Xana Xikwembu Xi Kona? Xana Ku Tiva Leswaku Xi Kona Swi Ta Ku Pfuna Njhani?

Xivutiso xa leswaku Xikwembu xi kona kumbe a xi kona swi tikomba xi nga ri na nhlamulo eka vo tala kumbe xi nga pfuni nchumu. Hervé loyi a kuleleke eFurwa u ri: “Mina a ndzi titeki ndzi ri munhu la nga pfumeriki eka Xikwembu, kambe a ndzi mupfumeri. Eka mina ndzi vona swi antswa ku va munhu a tihanyela hi ku tirhisa miehleketo yakwe. Sweswo a swi kali swi lava leswaku munhu a pfumela eka Xikwembu.”

Van’wana va nga ha titwa ku fana na John wa le United States. U te: “Ndzi kurisiwe hi vatswari lava a va nga pfumeli eka Xikwembu. Leswi a ndza ha ri ntsongo, a ndzi nga ri na mhaka ni leswaku Xikwembu xi kona kumbe a xi kona. Kambe, minkarhi yin’wana a ndzi tivutisa hi mhaka leyi.”

Xana u tshame u tivutisa leswaku Xikwembu xi kona naswona loko xi ri kona, xana vutomi byi ni xikongomelo? Swi nga endleka leswaku u tshame u langutana ni swilo leswi a swi ta tika ku swi hlamusela loko a ku nga ri na Muvumbi, swo tanihi vumbhoni bya leswaku swilo leswi hanyaka a swi humi eka swilo leswi nga hanyiki kumbe eka swa sayense leswi nga tiendlekela hi singita.—Hlaya bokisi leri nge “Kambisisa Vumbhoni.”

Xiya nkoka wa tinhla leti ku vulavuriweke ha tona laha henhla. Ti fana ni swikombo leswi hi kombaka laha ku nga ni xuma. Loko u kuma vumbhoni lebyi tiyisekisaka leswaku Xikwembu xi kona ni rungula leri tshembekaka hi xona, u ta pfuneka eka swilo swo tala. Hi leswi swikombiso swa mune:

1. XIKONGOMELO XA VUTOMI

Loko xikongomelo xa vutomi xi ri kona, hi lava ku xi tiva hi tlhela hi twisisa leswaku xi hi khumba njhani. Nakambe loko Xikwembu xi ri kona naswona hina hi nga swi xiyi, swi vula leswaku a hi wu tivi nchumu wa nkoka swinene evuakweni hinkwabyo.

Bibele yi vula leswaku Xikwembu i Xihlovo xa vutomi. (Nhlavutelo 4:11) Xana ku tiva mhaka leyi swi nga endla leswaku vutomi bya hina byi va ni xikongomelo hi ndlela yihi? Xiya leswi Bibele yi swi dyondzisaka hi mhaka leyi.

Vanhu va hlawulekile ku tlula swivumbiwa hinkwaswo swa laha misaveni. Bibele yi vula leswaku hi endliwe hi Xikwembu leswaku hi fana na xona hi tlhela hi kombisa timfanelo ta xona. (Genesa 1:27) Ku engetela kwalaho, Bibele yi dyondzisa leswaku vanhu va nga va vanghana va Xikwembu. (Yakobo 2:23) A ku na nchumu wa nkoka evuton’wini bya hina ku tlula ku va ni vuxaka ni Muvumbi wa hina.

Swi vula yini ku va munghana wa Xikwembu? Vanghana va Xikwembu va nga vulavula na xona. Nakambe xi tshembisa leswaku xi ta yingisa swikombelo swa vona. (Pisalema 91:15) Tanihi vanghana va Xikwembu, hi nga tiva mianakanyo ya xona eka swilo swo tala. Leswi swi nga hi pfuna hi twisisa tinhlamulo ta swivutiso leswi hi karhataka evuton’wini.

2. KU RHULA KA MIANAKANYO

Hi xikombiso, van’wana swa va tikela ku pfumela eka Xikwembu hikwalaho ka ku xaniseka loku va ku vonaka emisaveni hinkwayo. Va tivutisa leswaku ‘ha yini Muvumbi loyi a nga ni matimba hinkwawo a pfumelela ku xaniseka ni vubihi?’

Nhlamulo ya Bibele leyi chavelelaka hileswaku, Xikwembu a xi nga tumbuluxanga vanhu leswaku va xaniseka. Loko vanhu va tumbuluxiwa, vutomi bya vona a byi nga ri na ku xaniseka. Nakambe a ku nga ri xikongomelo xa Xikwembu ku va vanhu va fa. (Genesa 2:7-9, 15-17) Xana swa tika ku tshemba mhaka leyi? Xana ko va ntsheketo? Doo! Loko ku ri leswaku ku ni Muvumbi la nga ni matimba hinkwawo naswona mfanelo ya yena leyikulu ku ri rirhandzu, hakunene a hi ta rindzela ku va hi hanya vutomi byo tano.

I yini lexi vangeke xiyimo lexi hi nga eka xona namuntlha? Bibele yi vula leswaku Xikwembu xi vumbe vanhu va ri ni ntshunxeko wa ku tihlawulela. Hina vanhu a hi tirhoboto leti sindzisiwaka ku yingisa Xikwembu. Vatekani vo sungula lava vanhu hinkwavo va humaka eka vona, a va wu yingisanga nkongomiso wa Xikwembu. Kambe va ve ni vutianakanyi, va endla ku rhandza ka vona. (Genesa 3:1-6, 22-24) Sweswi ha xaniseka hikwalaho ka vona.

Hi nga kuma ku rhula ka xiviri ka mianakanyo hi ku va hi tiva leswaku ku xaniseka a ku nga ri xikongomelo xa Xikwembu. Kambe hi lava leswaku ku xaniseka ku herisiwa. Hi lava ku va ni ntshembo hi vumundzuku.

3. NTSHEMBO

Hi ku hatlisa endzhaku ka loko vanhu va xandzukile, Xikwembu xi tshembise leswaku hi ku famba ka nkarhi xi ta hetisisa xikongomelo xa xona hi misava. Leswi xi nga ni matimba hinkwawo, a ku na lexi xi nga xi sivelaka leswaku xi endla tano. (Esaya 55:11) Ku nga ri khale, Xikwembu xi ta herisa swiendlo hinkwaswo leswi vangiweke hi ku xandzuka naswona misava ni vanhu swi ta fambisana ni xikongomelo xa xona xa le ku sunguleni.

Xana leswi swi nga vula yini eka wena? Ku ni switshembiso swo tala eBibeleni leswi Xikwembu xi hi tshembiseke swona, kambe xiya swimbirhi.

• KU RHULA EMISAVENI HINKWAYO NI KU HERISIWA KA VUHOMBOLOKI. “Hi nkarhinyana, lowo homboloka a nge he vi kona; kunene u ta languta endhawini yakwe, u ta va a nga ri kona. Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—Pisalema 37:10, 11.

• KU HERISIWA KA VUVABYI NI RIFU. “Ku hava munhu la tshamaka kona la nga ta ku: ‘Ndza vabya.’” (Esaya 33:24) “Entiyisweni u ta mita rifu hi masiku, kunene Yehovha, Hosi leyi Lawulaka yi ta sula mihloti eswikandzeni hinkwaswo.”—Esaya 25:8.

Ha yini hi nga tshembaka switshembiso swa Xikwembu leswi kumekaka eBibeleni? Hikuva ku ni vuprofeta byo tala lebyi nga eBibeleni lebyi se byi hetisekeke. Kambe ntshembo wa vumundzuku wa ku herisiwa ka ku xaniseka, a wu herisi swiphiqo leswi hi nga na swona sweswi. Hi wihi mpfuno wun’wana lowu Xikwembu xi hi nyikaka wona?

4. MPFUNO EKA SWIPHIQO NI KU ENDLA SWIBOHO

Xikwembu xi hi nyika nkongomiso lowu nga ta hi pfuna hi langutana ni swiphiqo hi tlhela hi endla swiboho leswinene. Swiboho swo tala i switsongo kambe swin’wana swi khumba vutomi bya hina hinkwabyo. A ku na munhu loyi a nga hi nyikaka vutlhari lebyi pfunaka ku fana ni lebyi Muvumbi wa hina a nga hi nyikaka byona. Hi yena a nga ni vutlhari lebyikulu hikuva u tiva hinkwaswo naswona hi yena munyiki wa vutomi. Hikwalaho, u tiva leswi hi faneleke.

Bibele yi ni mianakanyo ya Yehovha Xikwembu hikuva hi yena a tirhiseke vanhu vo hambanahambana leswaku va yi tsala. EBibeleni hi kuma marito lama nge: “Mina Yehovha, ndzi Xikwembu xa wena, loyi a ku dyondziselaka ku ku pfuna, loyi a ku fambisaka endleleni leyi u faneleke u famba hi yona.”—Esaya 48:17, 18.

Xikwembu xi ni matimba lama nga heriki naswona xi tiyimisele ku ma tirhisa leswaku xi hi pfuna. Bibele yi hlamusela Xikwembu tanihi tatana la nga ni rirhandzu loyi a lavaka ku hi pfuna. Yi ri: “Tatana la nge tilweni u ta nyika moya lowo kwetsima eka lava n’wi kombelaka!” (Luka 11:13) Matimba lawa, lama humaka eka Xikwembu ma nga hi kongomisa ma tlhela ma hi tiyisa.

U nga wu kuma njhani mpfuno wolowo eka Xikwembu? Bibele ya hlamula: “La tshinelelaka Xikwembu u fanele a kholwa leswaku xi kona ni leswaku hi xona muhakeri wa lava va xi lavaka hi mbilu hinkwayo.” (Vaheveru 11:6) Leswaku u tiyiseka leswaku Xikwembu xi kona, u fanele u kambisisa vumbhoni.

XANA U TA ENDLA NDZAVISISO?

Swi lava nkarhi ku lava ntiyiso hi Xikwembu kambe loko u endla tano u ta pfuneka. Xiya xikombiso xa Xiujin Xiao loyi a velekeriweke eChayina kambe sweswi u tshama eUnited States. U ri: “Hambileswi a ndzi yi tshemba dyondzo ya ku tihundzukela ka swilo, a ndzi navela ku tiva hi Bibele. Hikwalaho, ndzi sungule ku dyondza Bibele ni Timbhoni ta Yehovha. Hi lembe ra mina ro hetelela ekholichi, a ndzi tshama ndzi khomekile lerova a ndzi va ni nkarhi wutsongo wo anakanyisisa hileswi a ndzi swi hlaya eBibeleni. A ndzi nga ri na ntsako. Kambe loko ndzi sungula ku tlhela ndzi tinyika nkarhi wa ku dyondza Bibele, ndzi kume ntsako wa xiviri.”

Xana u nga tsakela ku dyondza swo tala hi Muvumbi wa hina ku nga Yehovha Xikwembu? Ha yini u nga tinyiki nkarhi wo tiendlela ndzavisiso?