaku leswi Asafa a a swi ehleketa swi tsariwa eBibeleni. Asafa u hetelele a swi vonile leswaku ku hanya hi milawu ya Xikwembu swa vuyerisa swinene. (Pisalema 73:28) Xana u xi fikelele njhani xiboho xo hanya hi milawu ya Xikwembu? Entiyisweni, Asafa a a tlharihile. Xiboho lexi a xi endleke, a nga xi endlanga hileswi a xanisekeke kambe u xi endle hikwalaho ka leswi a dyondzeke eka swihoxo swa van’wana. (Pisalema 73:16-19) Xana na wena u nga swi kota ku endla leswi fanaka?

Ku Kambisisa Ntiyiso Wa Mhaka

Ku hambana na Asafa, Hosi Davhida u dyondze hi ndlela yo vava leswaku lava honisaka misinya ya milawu ya Xikwembu va kuma hakelo ya kona. Davhida u endle vuoswi ni nsati wa un’wana wa malandza yakwe kutani a ringeta ku pfala-pfala manyala yakwe. Hikwalaho ka sweswo, u vavise timbilu ta van’wana ku katsa ni ya Xikwembu, naswona u twe mbilu ku vava swinene hikwalaho ka sweswo. (2 Samuwele 11:1–12:23) Endzhaku ko va Davhida a tisorile, Yehovha u n’wi huhuterile leswaku a tsala ndlela leyi a titwaka ha yona hi ku tsala risimu ni ku endla leswaku marito wolawo ma hlayisiwa eBibeleni leswaku ma hi dyondzisa. (Pisalema 51:1-19; Varhoma 15:4) Hikwalaho i vutlhari naswona swa amukelaka hi ku ya hi Matsalwa ku dyondza eka swihoxo swa van’wana.

Leswaku u pfuneka hi ku tekelela xikombiso xa Asafa ni ku papalata swihoxo swa Davhida, vona tinhlamuselo ta vantshwa van’wana va le matikweni yo hambana-hambana lava tshameke va honisa misinya ya milawu ya Bibele. Va tshame va katseka eku tikhomeni ko biha hi tlhelo ra rimbewu. Ku fana na Davhida, va tisorile eka swidyoho swa vona kutani va tlhela va va lava amukelekaka eka Xikwembu. (Esaya 1:18; 55:7) Xiya leswi va swi vuleke.

Xalamuka!: I yini leswi kuceteleke mianakanyo ni swiendlo swa wena?

Deborah: “Loko ndza ha ri exikolweni a ndzi vona un’wana ni un’wana a ri ni jaha kumbe ntombhi, naswona a va tikomba va tsakile. Loko ndzi ri eku hungaseni na vona ivi ndzi vona va ntswontswana ni ku vukarhana, a ndzi navela naswona ndzi titwa ndzi ri ni xivundza. A ndzi tshamela ku anakanya hi jaha ro karhi leri a ndzi ri rhandza. Sweswo swi nyanyise ku navela ka mina ku va ni jaha leswaku ndzi ta endla hinkwaswo leswi nga enerisaka ku navela ka mina.”

Mike: “A ndzi hlaya tibuku ni ku hlalela tiprogreme leti navetisaka rimbewu. Ku vulavula hi timhaka ta rimbewu ni vanghana va mina swi engetele ku navela ka mina. Hiloko siku rin’wana ndzi tikuma ndzi ri ni nhwanyana un’wana, a ndzi anakanya leswaku hi nga tiphina hi ku khoma-khomana handle ko va ni vuxaka bya rimbewu, ni leswaku ndzi nga kota ku tikhoma.”

Andrew: “A ndzi tala ku languta swifaniso swa vanhu lava nga ambalangiki eka Internet. Ndzi sungule ku kukutlela byala. Naswona ndzi sungule ku ya eswinkhubyanini ni vantshwa lava nga yi xiximiki milawu ya mahanyelo ya le Bibeleni.”

Tracy: “Loko ndza ha ri ni malembe ya 16, nchumu wa nkoka eka mina a ku ri ku dzumba ni jaha ra mina. A a ndzi swi tiva leswaku ku va ni vuxaka bya rimbewu emahlweni ka vukati ni munhu loyi ndzi nga tekanangiki na yena swi hoxile, kambe a ndzi nga swi vengi. A ndzi nga swi lavi ku va ni vuxaka bya rimbewu ni munhu un’wana emahlweni ka vukati, kambe ndzi tsandzekile ku tikhoma. Hi ku famba ka nkarhi ripfalo ra mina ri file.”

Xalamuka!: Xana ndlela leyi a wu hanya ha yona a yi ku tsakisa?

Deborah: “Eku sunguleni ndzi titwe ndzi tsakile hikuva ndzi swi kotile ku hanya vutomi byo fana ni bya tintangha ta mina. Kambe a swi tlhaveriwanga hi dyambu. Ndzi sungule ku titwa ndzi nga basanga, ndzi tekeriwe vumunhu bya mina naswona ndzi sale ndzi ri xikangalafula. Ndzi sungule ku tisola swinene hileswi ndzi lahleke vunhwana bya mina, ku nga nchumu lowu lahlekeleke makumu. A ndzi tshamela ku tivutisa ndzi ku, ‘Xana a ndzi anakanya leswaku ndzi nge yi kumi hakelo ya kona?’ Xivutiso lexi ndzi dyisaka mbitsi hi lexi, ‘Ha yini ndzi honise misinya ya milawu ya rirhandzu ya Yehovha?’”

Mike: “Ndzi sungule ku titwa onge ku ni nchumu wo karhi lowu nga fambiki kahle emirini wa mina. Ndzi ringete ku honisa ndlela leyi swiendlo swa mina a swi khumba van’wana ha yona, kambe ndzi tsandzekile. Ndza tisola loko ndzi xiya leswaku ku titsakisa ka mina a ku vavisa van’wana. Ndzi sungule ku ka ndzi nga ha tiphini hi vurhongo. Eku heteleleni, ku titsakisa hi ku tikhoma ko biha hi tlhelo ra rimbewu ku herile, kutani ndzi sungula ku dya mbitsi ndzi xeva hi nhlomulo.”

Andrew: “Swi ye swi ndzi olovela ngopfu ku endla swilo swo biha. Kambe hi nkarhi lowu fanaka, a ndzi kingindziwa hi ripfalo naswona a ndzi tivona nandzu.”

Tracy: “A swi yanga helo hiloko ndzi sungula ku vona vuyelo bya kona. Mahanyelo yo biha ma onhe vuntshwa bya mina. A a ndzi anakanya leswaku mina na jaha ra mina hi ta tiphina. Kambe a swi vanga tano. Hi hetelele hi vangelane switlhavi ni ku dyisana mbitsi. A a ndzi rila vusiku byin’wana ni byin’wana, ndzi tisola hileswi ndzi nga endlangiki swilo hi ndlela ya Yehovha.”

Xalamuka!: Xana u nga va khutaza njhani vantshwa lava anakanyaka leswaku milawu ya mahanyelo ya Bibele yi va tsona swo karhi?

Deborah: “Swilo a swi nge ku fambeli loko u honisa misinya ya milawu ya Bibele. Anakanya hi ndlela leyi Yehovha a nga ta titwa ha yona loko u landzela ndzayo ya yena. Nakambe dzikisa mianakanyo ya wena eka vuyelo lebyi vaka kona loko u honisa xitsundzuxo xa Yehovha. Tsundzuka, leswaku swiendlo swa wena a swi khumbi wena ntsena. Swi khumba ni vanhu van’wana. Kutani loko u honisa xitsundzuxo xa Xikwembu, u ta ti vavisa.”

Mike: “Entiyisweni vutomi bya tintangha ta wena byi nga vonaka byi tsakisa. Kambe rhanga u anakanyisisa u nga si ti joyina. Nchumu wun’wana wa nkoka swinene eka tinyiko leti Yehovha a ti nyikaka vanhu i xindzhuti ni vutengi. Loko munhu a lahla tinyiko leti hikwalaho ko tsandzeka ku tikhoma u ti susa xindzhuti. Vulavula ni vatswari va wena kun’we ni vanhu van’wana lavakulu malunghana ni swiphiqo swa wena. Loko u endla xihoxo, hatlisa u tiphofula kutani u lulamisa xiyimo. Loko u endla swilo hi ndlela ya Yehovha, u ta kuma ku rhula ka mianakanyo.”

Andrew: “Loko u nga ri na ntokoto, u anakanya leswaku ndlela leyi tintangha ta wena ti hanyaka ha yona ya tsakisa. Ndlela leyi ti endlaka swilo ha yona yi nga ku yenga. Kutani hlawula vanghana va wena hi vutlhari. Tshemba Yehovha, kutani u ta papalata ku biwa hi ripfalo.”

Tracy: “U nga ha ku, ‘A swi nge ndzi humeleli.’ Manana u ndzi vitanile kutani a ndzi tsundzuxa leswaku swiendlo swa mina swi ta ndzi vangela mahlomulo. A ndzi n’wi yingisanga! A ndzi anakanya leswaku ndzi tlharihile lerova ndzi ta swi kota ku papalata ku tikhoma ko biha. A ndzo tixisa. Hanya hi ku landza milawu ya Yehovha naswona u va munghana wa vanhu lava hanyaka hi yona. U ta va ni vutomi lebyi tsakisaka.”

Xana Misinya Ya Milawu Ya Bibele Yi Ku Sivela Ku Endla Swo Karhi?

Loko tintangha ta wena ti ku hlekula hikwalaho ka leswi u ringetaka ku hanya hi milawu ya Bibele, tivutise swivutiso leswi: ‘Ha yini ti ala ku hanya hi milawu ya mahanyelo ya Bibele? Xana ti yi hlayile Bibele ni ku kambisisa vuyelo lebyi vaka kona loko munhu a yingisa milawu ya Xikwembu? Xana ti byi vonile vuyelo byo biha lebyi tisiwaka hi ku honisa milawu yoleyo? Kumbe, xana ti endla leswi van’wana va swi endlaka handle ko anakanya?’

Entiyisweni wa va tiva vanhu lava ngo “landzelela ntshungu.” (Eksoda 23:2) Xana wa swi lava ku endla swiboho leswinene? U nga swi endlisa ku yini sweswo? Hi ku yingisa ndzayo ya Bibele ya ku “tiyiseka hi ku rhandza ka Xikwembu loku nga kunene ni loku amukelekaka ni loku hetisekeke.” (Varhoma 12:2) Yehovha i “Xikwembu lexi tsakeke,” naswona u lava leswaku na wena u tsaka. (1 Timotiya 1:11; Eklesiasta 11:9) Milawu leyi tsariweke eBibeleni i ya ku pfuna wena. I ntiyiso leswaku u nga yi teka yi ri leyi ku sivelaka ku va ni ntshunxeko. Kambe, nawu wa mahanyelo wa Bibele wu fana ni bandhi ra xitulu leri pfunaka vakhandziyi leswaku va nga vaviseki.

U nga swi tshemba leswi Bibele yi swi vulaka. Loko u hlawula ku hanya hi milawu ya yona, a wu nge tsakisi Yehovha ntsena kambe na wena n’wini u ta pfuneka.—Esaya 48:17.

Swihloko swin’wana leswi nge “Vantshwa Va Vutisa . . . ” swi kumeka eka Website leyi nge, www.watchtower.org/ype

[Nhlamuselo ya le hansi]

SWIVUTISO SWO ANAKANYISISA HA SWONA

◼ I yini lexi endlaka swi ku tikela ku hanya hi milawu ya Bibele?

◼ Ha yini u fanele u tiyiseka leswaku ku hanya hi milawu ya Xikwembu i ndlela leyinene ngopfu?