Lexi Endlaka Swi Va Swa Nkoka Ku Tiva Loko Ku Ri Ni Muvumbi

Vutomi bya wena byi ta va ni xikongomelo

BIBELE YI RI: “[Xikwembu] xi endle leswinene, xi mi nisela timpfula ni ku mi nyika tinguva ta ndzalo, xi mi phamela mi xurha ni ku tsakisa timbilu ta n’wina.”—Mitirho 14:17.

LESWI SWI VULAKA SWONA: Hinkwaswo leswi u tiphinaka hi swona laha misaveni i nyiko leyi humaka eka Muvumbi. U ta ti tlangela swinene tinyiko leti loko u dyondza ndlela leyi Munyiki wa tona a khathalaka swinene ha wena.

Kuma switsundzuxo leswi nga ku pfunaka siku ni siku

BIBELE YI RI: “U ta twisisa leswi lulameke ni leswinene, ndlela hinkwayo ya leswinene.”—Swivuriso 2:9.

LESWI SWI VULAKA SWONA: Leswi Xikwembu xi nga Muvumbi wa wena, xi tiva leswi u swi lavaka leswaku u tsaka. Loko u hlaya Bibele, u nga kuma swilo swo tala leswi nga ku pfunaka sweswi.

Kuma tinhlamulo ta swivutiso swa wena

BIBELE YI RI: “U ta va ni vutivi hi Xikwembu.”—Swivuriso 2:5.

LESWI SWI VULAKA SWONA: Ku tiva leswaku ku ni Muvumbi swi nga ku pfuna leswaku u kuma tinhlamulo ta swivutiso swa nkoka swo tanihi leswi nge: Hi xihi xikongomelo xa vutomi? Hikwalahokayini vanhu va xaniseka swinene? Ku humelela yini loko hi fa? U nga kuma tinhlamulo leti enerisaka eBibeleni.

Vana ni ntshembo hi vumundzuku

BIBELE YI RI: “‘Ndzi swi tiva kahle leswi ndzi swi ehleketaka hi n’wina,’ ku vula Yehovha, ‘ndzi lava mi va ni ku rhula ku nga ri khombo, ndzi lava ku mi nyika vumundzuku lebyi mi byi languteleke.’”—Yeremiya 29:11.

LESWI SWI VULAKA SWONA: Xikwembu xi tshembisa leswaku enkarhini lowu taka xi ta herisa vuhomboloki, ku xaniseka hambi ku ri rifu. Loko u swi tshemba switshembiso swa Xikwembu, ntshembo wa wena wa vumundzuku byolebyo wu ta ku pfuna ku langutana ni swiphiqo swa wena swa siku ni siku hi xivindzi.