Vumbhoni Bya Rirhandzu Ra Xikwembu

SWIHLAMARISO swa nkombo leswi endliweke hi vanhu va khale swi thyiwe vito leri nga laha henhla hileswi swi hlamariseke vanhu. Kutani handle ka swihondzo swa le Egipta, miako leyi a ya ha kumeki. Hi hala tlhelo, hambileswi Bibele yi tsariweke hi vavanuna vo tshembeka ehenhla ka swilo leswi onhakaka, ya ha ri kona naswona a yi cincanga nchumu ya ha ri tano ninamuntlha. Hi nga yi tshemba hi ku helela buku leyi yo hlawuleka.—Esaya 40:8; 2 Timotiya 3:16, 17.

Loko Yehovha Xikwembu a endla leswaku mianakanyo ya yena yi tsariwa, u tiyisekise leswaku yi nga pfanganisiwi ni mianakanyo ya vanhu. Ku engetela kwalaho, ririmi ro olova leri tirhisiweke hi vanhu lava tirhisiweke hi Xikwembu ku tsala Bibele ri endla leswaku hambi ku ri vanhu vo tala lava nga dyondzekangiki va kota ku yi hlaya ni ku yi twisisa. (Mintirho 4:13) Leswi hi swona leswi u nga swi langutelaka eka Muvumbi ni vatsari va Bibele lava a va huhuteleke. Ha tiyiseka leswaku ku tala ka Tibibele a ku yi susi xindzhuti, ematshan’weni ya sweswo ka yi tlakusa! Ku engetela kwalaho, ku kandziyisiwa ka Tibibele to tala swi nyikela vumbhoni bya ndlela leyi Xikwembu xi va rhandzaka ha yona vanhu, ku nga khathariseki leswaku va tshama kwihi kumbe va vulavula ririmi rihi. (1 Yohane 4:19) Ku tala ka tikopi ta Bibele a swi yi susi xindzhuti kambe swi yi endla yi va ya nkoka swinene!

Leswi tsariweke eBibeleni swi nyikela vumbhoni byo tala hi ta rirhandzu ra Xikwembu. Hilaha hi swi voneke hakona eka swihloko swo rhanga, Rito ra Xikwembu ri hlamusela laha hi humaka kona, ha yini vutomi byi komile ni ku taleriwa hi maxangu ni ndlela leyi Xikwembu xi nga ta lulamisa xiyimo hi ku tirhisa Mfumo wa xona. Nakambe hi vulavule hi ndzayo leyi pfunaka ya le Bibeleni malunghana ni ndlela yo hanya vutomi lebyi tsakisaka ni lebyi vuyerisaka sweswi. (Pisalema 19:7-11; Esaya 48:17, 18) Ku tlula kwalaho, hi dyondze hi ta ndlela leyi Muvumbi a nga ta xi sula ha yona xisandzu lexi tisiweke evitweni rakwe hikwalaho ka mavunwa ya Sathana.—Matewu 6:9.

Hi yihi buku yin’wana leyi pfunaka, leyi tlakukeke ni leyi nyikaka ntshembo eka vanhu lava nga emaxangwini? Ina, ku hambana ni swihlamariso swa nkombo leswi endliweke hi vanhu va khale, leswi vunyingi bya swona a swi akeriwe ku vangamisa swikwembu swa hava kumbe vanhu va matimba, entiyisweni Bibele i vumbhoni bya rirhandzu ra Yehovha ro pfumala vutianakanyi leri a va rhandzaka ha yona vanhu.

Loko u nga si ma hlaya Matsalwa, ha yini u nga tikambisiseli wona hi wexe? Namuntlha, Timbhoni ta Yehovha ti fambisa tidyondzo ta Bibele ta mahala ni vanhu vo tlula timiliyoni ta tsevu emisaveni hinkwayo. Ti swi teka ku ri lunghelo ku pfuna vanhu leswaku va tivonela hi ya vona leswaku Bibele ya tshembeka hakunene, nileswaku i Rito ra Xikwembu leri huhuteriweke.—1 Vatesalonika 2:13.