DYONDZO 02

Bibele Yi Hi Nyika Ntshembo

Nkandziyiso Lowu Printiweke

Vanhu emisaveni hinkwayo va ni swiphiqo leswi nga va dyisiki byi rhelela, swi va twisa ku vava naswona swi va vangela nkelunkelu. Xana u tshame u va eka xiyimo lexi ku endleke u titwa hi ndlela leyi? Kumbexana wa xaniseka hi leswi u vabyaka kumbe hi leswi u loveriweke hi munhu loyi u n’wi rhandzaka. U nga ha tivutisa, ‘Kahlekahle hi ta wisa rini?’ Bibele yi na yona nhlamulo ya xivutiso lexi.

1. I yini leswi Bibele yi hi tshembisaka swona?

Bibele yi hlamusela leswaku hikwalaho ka yini misava yi tele hi swiphiqo, yi tlhela yi hi byela mahungu yo tsakisa ya leswaku swi ta hela ku nga ri khale. Switshembiso swa le Bibeleni swi nga ku “nyika vumundzuku lebyi [u] byi languteleke.” (Hlaya Yeremiya 29:11, 12.) Switshembiso leswi swi nga hi pfuna leswaku hi kota ku tiyisela swiphiqo leswi hi cinisaka hangayivona, hi va ni langutelo lerinene ni ku va ni ntsako wa xiviri.

2. Bibele yi vula leswaku misava yi ta va njhani?

Bibele yi vula leswaku ku nga ri khale “rifu a ri nge he vi kona, hambi ku ri nkosi, ku rila ni switlhavi a swi nge he vi kona.” (Hlaya Nhlavutelo 21:4.) Swiphiqo leswi yingayingisaka vanhu namuntlha swo tanihi vusiwana, ku pfumaleka ka vululami, mavabyi ni rifu swi ta hela. Bibele yi hi tshembisa leswaku vanhu va ta tiphina hi vutomi hilaha ku nga heriki eParadeyisini kona kwala misaveni.

3. I yini lexi nga endlaka u tshemba switshembiso swa le Bibeleni?

Vanhu vo tala va swi lava ku vona swilo leswinene swi endleka, kambe a va tshembi leswaku swi nga pfuka swi endlekile. Kambe Bibele yi tshembisa leswaku swi ta endleka. Lexi nga hi pfunaka ku va hi tshemba leswi yi swi vulaka i ku “kambisisa Matsalwa hi vukheta.” (Mitirho 17:11) Loko u ri karhi u dyondza Bibele, u ta tiendlela xiboho xa loko u nga swi tshemba leswi yi swi vulaka hi vumundzuku.

ANAKANYISISA

Kambisisa swilo swin’wana leswi Bibele yi hi tshembisaka leswaku swi ta endleka ku nga ri khale. Vona ndlela leyi vanhu va vuyeriwaka ha yona hi switshembiso swa le Bibeleni.

Swifaniso: Swifaniso leswi kombisaka swiyimo leswi hi hanyaka eka swona ni swiyimo swa le nkarhini lowu taka leswi Bibele yi hi tshembisaka swona. Kasi ehansi ku ni swifaniso swin’wana.

4. Bibele yi tshembisa leswaku hi ta hanya hilaha ku nga heriki hi nga xaniseki

Vona switshembiso leswi landzelaka leswi kumekaka eBibeleni. Hi xihi lexi ku tsakisaka ngopfu? Hikwalaho ka yini xi ku tsakisa?

Hlaya matsalwa lama kombisiweke etlhelo ka switshembiso leswi, ivi mi bula hi swivutiso leswi:

U vona onge matsalwa lawa ma nga ku pfuna? Xana u vona onge ma nga pfuna ndyangu wa ka n’wina ni vanghana va wena?

Tivone u hanya emisaveni leyi

KU NGA RIKI NA LA NGA TA . . .	HINKWAVO VA NGA TA . . .
twa ku vava, a khegula, a khalabya kumbe a fa.—Esaya 25:8.	vona maxaka ya vona ma pfuxiwa ma hanya kwala misaveni.—Yohane 5:28, 29.
vabya kumbe a va xilema.—Esaya 33:24; 35:5, 6.	hanya va nga vabyi naswona va tshama va ha tiyerile.—Yobo 33:25.
khomiwa hi ndlela yo biha.—Esaya 32:16, 17.	va ni swakudya swo tala, va va ni makaya yo saseka va tlhela va rhandza ntirho wa vona.—Pisalema 72:16; Esaya 65:21, 22.
xaniseka hikwalaho ka nyimpi.—Pisalema 46:9.	va ni ku rhula.—Pisalema 37:11.
ehleketa hi swilo swo vava leswi n’wi humeleleke.—Esaya 65:17.	hanya va nga fi emisaveni leyinene.—Pisalema 37:29.

Xifanyetana lexi a xi vabya xi horile naswona xi hage mhani wa xona.

Wanuna loyi a khalabyile se i muntshwa naswona u chovha girivani leyi nga lo mphaa hi matsavu.

5. Switshembiso swa le Bibeleni swi nga ku nyika ntshembo

Vanhu vo tala va hele matimba kasi van’wana va hlundzukisiwa hi swilo swo biha leswi va swi vonaka. Van’wana va lwa hi matimba leswaku va cinca xiyimo lexi. Vona ndlela leyi xitshembiso xa le Bibeleni xa leswaku swilo swi ta cinca xi va pfunaka ha yona vanhu sweswi. Tlanga VHIDIYO, ivi mi bula hi swivutiso leswi landzelaka.

VHIDIYO: A Ndzi Lava Ku Herisa Ku Kala Vululami (4:07)

Swifaniso: Xifaniso xa le ka vhidiyo leyi nge ‘A Ndzi Lava Ku Herisa Ku Kala Vululami.’ 1. Rafika a ri karhi a hula khothoni ni vanhu va rixaka ra ka vona loko a ha ri ntsongo. 2. Rafika a tsakile loko a vona vanhu va tinxaka to hambana va tsakile loko a ya enhlengeletanweni ya Timbhoni ta Yehovha ro sungula.

Eka vhidiyo leyi, hi swihi swilo leswi a swi karhata Rafika?
Hambileswi swilo leswi a swi n’wi karhata swi nga helangiki, Bibele yi n’wi pfune njhani?

Switshembiso swa le Bibeleni leswi nga ta endleka ku nga ri khale swi nga hi pfuna leswaku hi tiyisela swiphiqo ni ku va hi tsaka hambi swi nga helanga. Hlaya Swivuriso 17:22 na Varhoma 12:12, ivi mi bula hi swivutiso leswi:

Xana leswi Bibele yi swi vulaka hi vumundzuku swi nga ku pfuna sweswi? Hikwalaho ka yini u vula tano?

VAN’WANA VA RI: “Switshembiso leswi nga le Bibeleni a swi nge endleki.”

Hikwalaho ka yini swi ri swa nkoka ku tikumela nhlamulo hi wexe?

NKATSAKANYO

Bibele yi vulavula hi switshembiso swo tala swo tsakisa naswona switshembiso leswi swi endla hi kota ku tiyisela maxangu.

Mpfuxeto

Hikwalaho ka yini vanhu va fanele va tiva leswi Xikwembu xi hi tshembisaka swona?
Bibele yi vula leswaku ku ta endleka yini enkarhini lowu taka?
Ku tiva leswi nga ta endleka enkarhini lowu taka swi nga ku pfuna njhani sweswi?

Tsala siku leri dyondzo yi hetiweke ha rona:

Tiyimisele ku endla leswi

Hlaya matsalwa lama nga eka dyondzo leyi leswaku u ta tiva leswi Bibele yi hi tshembisaka swona.

Swin’wana leswi u nga swi endlaka:

Your other goal

KUMA LESWI ENGETELEKEKE

Vona ndlela leyi switshembiso swa le Bibeleni swi nga ku pfunaka ha yona loko u ri ni swiphiqo.

“Xana U Nga Wu Kuma Kwihi Ntshembo Wa Xiviri?” (Xalamuka!, May 8, 2004)

Vona ndlela leyi switshembiso swa le Bibeleni swi nga va pfunaka ha yona vanhu lava nga ni vuvabyi lebyi nga tshungulekiki.

“Xana Bibele Yi Nga Ndzi Pfuna Ku Hanya Ni Vuvabyi Lebyi Nga Tshungulekiki?” (Nhlokomhaka leyi kumekaka eka website)

Loko u ri karhi u languta vhidiyo leyi ya vuyimbeleri, tivone u ri ni ndyangu wa wena mi tiphina hi vutomi eParadeyisini leyi Bibele yi hi tshembisaka yona.

Tivone U Ri Kwale! (3:37)

Hlaya hi ta ndlela leyi munhu loyi a a lwela timfanelo ta vanhu ni swiharhi a cinceke mahanyelo ha yona loko a twa hi switshembiso leswi nga eBibeleni.

“A Ndza Ha Swi Lavi Ku Cinca Misava” (Xihondzo xo Rindza, July 1, 2013)